07.08.2018
德國西南地區聯賽 第三週
FC Homburg - SV Elversberg
賽果：3:0 (0:0)
入場人數： 2,681 （約300 名作客球迷）
更多相片

今場波既對手可以話係我地最討厭既球隊（最主要係因為班球迷）。佢地上季降班落第五級聯賽 Oberliga，今季以冠軍姿態升返上地區聯賽。

SVE 係頭兩場雖然只得一分，但球隊表演仍然令人覺得唔錯，所以大家對今場波有好高既期望。雖然話對方岩岩先升班上返黎，但佢地係繼莎蘭首都球隊 FC Saarbrücken 之後第二大球隊，以贊助商同球迷方面都比我地多，所以絕對唔可以輕敵。

星期二週中波，即係要係放工時間穿州過省去球場。我地最後大約開波前 10 分鐘先入到場。當日天氣繼續 35 度（新聞話最高可以去到 37 度），賽會特許球迷帶最多兩公升非酒精樽裝飲品入場！對唔係太好球場啤酒同汽水既我真係天大既好消息，所以我就帶左一大枝水入場。

好好彩作客區位置咁岩係背住太陽，而七點幾太陽已經落緊山，雖然係熱，但唔係熱到頂唔順！望住主場球迷就慘啦，佢地比太陽曬到正，有唔少人已經剝光豬咁睇波。

主隊 FC 08 Homburg 今年慶祝球隊成立 100 週年，係八月一日，佢地既球迷係市內放煙花慶祝。而今場波返到主場佢地就準備左一個小型 Choreo。 看台前有一塊大白布，看台上既球迷拎住一塊寫住 1908 既大卡紙。球員入場時佢地拉起 Choreo… 一塊白底綠字既超醜橫額，仲要係電腦印出黎既！！！！！！上面列出佢地咁多年來既威水史，包活贏過一次德國全國業餘聯賽，踢過幾年德甲之類。但呢塊咁既白布勁多空位剩左出黎，佢地人又唔多，整咁大塊野做乜？ 完全係我親眼見過最醜既 Choreo！

FCH 當日有大約一百人一齊打氣，對佢地黎講已經算係好多人。佢地隊波今時唔同往日，球迷越黎越少，可以吸引到咁多人一齊唱歌真係唔錯。佢地唱既歌當中唔少得就係鬧 SVE 係屎係垃圾之類，我地都有回應返。

上半場 SVE 完全唔係路，雖然守得 ok，但完全組織唔到攻勢。去到下半場踢得越黎越差，下下都上腳都再傳波，你一上腳人地咪即刻到囉。好啦，終於送到個波去禁區側邊，唔知點解係都要推返轉頭再傳個波去禁區頂搵人接應。然後一堆綠衫已經衝哂返黎擋住你既去路。一係就係咁送個波比人地，完全唔知佢地做緊乜。

去到 70 分鐘終於都係守唔住，比人連入三球。好多人失到第二球就已經離場，而我地都已經安靜左落黎。對面就係咁叫我地做 Absteiger （降班者），心諗 係咪 on9? 而家我地第 1 分排第 15，但大佬，第三場咋喎。 然後又係咁唱佢地係莎蘭第一之類。 好煩！！！！

完場後，班球員過黎作客區，好多人走到去看台前叫班球員醒神。 幾日前我地係 Essen 見過類似情景，慘敗既 Wuppertal 球員走去作客區前比球迷痛罵。 估唔到今日輪到我地去鬧人。 班球員好乖咁企係我地前面，個樣好慘咁望住我地，其中一人叫佢地唔好再遊魂，今場波踢得咁差完全不能接受。 有球員駁咀問：「咁你想我地點呀？」 即刻比其他球員打住叫佢收聲聽我地講野。 我地話 「你唔係諗住你地踢得差既時候我地都仲可以拍哂手笑住咁讚你好波呀？」班球員個樣都好內疚咁，不過我地鬧到最後都一齊拍手大叫 ELVERSBERG 鼓勵班球員叫佢地繼續加油，等佢地知班球迷仍然係佢地後面會同佢地一齊行落去！好在只係開季第三場波，而家有咩問題浮左出黎都仲有時間可以去執。

呢一種唔知算唔算男人既浪漫，又或者係德國人既直接，你踢得好讚你，踢得差就鬧你。盲撐就一定架啦，你連續輸 N 場都好，班球迷都唔會離你而去；但呢種盲撐又唔係果種你明明踢 pat 屎都仲讚你好波，令球隊不知改進。

第二種既盲撐係香港時見得比較多，好似認為球隊踢得差就等如唔支持隊波咁。仲話要好似教小朋友咁比多啲鼓勵。但佢地係小朋友咩？咁大個人比人鬧完應該識用個腦理解下點解球迷會不滿你既表現。希望 SVE 既球員返去會反省下，星期六主場迎戰史特加我地一齊再加油！