11.08.2018 德國西南地區聯賽 第 4 週 Stadion an der Kaiserlinde SV Elversberg - VfB Stuttgart II 賽果：0:1 (0:1) 入場人數：633 （10 名作客球迷） 更多相片
又輸一場，同過去三場一樣既毛病。頭兩場都仲話可能唔夠運，仲有希望，但輸下又一場，輸下又再一場，開季踢得四場只得一分。呢個比賽週末過左之後我地以一分排榜尾，你話可唔可悲？
開波後五分鐘，對方係禁區頂獲得罰球，直射入網。OK, 輸死球呢啲無咩好講。但點解前面總係入唔到波呢？點解去到禁區附近，有人起腳射時，總會有人擋住個波既去路，點解永遠都係人地快人一腳先清走個波？有好多點解，但無人解答到球迷既問題。
對方只係史特加既二隊，通常二隊即係 U23 青年球員。點解連二隊都要攻得咁辛苦？點解連二隊我地都唔可以輕鬆取分？
今場波既尾段，大家又開始唱歌話想炒領隊。有時候仲要唔係 Block C1 帶起，係其他看台既球迷自己唱歌先，即係唔係我地呢班「經唔起考驗」後生仔接受唔到無鬥心無動力既球員，接受唔到不知所謂既排陣，接受唔到完全唔 work 既戰略。既然場上既事我地一時三刻改變唔到，不過自娛開心下好過。
八十分鐘左右，大家開始唱歌「仲有十分鐘…. 領隊 byebye」，「仲有九分鐘…. 領隊 byebye」。唱到大約五分鐘就轉第二首歌。 球場廣播宣佈左入場人數後，大家又唱歌指責領隊搞到越黎越少人入場。仲有平時仲黎慶祝贏波既歌，呢一刻變左用黎自嘲「好享受呢種好耐無試過既感覺」….
完場後，喇叭播起 Don’t Look Back in Anger。心諗 想我地做阿士東維拉呀？？？呢首歌完全播得唔岩囉。正正就係大家 look forward 擔心將來先扯火！有幾位球員直接走左入更衣室，有唔少球員照樣走過黎比我地鬧。係，又比我地鬧。今次仲要連好多老屎忽球迷都走落去一齊鬧。有幾個同我地熟既球員走到欄杆前同我地傾，當然佢地都想 justify 自己既努力，我地都明，同樣佢地都明點解我地會嬲。 其他球員就企係廣告板後面聽一大堆球迷各自各發表意見，當中 5 號球員 Eglseder 走出黎駁咀，話佢已經出盡哂力之類仲想佢點。即刻辣慶左幾個球迷答佢：「咁即係你廢囉，出盡力都仲係咁屎波。」 「咁多野講就唔好企係廣告板後面啦，走過黎同我地當面講下你有幾勁啦」其他球員當然拉住佢，叫佢收聲。
呢個 5 號出聲之前已經係咁叫佢啲隊友返入更衣室唔係企係度浪費時間，但無人理佢。其實好多球員都理解球迷既憤怒，佢地知道球迷一時火遮眼要發洩，由得佢地 9up 下就得，唔洗真係同佢地嘈交。最後 5 號真係走到黎看台前面理論，但因為某幾位球迷越黎越激動，所以佢都係被隊友拉返走。 企係欄杆前既幾位全部都係球迷特別鍾愛既球員，佢地好有耐心咁聽意見同講自己既感受。大家爭論左十分鐘左右，球員就返入更衣室，球迷就大家唱「我地想見到你地既鬥心」送佢地走。
我地之後就走過去 Block C2 拎啲 VIP 淨返既小食同飲品，順便再傾下計咁。途中見到五年前帶 SVE 升上丙組既領隊，現時佢帶領 SVE U19。佢絕對唔係啲咩大名氣領隊，只係來自隔離市既一個大肥佬，當年真係負碌來好彩咁帶到球隊升班。升班後球隊因為內部問題而同佢鬧不和，所以佢離隊走人。有幾個人即刻走去「bitte, bitte」 咁求佢，雖然直接講出求佢啲乜，但其實係想求佢救下隊波。佢好拒絕咁 「不了，不了」 咁奔走左。 哈哈
我地係 vip room 又食又拎既時候，見到現時既領隊 Roland Seitz 係球場既另一邊做完訪問，向緊我地呢個方向行過黎準備走入更衣室。有人係咁大叫 Roland Roland 叫佢過黎，以為佢地扮聽唔到直行，點解佢真係走過黎！
大家當然即刻質問佢搞到隊波咁係想點？隊波踢得咁差到底佢仲有咩對策；點解連史特加二隊都贏唔到，一大堆問題轟埋去佢度。佢好平心靜氣咁逐個逐個問題咁答，但佢講既全部都係廢話，大家一路聽都忍唔住一路笑。話隊波其實踢得好好，今場波尾段明明踢得好好又唔見我地讚。 又話上場係「踢得不幸地差」，仲話佢唔應該要受到我地既批評，我地上季唱歌唱到今季針對佢對佢好唔公平。突然仲指住我問我識唔識佢，我心諗有咩關係？？？？
佢比我地圍攻左二十分鐘，被逼到埋牆角咁開始語無論次，越聽就聽唔知佢到底講乜，完全九唔搭八。佢既結論係佢覺得隊波踢得好好，唔覺得有咩問題。仲話上季頭四場都入唔到波呀咪仲差，我地下場贏波就唔會打破「開季最差紀錄」。真係超級樂觀……… 到最後，佢問我地仲有無問題，有人話「咁到底邊個會做新領隊？」 大家都笑左出黎，就連佢都一齊笑。
雖然佢講好多廢話，同埋我完全唔同意佢既樂觀態度，但我好欣賞佢夠膽同肯過黎同球迷爭論。而球迷亦都好理性咁同佢討論，德國人既率直係呢個時候可以話真正咁見識到。
早幾日睇到朋友既 Hong Kong Football Podcast 訪問，當中提到佢地既角色係對香港足球作出適當既批評，因為佢地發現香港好少「負面評論」。佢地以科蘭做例子，香港人覺得重金請佢黎就唔敢鬧佢咁，佢地就認為佢表現唔好就唔應該用佢。 到底香港人太善良定咩？怕批評球隊既話會令佢地信心受損？有人出黎批評既話可能會有其他人叫佢地「咁叻你黎踢丫」….
而由細睇電視足球睇到大既我，我都一直以為要鬧球員領隊只可以同朋友之間或者上網鬧，永遠都唔可以當面咁講出心中意見。當年憎學神憎到爆，但又點解有機會比佢知道到底佢有幾廢？？？呢種當面對質既感覺真係好滿足，好似完成左人生中其中一個心願咁。係德國，唔係淨係低組別既球迷會有呢個機會，如果球迷提出要求的話，就連頂級球隊既球員或領隊，甚至係內部高層都要約時間會球迷。球隊同球迷既聯繫就應如此。