18.07.2018
賽前熱身賽
SV Elversberg - 1.FC Kaiserslautern
Waldstadion an der Kaiserlinde
賽果：2:3
入場人數： 2738 （約 1200 名作客球迷）

自六月中正式進入暑假之後，我地都趁機好好享受暑假，世界盃都唔係好得閒睇，除左德國果三場波同最尾果兩場，我地都寧願坐係花園曬下太陽都唔想坐係電視前面。

係世界盃期間，好多球隊已經開始踢緊熱身賽為新一季做準備。而地區聯賽下週末就正式開季，所以球隊就係今個星期三邀請左岩岩降班落丙組既凱莎羅頓黎做一個 season opening game。

雖然凱莎羅頓既風光時間不再，但佢地係德國既西南地區可以話係最受歡迎既一隊波。 Kaiserlautern 市係正莎蘭側邊，所以好多莎蘭人都係凱莎羅頓既球迷。比賽當日成條村有好多紅衫人走黎走去。不過始終凱莎羅頓來自另一個州份，佢地既球迷組織同某啲來自莎蘭既組織都有唔少瓜葛。

剛過去既季尾有 1.FC Saarbrücken 爭升班上丙組，好多人都好期待佢地升班後遇上凱莎羅頓，可惜佢地最後升班失敗，可能要等多季先有好波睇啦。

賽前我地先到 Fan-shop 買下個月德國盃首輪對禾夫斯堡既波飛。呢啲盃賽通過都係加價掠水既好時候，不過今次對手只係無人興趣既禾夫斯堡，波飛同聯賽一樣價錢！！我地一直對呢場波無咩期望（球迷方便），今日收到風佢地既球迷組織有人係果日結婚，好大機會佢地唔會黎睇波。 好野 (Y)

今日我地無如常去 Block C1，而係去左 C2，因為果個看台有多啲野食，包括綿花糖同雪糕，仲有好多親子活動攤位。對面既主看台雖然未滿，但已經有好多人入場。成個球場都夾雜左好多凱莎羅頓既球迷，最後有近三千人黎睇波，可以話係近年最多人入場既 season opening。 作客區都企左唔少球迷，不過佢地既球迷組織無帶橫額黎，只得其他小組織係看台前掛野。

呢場波除左開波時，班作客球迷係度 Scheiss FCS 之外，其餘時間都完全無氣氛。客隊係西南地區既傳統勁旅，但而家只係同我地呢隊鄉下波相差一個級別。佢地話哂岩岩從乙組降班，應該仲有啲水準係度卦。無諗過我地既陣容入面有正副選夾雜都可以做到唔少靚組織，仲成功入波開齋。 凱莎羅頓完全無任何霸氣，當然佢地都未必用正選應戰 （真心唔識佢啲球員，唯一一個 Zoltan Stieber 都原來上年已經走左）。

凱莎羅頓完場前反超前，但佢地兩個入球一球係自由球射入，另一球係十二碼。下半場大約 60 分鐘，SV 射入第二球追和！然後教練要求換人，唔係換一個，唔係三個，係十個同時換。熱身賽下半場開波前全隊波換好正常，踢踢下波咁樣換真係第一次見，好似無啦啦成隊波拉大隊走人咁。

去到尾段，客隊又獲得十二碼，條友係正我地面前插水得返黎！！！！！好多人畫電視然後大叫 VIDEOBEWEIS! (VAR) ， 插水果個 14 號個樣勁痛苦咁尼馬上身碌黎碌去，大家就係咁幫佢配音 aua aua aua （德國人常用既痛苦聲），後來佢每次拎波大家都大叫 AUA AUA  ELFMETERRRRR 比十二碼啦球證！！！！ 😀 😀 講笑咁講話佢地降班落丙組可能就係想避開 VAR。

最後 2：3 輸波，不過就連附近既凱莎羅頓球迷都認為自己隊波踢得好差。希望 SVE 今季可以踢好波贏冠軍！！！或者德國盃入面我地只需要贏五場波就可以晉身歐霸！一日未輸波，我地既足球夢都仲有可能實現！

下星期五會由我地作客 Kickers Offenbach 上演聯賽開鑼戰，希望會有個好開始。