27.05.2018 德國丙組聯賽升班附加賽 次回合 SV Waldhof Mannheim - KFC Uerdingen Carl-Benz-Stadion 賽果：1:2 (1:2) 入場人數：24.263 (3000 名作客球迷） 更多相片
今年 SVE 無份爭升班，變相我地有時間可以去睇西南地區既兩位大哥爭升班。原先我好想去睇 Saarbrücken 作客 1860 既，不過兩場波既飛秒速賣哂，就連搵相熟既朋友都幫唔到手，咁就只好集中火力搶 SVW 波飛。佢地首回合作客 KFC 無興趣睇，因為 KFC 要借乙組 Duisburg 球場去踢，一來已經去過，二來好遠！
早兩個星期佢地宣布主場波飛開售細節後，我地就係果日一日捕住部電腦搶飛，諗住買近作客區既座位，點知㨂完位諗多兩秒就無左，最後只係得返企位。通常企位即係要企係球迷組織後面，但 SVW 既龍門後看台其實係座位，兩個球角旗後面先係企位，我地最後買左最最最最側邊既企位區。
Waldhof Mannheim 過去三年都成功進入升班附加賽，但去到賽前加加埋埋五場波入面，佢地都從未射入過一球波，換句話說，佢地過去兩年都升班失敗。 其實好多人都想佢地可以升班，因為來自 Mannheim 呢個城市既人其實個個都好愛自己隊波，即使被困係地區聯賽咁多年，佢地既入場人數一直都係全個聯賽最高，講緊既唔係一兩千，而係平均入場人數係超過四千人！我就當然想大球會可以升班，加上作為同一個聯賽既競爭者，好想快啲可以送走佢地，咁下季 SVE 贏冠軍升班既機會就會增加～
由我地既城市去 Mannheim 要大約兩個半鐘火車車程，所以我地一早八點鐘就要出發，到達時十一點幾，火車站內外已經有好多球迷！！然後由火車站行經市中心，再行到去萊茵河邊，沿住條河向電視塔方向行，穿過一個大公園就會到球場。有另一條路係近好多，不過我地想賽前散下步先，所以行左成個鐘先到球場。由於我地由河邊穿過公園去球場，即係我地要經過作客區入口先可以去到球場正門 （完場先發現另一條路唔洗經作客區），當時有幾架作客球迷巴士到達，後來先知原來 SVW 球迷去左襲擊 KFC 既巴士。
平時我地要去呢個球場都係要入作客區，今次要去主場正門個感覺好新奇。球場外有電車可以到達，旁邊有間酒吧係球迷組織既聚腳地，再隔離就有間中式酒樓，再行多幾步就會到門口。 場前一個鐘已經超多人排緊入場，男女分隊排。三年前去呢度睇打比戰時佢地保安超嚴格，連 M 巾袋都要打開比佢睇係乜，但今次我成袋都係野佢都係立一立就放我入場。
球場正門入口係南看台，球迷組織係東看台，而我地就要去北看台既 Block O。 行上樓梯踏入看台時，有球迷組織既人企係樓梯中間向球迷派一張巨型藍黑畫紙，簡單咁解釋今日佢地準備左個 Choreo，首先舉起黑色，然後轉去藍色，然後祝我地睇波愉快咁，好有禮貌！ 進入看台後淨係見到人，好似成個看台都已經滿左咁。我地一路攝上去，由於我太細粒，如果要有靚位既話就一定要企側邊，最後成功游到上看台最頂最角落位置！睇波黎講就一定唔係靚位啦，因為我係正欄杆旁邊，所以視線會有野阻住。但睇球迷就真係算唔錯！雖然唔可以正面見到東看台既主場球迷，但都已經好過企係佢地後面。 而右手邊既作客看台視線就一絕。
主場既球迷組織唔係淨係準備左畫紙 Mosaic choreo 咁簡單，佢地既看台前有超長既白布圍住前方圍欄，仲有好多條繩由掛左係度，即係佢地會有野拉高，超期待佢地今次有咩表演！球員未入場時，球迷已經開始唱下歌熱身，好大聲好大聲，就連場內既廣播都聽唔到。
作客球迷都準備左代表球會顏色既紅藍 Choreo，一個區既球迷著住藍色既膠衣，另一個區就著紅色，睇落氣勢都唔錯，企位看台由上到下都有一齊舉手拍手打氣。賽前佢地打開一塊大字報，上面寫住：Zu neuen Ufern goldenen Zeiten bis ganz nach oben wollen wir schreiten. 佢地係首回合主場領先 1：0，今場佢地只要拎到作客入球的話就可以好穩陣咁升班。
球員準備出場時，主看台既球迷就舉起黑色畫紙，東看台就打開白布，看台前有大字報分兩次展示，首先係 Schon tausend Mal für tot erklärt.. 大意係你以為我死左，佢地拉起準備好既 Choreo，係一個墳場，然後放出黑煙。呢個墳場睇落就咁白色好似好簡單，但佢唔係一大塊布就咁畫上去，而家剪左個成個墳場形狀出黎。
然後第二塊大字報：Doch heute werdet ihr eines besseren belehrt，今日係時候等我地教訓你，所有人將畫紙轉去藍色一面，然後有一隻喪屍係墳場中冒出，然後放藍煙，仲有好多響炮。 身邊既球迷都係咁盛讚呢個 Choreo…. 大家都充滿希望覺得今日係時候贏波升班。 有啲人成日會話球迷淨係識得搞事，從來唔識欣賞球迷既藝術，呢啲係百分百創意同藝術，花好多心機人力物力先可以做到出黎。
當大家仲嘩嘩聲既時候，場波原來已經開始左。我想講，平時我地係掛住睇球迷唔記得睇波，但今場波係好睇到我地唔記得左班球迷。 主場球迷個個都一齊跟住東看台唱歌打氣，我地都跟埋一齊拍手因為好想佢地快啲升班，同時比賽節奏都好快，因為呢場波支持主隊，所以睇得好肉緊。
客隊首先攻向東看台，每次有球迷要黎開角球既時候，都會有好多人將頭先既畫紙拿埋一舊擲佢。去到比賽中段客隊係底線傳中頂入領先，由我地既角度睇個波係底線已經出左界…. 佢地仲要走黎東看台面前慶祝，啲球迷係咁掉野落球場，當中少不了啤酒… 呢個時候作客區緊係慶祝啦，拎到作客入球總比賽 2：0，即係 SVW 要入三球先可以升班。大家都話 玩完。
但幾分鐘後，SVW 即刻追和，終於打破附加賽無波入既宿命！所有人都超開心，所有人都企哂起身睇波。但作客區果邊既看台好似出事，KFC 有一班人突然向住某一個方向衝過去，有一班人離開看台，然後仲有人係看台上打交，大約兩分鐘後先有防暴警察飛奔入場分隔佢地。作客區西看台有三個區係分左做作客區，淨係一個區係主場區 （主要因為 SVW KFC 原先無咩恩怨所以可以咁樣無間隔咁分區）。 後來睇新聞得知有一位保安因為呢場交而受傷，到呢一刻都仲未見到有人講到底發生咩事。
完上半場前，我話 SVW 仲有機會可以贏，兩球唔算太難，追兩球好過要追三球，話口未完，客隊再入波領先……… 呢一刻只係聽到 KFC 球迷既聲音，唱到上半場完都無停過。半場休息時我地留係自己個位，要係 15 分鐘內穿過幾百人出去再排隊買野飲野食再重新爬返上看台頂係無可能既。
下半場開波後，班球迷同球員都仲未放棄，大家一齊繼續唱歌叫 SVW 加油。不過主隊其實踢得麻麻，係咁交失波，完全唔可以慢慢做波上去。當時間越黎越接近完場，主場球迷都開始放棄。 去到大約 70 分鐘，作客球迷已經開始放紅煙慶祝升班，同一時間，東看台既球迷組織開始收起佢地既大旗同橫額，之後連歌都無再唱。收旗代表佢地準備有野想做… 可能係想用沉默去向球會表示不滿，可能係怕完場後 KFC 球迷會衝落場然後借啲意去搶佢地既野，仲有好多可能，可能佢地想搞事。
去到 85 分鐘，呢個可能原來係最極端既可能。佢地開始放黑煙，同早兩星期係漢堡出現既差唔多，但漢堡既球迷只係放煙同掉左幾舊野落場。今日，佢地不斷放煙同掟響炮落球場，嘭！BOOM! 嘭！仲有好多煙花射上天。球證暫定比賽叫球員入左更衣室。其他普通既球迷一開始都係度歡呼，而球場廣播就叫球迷組織停手，係咁求佢地 Bitte, bitte, bitte，佢地話咁樣做對球隊完全有害無利，再咁落去場波只會被腰斬。
腰斬聽落可能唔係大問題，但如果係因為球迷導致賽事腰斬的話，球迷所屬既球隊首先會被判輸波，如果係聯賽出事的話有機會會被扣分，然後就係被足總罰款。德國足總既條例寫左賽事腰斬的話會向球會罰款 10 萬歐元，即係大約一百萬港幣。 對一隊地區聯賽球隊黎講係好好好好好多錢。
其他球迷慢慢覺得班 Ultras 係時候要停手，開始噓佢地，一齊叫 aufhören 叫佢地停。啲煙花放到咁上下，佢地就開始燒紙玩火，看台前有幾個火種。球迷組織通常都有幾個人會得到球會許可可以落球場，企係球場既成員就係度幫手煽風點火，扮拎滅火筒救火，但其實係就咁開左個滅火筒然後等佢一路噴野去整更多煙出黎。看台另一邊既作客球迷就食住花生咁慶祝自己隊波要升班，有一班人已經走左去欄杆上邊等住衝落球場。
過左十五分鐘，班主場球迷靜左，睇黎佢地終於收手，班球員同球證出返黎，球證話可以繼續比賽。球證吹雞重新開波時，東看台再掟響炮同放煙花，客隊即刻向球證示意 喂我好不安喎。就係咁，球證吹完場雞宣佈賽事腰斬。
同一時間，客隊既球員即刻衝去自己既球迷度慶祝，亦有幾個作客球迷即刻想衝落場。不過保安人員即刻衝出黎叫返佢地入去，防暴警察都走左出黎做人牆以防雙方球迷可以係場上搞事。
就係咁，SVW 連續第三年升班失敗。 當然 Uerdingen 呢場真係踢得好贏波升班，SVW 技不如人輸波無野好講，但係你諗下，你努力左一整季最後都係無功而還，一次升班失敗已經夠痛，仲要連續第二次，第三次。可能你會話 有無搞錯呀，因為一小班人搞事就累到成隊波比人罰。呢一個 point 我明，但連續三年升班失敗，去到呢一個時間，仲講咁多做乜。點解其他聯賽既冠軍可以升班，但唯獨地區聯賽既冠軍無得直接升班？三年啦，仲要連續第四年無西南地區既球隊升班。（今年同上年佢地唔係冠軍，但前年佢地係冠軍）
點解辛苦左一整季，最後都係被困地區聯賽？
同一時間，FCS 作客 1860 ，首回合輸 2：3，去到慕尼黑下半場連續射入兩球，以為可以送走 FCS，點知比 1860 追返兩球….. 即係西南地區聯賽再次無球隊成功升班。 有無人可以解釋到點解足總之前可以覺得無問題，唔係比人係咁追罵既話佢地都未必會諗一個新制度出黎。賽後連 Ueringen 既球員都出黎講制度問題。
SVW 同 FCS 升班失敗，另一班要傷心既球迷就係 SVE 今季聯賽最後一場既對手，TuS Koblenz。仲記得當日佢地大炒我地四球之後係咁慶祝到好似贏冠軍咁，但而家佢地一樣都係要降班。
完場後我地離開球場時，見到球迷組織既人走哂出黎好趕咁衝去作客區，我地唔敢跟住去，但離遠睇見到佢地係度打交。後來防暴警察起到，佢地就即刻包哂頭咁走返轉頭。 雖然我地好想食花生，但我地自 11 點之後就無再食同飲過野，個天仲係度行雷好似想落雨咁，我地只好拿拿聲返去火車站，買野食然後坐火車返屋企。
呢兩日，賽事腰斬既後果開始出現，首先 SVW 正式被判為輸 0:2，即係係正式紀錄入面佢地連續六場附加賽都無入過波。而 SVW 亦都重重處罰球迷組織，首先球會會收返龍門後既東看台，唔再由球迷組織自己話事；東看台會正式變返座位看台，企位看台只剩返角球旗兩邊；球迷組織唔可以再係比賽日以外日子進入球場；球隊唔再比地方佢地放置任物品；唔可以帶放何打氣物品入場。 換句話講，末來幾個月既 Carl-Benz-Stadion 都唔會有任何氣氛。唔知來季班球迷會有咩搞呢…
計埋今場我只係第二次見證比賽腰斬，第一次係香港因為倒水所以比賽唔可以繼續，今次係第一次因為球迷所以要腰斬。 成場波，由排隊入場到完場離場我都覺得好震撼，有一段時間無睇過咁精彩既 pyro show。場波原先已經夠好睇，佢地賽前準備既 choreo… 再加埋班球迷既助陣，全場球迷既一齊熱血打氣，完全會唔記得左呢場波只係第四級別既賽事。
下季既西南地區聯賽冠軍將會可以直接升班，但如果 SVW 真係被罰十萬歐的話真係唔知佢地仲有無錢去爭升班。