27.07.2018
德國西南地區聯賽 第一週 
Kickers Offenbach - SV Elversberg
Stadion am Bieberer Berg
賽果：1:1 (0:0)
入場人數： 6,644 (約 100 名作客球迷）
更多相片

新一季終於重新開始，今季打頭陣既就係我地 Elversberg 作客法蘭克福附近既 Kickers Offenbach。今季有好多新賽例，最重要既就係升班制度改革。雖然都仲係有附加賽，但最起碼西南地區既冠軍係已經確保可以升班。

上一季雖然已經完結，但有唔少問題延續到去今季。例如 Waldhoff Mannheim 係附加賽因球迷鬧事而導致賽事腰斬，賽會到而家都仲傾緊點樣處罰佢地。一開始話要扣九分，後來話只扣三分，但而家球隊仲上訴緊睇下仲有無得減刑。而冠軍 FC Saarbrücken 就一時間失去左兩個重心攻擊球員；仲有某幾隊波都有財政問題未知捱唔捱到一整季。 暫時睇落大家既實力都幾平均，睇唔出邊隊有優勢。

星期五要 Offenbach，大約兩個半鐘車程，巴士由 Elversberg 三點半出發。平時就算巴士黎到，大家都會企係巴士站食煙吹水，等到夠鐘先上車。但歐洲呢幾日有熱浪，日日都三十幾度，所以巴士到站後，大家即刻衝哂上車涼冷氣。 而我呢個香港人真係好想喊，因為德國屋內好少有冷氣，就會有得比你買你都唔知點整個冷氣機位出黎。所以我都懶死係巴士唔肯落車。香港平時 2 點左右最熱，但呢度日照時間長，係由 12 點到 7 點都熱到爆，當我地 6 點幾到達球場時，氣溫都仲係 35 度！！！

由停車場行去球場作客區要穿過一個公園，中間有個噴水池，好多人都即刻跑過去玩水涼一涼個身。玩夠就去球場買飛入場。網上面佢地話波飛 10€ 一張，但黎到變左 12€。好心啦，堂堂一隊大球隊都要咁樣呃錢！！！小食亭仲要連 Schnitzel 都無左，得啲極油膩既腸。不過熱到咁我都無咩胃口食野。

完全唔敢想像如果係週末 2 點開波既話大家會有幾臭幾嘔心！！！雖然仲係 35 度，但太陽已經慢慢落緊山，同埋呢個球場四邊都有上蓋，而作客區正正就係背住太陽。雖然唔洗曝曬，但大家都流汗流到就黎脫水咁濟，寧願去廁所拎水喉水飲都唔飲啤酒。

場波比原定遲左 15 分鐘先開波，因為好多人放工趕去睇波，場外有好多人未入到場。 OFC 既主看台唔係龍門後面，而係我地左手邊既全企位看台。開波前佢地聲勢浩大咁幫自己球隊打氣，不過聽落其實佢地黎黎去去都係得三首 Shalala 既歌，呢三首以外既歌就得返球迷組織既人自己唱。 而作客球迷雖然人唔算多，但係星期五晚可以有一百人黎到睇波，對鄉下隊黎講已經係好多人！！！

當日個個都有好動力為球隊打氣，呢一百人入面可能有八十人都企埋一齊打氣，實在難得。我地係呢度既作客成績而係麻麻，唔係和就係輸波，上季仲要係度輸三球，但球隊今日既表現令我地覺得應該可以破咒贏三分！雖然攻勢唔多，但明顯處於上風。主場球迷好不滿自己球隊既踢法，每次個波一上腳佢地就會狂噓叫自己既球員快啲推上去，就連龍門動作慢少少都被鬧！

SVE 係下半場越踢越順，終於成功搵到機會開齋領先一球！領先後，作客區既球迷出盡力打氣，借助球場上蓋造出黎既回音，唱到球場外邊都聽到！好可惜唱唔夠 15 分鐘就比對方追和。主場看台啤酒橫飛，六千幾個球迷一齊慶祝… 同上季一樣，開季第一場只得一分，但完全無上季咁失望。今季頭場呢一分係覺得唔抵！

後來得知  Mannheim, Saarbrücken, Homburg 呢三隊最大既敵人都輸波，所以我地咪算慘。完場後我地就坐巴士返去，係高速公路上面賞月蝕。德國既高速公路無路燈，所以可以安座車中賞月。下星期同樣係星期五晚比賽，天氣預告話都係三十幾度，不過到時我地要望住個太陽落山……..