21.05.2018 莎蘭盃決賽 SV Elversberg - 1.FC Saarbrücken Waldstadion an der Kaiserlinde 賽果：1:0 (0:0) 入場人數： 6623 人 （約 5000 名作客球迷） 更多相片
莎蘭盃決賽，一定要贏呢場波先可以係來季德國足總盃第一圈出戰。SVE 今季聯賽無份爭升班，呢場波無疑變成全季最重要既一場波。但係，呢一日去到開波前都完全無特別興奮或者期待，心知自己隊波係比人睇低一線，事實亦都係低一線，過去四年既決賽只係贏過一次，的的確確係 Underdog. 聯賽第 5 名對今季幾乎不敗既聯賽冠軍，人地仲帶住五千個球迷到場黎反客為主喎……
我地無人球咁多球迷，又唔夠人地財雄勢大。上季未完季，佢地已經從我地隊波度刮角，簽入我地既後防重心球員 Kehl-Gomez （今場波每次佢趁角球上前黎我地既看台前既時候，都比 Block C 球迷媽叉到爆，佢都忍唔住指返我地黎鬧。 我而家送多你一句：食屎啦你）上季我地都唔係好明，明明我地好有機會升班，點解啲球隊會係未完季就轉會。今季就唔知係咪有報應，FCS 既射手同另外一位重心球員上個月比乙組既球隊簽走左。即係佢地去到季尾無論踢得好定差，都一定有地方落班。
上季我地係決賽以 3:2 輸左，最主要原因係，盃賽決賽係星期一，然後附加賽首回合係星期三，次回合係星期日。即係一星期要踢三場波，對比起幾乎肯定第一回合就會出局既德國盃，當然係升班上丙組重要好多，盃賽冠軍有就最好，但派二隊出賽已經好足夠。
今季去到呢一刻，其實就好似上季既翻版。上季 SVE 贏聯賽殺入升班附加賽，對手係來自巴伐利亞既球隊，同時亦都好輕鬆咁殺入莎蘭盃決賽，對手係同鄉 1.FC Saarbrücken。今季，FCS 贏聯賽冠軍殺入升班附加賽，對手同樣係來自巴伐利亞既球隊，同樣好輕鬆咁殺入莎蘭盃決賽，對手係同鄉既 SV Elversberg。唯一係無變既係，賽前所有人認為 SVE 係 underdog.
就係咁，抱住普通既心情出門口去球場睇波。呢個普通既心情入到場就唔見左，好耐無見過滿座既 Kaiserlinde，雖然大部份都係為左 FCS 而黎，但見到有咁多人黎睇波，即刻開始有緊張既感覺。
盃賽決賽點解會係我地主場踢？唔係分兩回合，只係莎蘭足總 (SFV) 搵唔到中立場。上季我地係 FC Homburg 既主場踢決賽，但 FCH 係 SVE 同 FCS 既敵人，要我地去敵人既主場比賽，Homburg 市政府就會出動超多警察去戒備。今年 Homburg 話唔想再借個球場出黎，而 FCS 又同意係我地主場比賽，所以變相我地有主場之利。
對方係莎蘭最大既球隊，有最多既球迷，所以佢地一直都睇唔起鄉下隊 Elversberg。 但始終同一個州，我地雙方私底下其實好多互相認識既朋友，甚至我地出事既時候佢地都會黎幫手，或者佢地有時都會叫我地一齊出去。 FCS 球迷想趁之前既莎蘭盃四強去突襲 FCH 球迷，可惜失敗收場仲比 SFV 罰佢地今場唔可以帶打氣物品入場。（地區盃賽係由地區足總管理，唔關 DFB 事）
不過呢，球迷永遠就係有種反叛既心態。你唔比我帶打氣物品入場？我偏要帶，仲要寫大字報鬧你！開波前，原本空空如也既看台前圍欄突然有人掛上幾塊白色既布，每塊大布上有一個英文字，夾埋就係 Scheiss SFV。 原來佢地淨係掛到 Scheiss S 時候，好多人以為佢地會掛 Scheiss SVE。但我地話：呢件事永遠唔會發生囉，佢地一定唔會浪費人力物力係鄉下隊既身上。 亦都有好多人唔知 SFV 係乜…. 好多人唔知佢地同 SFV 有咩事。
掛好大字報後，佢地就開始唱歌鬧 SFV, DFB 之類，我地都跟埋一齊唱。 今場波係下半場大家最有動力打氣既一場波，對我黎講係全季唯一一場真係想出力去打氣既一場波。開季原本嬲緊隊波同中國比賽，下半季佢地越踢越差，大家都無心機。原先諗住會整個大 Choreo，後來都係造旗海就算。
開波前，盃賽主要贊助商有個小型表演宣傳下自己，就係搵三條友帶住贊助商 logo 空中跳降傘，好準確咁降落係球場中圈！睇完表演啲球員終於入場，呢個時候，四千幾五千個作客球迷一齊大叫 Saarbrücken…. 老實講，好震憾，真係會以為佢地先係主場，佢地今場波既氣勢可以同乙組丙組既球隊相比。不過我地唔會因為人少就認輸！
FCS 派左好多二線兵落場，為附加賽留力，所以完全睇唔出佢地係今季聯賽超班馬，但亦都唔代表 SVE 可以好輕易就贏到波。雙方既機會都唔多，有一球 FCS 半單力，睇住佢望實個龍門黎射，好在比我地既神龍 Lehmann 救出！！！！！今季佢救左好多球必入球，無左佢既話可以季尾要護級。 上半場中段， Julius Perstaller 一腳踩左落對方龍門塊面度搞到人也重傷要被換出場，後來官方消息指佢鼻骨同下巴骨裂，睇相見到佢塊面有勁明顯既鞋釘印！！！！ 呢一腳之後，兩隊波既球員都開始多左埋身碰撞，場邊既球迷亦都越黎越激動。
賽前睇左天氣預報話有機會 7 點左右開始落雨，半場時見到有黑雲從我地既背面出現，慢慢吞左個太陽。睇天氣雲圖見到有舊雨雲黎緊，但我地只會中個邊邊。
去到下半場，SVE 主動左好多，多左好多機會埋門。個天越黎越黑，仲開始有啲風，睇黎真係要落雨。 77 分鐘，對方有一下埋門踢中我地既龍門要被換出。唔知作客區前既禁區係咪風水唔好，一場波傷兩個龍門！無左 Lehmann 我地好驚會比對方一腳收死…… 去到 80 分鐘，主隊有一次攻勢入到禁區，係 Block C 面前有個 FCS 球員一野連人帶波踢跌左SVE 既 Kevin Koffi，球證直指十二碼！！！！！！！拿，我其實就睇到人地踢中個波既… 不過呢啲時候我就當然唔會出聲啦…………. 十二碼由 Perstaller 操刀，射入左下角！！！！！！人地個龍門其實捉到路….. 呢球波完全激死作客球迷，因為佢地覺得 Perstaller 踢中佢地龍門既時候應該要被罰紅牌離場。
正所謂領先一球先最危險，呢個時候場內氣氛越黎越高漲。雖然話升班重要啲，但有冠軍邊個會唔想贏先？望住旁證慢慢準備拎燈牌出黎報補時幾多分鐘，內心就越黎越緊張。補時四分鐘，捱多四分鐘就可以完場。
頭先講果舊黑雲，只係落左兩滴雨，仲要真係只係一舊雲。去到補時既時候，我地頭頂慢慢變返藍天。呢一刻我真係好希望好運會降臨係我地身上… 補時就黎完，我地可以話控制住成個局勢，只有我地係度攻。
只要捱多一陣，我地就會成為莎蘭盃冠軍。 點知對手搶到個波，向住作客區方向攻。無啦啦有兩個球員訓低左，然後作客區既球迷超激動，仲有客隊後備席既人全部都衝哂出黎。 佢地認為係十二碼，但球證話唔係，只判角球。
作客球迷嬲得濟係咁踢看台前既圍欄，點知一腳踢開左道閘！！！！！！！哈哈哈哈，佢地自己都嚇親，但可以肯定佢地無諗住要衝落場。雖然佢地無諗住衝落場，但佢地中意同啲保安鬥氣。當啲保安想去關返道閘既時候，佢地又踢返開，係咁踢閘。（事後啲傳媒又係度炒作想話暴徒想衝落球場搞事之類）最後連警察都衝埋落場。而家係咪興警察落場？上星期漢堡放下黑煙又衝，而家度閘開左又衝。 球證吹停左場波，然後拉埋旁證走左入更衣室。 FCS 球員都跟埋入去。
過左大約十分鐘，完全唔知到底發生咩事既我地只係想快啲完場。 FCS 既球員出黎，走左去禁區搶個波，然後放係 12 碼點上。 我地繼續一頭問號之時，對面啲球迷就係咁歡呼，明明頭先球證話係龍門球。 球證出返黎，真係比返十二碼。 後來睇返新聞先知，球證係問完旁證之後先決定比十二碼。
好啦………. 即係要準備加時啦。 即係又要驚多最少半個鐘啦。 點知，FCS 竟然射中右柱唔入！！！！！！！！！！！！呢一刻 Block C 既球迷不斷大叫，衝哂去圍欄前面，所有人都完全不能相信眼前見到既事，然後不斷大叫：吹雞啦仆街！
我地有幾個後生仔爬左上圍欄慶祝，旁邊有個中年男人都跟住爬，但佢係腳震手震咁上到欄頂，捉實個網好似唔夠力咁。我勁驚佢會撻落地….. 係我驚緊既同時，個球證終於吹雞完場！！！！我地成為莎蘭盃冠軍！！！！！！！ 有幾條友未吹雞完場就已經爬左出去場邊，一完場後，有人就打開道閘比大家出去草地。
我仲諗住影下啲人衝落場既時候，見到岩岩爬上圍欄既阿叔已經落返地，但一地都係血 !!!@@@@@@@ 聽人講，佢跳返落地既時候，比圍欄個頂既尖尖勾到個口，所以係咁爆血，我睇住佢係咁吐血，我想搵身邊既人幫手，但做消防急救果啲朋友個個已經衝哂落場。後來個阿叔都即刻衝左上去搵急救…. 超恐怖勁驚佢會失血過多….
上年贏聯賽冠軍後我地無走落球場，今年就跟埋一齊落草地～ 同朋友影下相，同個盃影下相，一齊期待下季德國盃會抽中邊隊波。見到有幾位轉左會去較高組別既球員都有返黎睇呢場波！
過去曾經抽中 FC Augsburg, SC Freiburg 之類… 反正都係第一圈要出局，希望可以抽中啲有好球迷既球隊比我地見識下！