03.08.2018
德國西南地區聯賽 第 2 週
SV Elversberg - Wormatia Worms
Stadion an der Kaiserlinde
賽果：1:2 (1:1)
入場人數：1,458 (約 100 名作客球迷）
更多相片

天氣繼續炎熱，雖然第二週同樣係星期五晚開波，但去到 7 點都仍然係 35 度。返到無上蓋既主場，除左主看台，作客看台背住太陽，其餘兩個看台都要望住太陽落山。我地大約 5 點半到 Elversberg，大約 6 點 3 先出發去球場，唔想係太陽底下曬太耐。

去到球場，見到 Block C1 幾乎無人，以為啲人去哂主看台或者等開波先黎，但原來個個去哂近主看台可以遮陰既地方，即係 C1 看台中心係吉哂，但右邊就有一堆人。直至開波前約 10 分鐘，作客球迷先到達球場，佢地掛好橫額等打氣物品後，球員已經開始入場。

一開波，客隊就搶到個角球，當時我仲係看台底想影作客球迷。角球開出，客隊球員係遠柱接應頂入。1:0。 我都仲未反應得切時就即刻先失波……. 好啦，影夠相走返去，比太陽曬住不斷流汗，覺得如果我再講野既話就會脫水而死。 一齊拍左幾下手，SVE 就極速追和。 有人即刻問，我地有無試過咁快扳平？唔知呢，但上季一定無囉。

同開鑼戰一樣，SVE 係中後場可以話禁住對方黎攻，可惜個波一直都去唔到前場，永遠就係爭最後兩腳。個波入到禁區，但永遠去唔到自己腳下，對方快遠快人一腳先清走個波。

作客球迷全場都高聲打氣，有睇左幾十年波既人走黎問到底佢地啲球迷係邊度黎？咁多年都未見過佢地唱歌唱得咁大聲，仲要係不停咁唱。我地估當中應該有 Waldhof Mannheim 既朋友係入面助陣。佢地自從比球會重罰後就無咩心機想打氣，可能走黎幫朋友打氣仲好玩。Worms 來自莎蘭旁邊既州份，即 Rheinland-Pfalz，即係天生大家已經互相厭惡。 比賽期間大家都有唱唔少互罵既歌。

去到下半場，我地一直都覺得好快就可以反超前，但望住班球員去到我地面前就硬係差一腳先送到個波入網。60 分鐘SVE 得到角球，斬到龍門前面變左波子機咁，總之有人篤得中個波就可以射入，好啦，有人篤中左，但竟然有個中堅賓係遠柱加一腳，個波彈起中眉底彈走左！！好嬲呀！！！幾分鐘後黎一次反擊，個波由中路傳去右邊，推入禁區射入。我已經即刻望一望旁證先，佢無舉旗，大家好開心咁慶祝！！！！慶祝完後先聽到球證吹雞指住龍門，判呢球波係詐糊。領隊同後備球員都走哂出去同球證理論，嬲到爆炸！！！！ 呢球波都而家我地都唔知到底有無越位，點解可以無運到咁？

完場前十分鐘，對方一個冷箭射入第二球。雖然今場輸波，係有啲失落，但唔知點解完全唔覺得失望。整體黎講，隊波比上季更加有組織，只係要繼續努力搵下方法送個波上去。兩個失球主要都係唔夠運，唔係因為啲咩大錯而搞到失分。

球證吹完場雞後，對方球員勁激動咁震臂高呼，好似贏左冠軍咁，佢地班球迷亦同樣係咁唱歌慶祝。事關佢地近十幾二十年都未試過排榜首，完場後佢地以今季兩場全勝之態排第一 （後來有另一隊波完場後以得失球之差搶左佢地個第一），所以佢地用左半個鐘係球場度一齊慶祝 -_-

而我地睇完波極肚餓，拿拿聲返去食一早訂左既 Pizza 醫肚。下一場波會係四日後作客岩岩升返班上黎既同州死敵 FC Homburg。