德國西部地區聯賽 第 2 週 Rot-Weiss Essen - Wuppertaler SV Stadion Essen 賽果：5:1 (4:0) 入場人數：11,077 （約 2000 名作客球迷） 更多相片
口裡一直都話唔想再北上去北威洲地區，偏偏佢地有最多好睇既比賽，再加上對我地暫時黎講算係容易可以去到。上個月賽程一出，我地已經睇中左西部聯賽既頭兩個比賽日，上星期因為太懶所以留到今個星期先出發。
話就話方便，但其實要搭四個鐘火車先可以到達目的地。出發前一日買定德國火車公司既 Schönes-Wochenende-Ticket，就可以全日任搭全國既地區火車（即係慢車），一張飛最多可以 5 個人一齊用，票價由 44€ 起，每多一個人同行就多 6€。 我地原定 3 人同行，即係要比 56€，除返開每人 20€ 都唔洗！最後友人因為發燒去唔成，得返兩個人出發可以照用三人票搭火車。有時查飛時佢地會八卦問一問第三個人去左邊，你只要話佢無黎／未上車／落左車就得。
星期六八點出發，超好運咁火車無遲到，最後我地好準時咁 12 點 9 就到達 Essen。由 Essen-Bergeborbeck 車站行去球場十分鐘都唔洗，一條大直路就到球場。北威州真係有自己既風味，好污糟，好灰喑，人又奇奇怪怪咁。
離遠已經見到一枝射燈，望真啲呢枝射燈上面無燈膽，直至行到球場附近先會見到呢枝射燈企係球場外面，同埋只有一枝好零丁咁。 呢枝射燈其實原屬舊球場，RWE 係舊球場 Stadion an der Hafenstraße 於 2012 年被拆毀，新球場 Stadion Essen 建於舊球場旁邊，而球會就留返枝射燈黎作紀念。
比賽兩點開波，我地大約一點鐘到球場搵售票處買飛。每邊看台都有兩至三個專屬售票處，我地出發前已經㨂左要坐 R 區看台，即係主看台對面。當中 R 區即有兩個人係售票處買飛，勁多人排隊！仲要一條隊係排 R1 同 R5，另一條係 R4 同 R5。有人排左勁耐去到窗口先發現排錯隊，比賣飛阿嬸叫佢排隔離隊。嘈左一輸之後個阿嬸終於放棄，幫佢去隔壁窗口買飛。我地買左 R1 區，係正作客區既旁邊。
後來有人問我地入球場時有無遇到麻煩，因為 RWE 佢地捉 Groundhoppers 捉得好緊，而 R1 正正就係 hoppers 最中意去既看台。入場時我已經留意到有啲球迷組織既人係 R 看台徘徊，不過我不嬲都唔會遇到呢啲問題，因為我永遠都只會比人當遊客第一次去睇波～
到我地入場搵到位後，已經淨返 10 分鐘就開波。兩邊既球迷都已經入哂場準備就緒。Rot-Weiss Essen 係西部聯賽之中最大既死敵係鄰市 Rot-Weiss Oberhausen；RWE 其中一個最大既盟友係多蒙特，而 RWO 既盟友就係史浩克，淨係呢一點就已經可以解釋點解佢地會咁憎大家。雖然 Wuppertal 唔係 RWE 最大敵人，但 WSV 則視 RWE 為最討厭既對手！看台底下有一大塊旗寫住 Anti Gruppo Rossoblanco，係意大利文意思 反紅白色 (Rot-Weiss) 既組織。而 RWE 既看台前都有一塊大旗寫住德文粗口 Hurensöhne，當中 ö 既 o 用左 WSV 既會章黎取替。
雙方既球迷組織係賽前都會號召球迷一齊為球會打氣，WSV 叫球迷著波衫一齊搭火車去踩場；而主場既 RWE 就叫大家著代表球隊既紅或白色衫，同埋宣佈會準備紅白旗海 Choreo 為球會助陣。一入到場就見到 RWE 既西看台一片紅白海，而作客球迷亦都有準備紅藍色既膠帶 Choreo，令作客看台係球員進場時變成紅藍格仔。
差啲唔記得呢場波只係第四級既聯賽，沉醉係球迷既打氣聲時，我地發現一個新球場竟然無大電視、計分板同埋鐘！好啦，唔重要既。一開波 RWE 就搶到攻勢，入埋波，啲人話開波只係 25 秒！球場廣播同球迷一齊慶祝，叫出入球球員既名：Florian…. BICHLER! 呢個咪係岩岩由 Elversberg 離隊既球員！仲有 RWE 既領隊同樣係上季由 SVE 轉會既 Kasten Neitzel。佢季中被炒之後就獲 RWE 聘用，亦都立刻簽走埋 Bichler，果然有好眼光。
一早失波唔一定係壞事黎既… 起碼都仲有 89 分鐘去追。 主場球迷即刻起勢咁唱歌打氣；作客球迷亦都未有覺得失落，佢地當日有來自土耳其費倫巴治既好朋友助陣，一遍紅藍海之中有幾個著住黃黑色波衫既人一齊打氣。
比賽其間，西看台既球迷舉即唔少大字報挑釁 WSV 球迷。例如有恥笑 WSV 同費倫巴治既結盟，同佢地講「我地唔洗用腰帶都可以打贏你呀！」 （土耳其既足球流氓中意打交時除腰帶當武器用）；仲有大字報話「黎緊 16 場作客比賽要留名恥笑你」之類。同時亦都有其他球迷組織舉起大字報為 RWE 其中一個領導組織 Rude Fans 慶祝成立十週年。
睇呢啲較大型既比賽真係好難留心睇波，因為看台上面有好多野睇。正正因為呢個原因，有時我地會去睇再低組別啲既聯賽，好好咁專心睇波，留意返球場上既比賽，不受場邊事情打擾。
呢場波好一面倒，RWE 佔儘所有攻勢，SVW 根本無力還擊。去到 32 分鐘終於都係守唔住，主隊大開殺戒係完半場前一口氣入三球。半場就已經 4 比 0。 身為史浩克球迷，我當然唔想 RWE 贏啦，但 WSV 真係好唔爭氣… 而我睇入球 show 又睇得好過癮，如果 WSV 追唔到一兩球既話都想 RWE 可以繼續入波數多幾粒娛樂下大家。
下半場開波主隊繼續禁住客隊黎攻，去到 60 分鐘 Bichler 射入佢今場第二球，將比數拉開到 5:0。有唔少作客球迷係呢個時候已經無眼睇離場，打氣聲無開波時咁大聲，但係看台前既球迷一於少理比數，繼續叫球員加油。完場前終於成功破蛋。
完場後，雙方球員分別走去自己既球迷前面致謝同致歉。 作客球迷爬上欄杆同球員講道理，領隊同埋幾位球員亦都去到最前去接觸班球迷。每次見到球員呢一個舉動都會覺得好感動，會主動行去球迷面前聽佢地有咩想講。班球迷當然十分之嬲，球員同領隊都嘗試安撫佢地。愛之深責之切，球迷鬧到最後仍然會為球員鼓掌，因為一場還一場，下次大家一齊再努力過！
離場後，我地就到市中心搵已經有一年無見既朋友食飯。呢個飯局黎得好突然，原先我地計劃一完場就搭火車返屋企，轉車果陣去麥當勞食個包當晚飯就算，最後我地遲左三個鐘先走，要搭尾班車返去！唔係佢話我知我都唔知德國都有漢堡包店 Five Guys，我聽就聽過好多次，啲人成日講到好好食咁！嘩…. 小漢堡要 5€ 起，大漢堡要 7€ 起，汽水另叫 3€ 任飲，再叫左個 Milkshake 要 6€，而薯條就 3€ 起。 我係球場食左啲野所以仲未肚餓，我地兩個人叫左個大漢堡，一杯野飲同一個奶昔，已經 15€ ._. 新鮮漢堡包其實係差唔多呢個價，但唔知係咪期望太高，覺得無咩特別，就連對食物完全無要求既朋友都話失望！不過最重要都係可以同佢地短時間相聚下。我地相約今季要一齊去睇 Fortuna Düsseldorf，暫時希望可以買到十月頭對史浩克既波飛！
對上幾次去北威州都勁黑仔越到勁多問題，今日真係第一次完全無事發生。火車只係遲左幾分鐘，唔洗跑住追車！估唔到原來北威州都有正常既一日…