12.05.2018
德國西南地區聯賽 第 38 週
SV Elversberg - TuS Koblenz
Stadion an der Kaiserlinde
賽果： 0:4 (0:1)
入場人數： 1107 人 （約 350 名作客球迷）
更多相片

自從五年前 Elversberg 以聯賽第二名進入升班附加賽，最後成功升班再降班後，呢幾年可以話都一直保持水準係榜首爭升班。過去兩年更加成為莎蘭一哥，越黎越多人入場睇波，球隊成績好當然係好事，但球迷硬係有種唔識形容既壓力。做左鄉下球隊咁多年，年年都無咩好爭，突然之間場場都要關心其他球隊踢成點，我地要贏幾多場，人地要失幾多分，到底點樣先可以保住頭兩名然後季尾進入附加賽。然後終於入到附加賽啦，點知兩場定生死，辛苦左一整年都無得升班。

上季季尾升班失敗，今季開始大家當然都抱住繼續挑戰既心態。點知季初唔係和就輸波，場上既表現完全無說服力，兩三個月就已經知道可以唔洗再睇實個積分榜，心知今季係時候要回到現實，我地唔係咩傳統強隊。

明明記得失左好多無謂既分，但又唔知點解最後都可以排第五。望下榜首既 Saarbrücken，今季用左超多錢去買球員誓要升班既勢，同第二名相差十分，同排第五既我地相差差唔多三十分。 人地財雄勢大，我地唔敢同人比啦。不過之前幾場波我都講過，今季大家都好似鬆一口氣咁。 緊張左幾年，今季唔洗再日夜睇住聯賽榜計數，好好享受週末同朋友入球場既時間。

無可否認，無野好爭令到大家都無咩心機打氣，所以今季我地連大旗都無帶入場，只有係看台前掛起橫額，然後有心情先唱下歌。不過「無野好爭」呢樣野，對我地今日既隊手黎講係好奢侈既一件事。

客隊 Tus Koblenz 賽前只排第 15 分。 今季西南地區既第 15 同第 16 位有可能連同榜尾三隊波一齊降班，佢地留唔留到班就要睇 Saarbrücken 同埋 Waldhof 升唔升到班啦。今場波佢地如果搶到 3 分的話就有機會可以脫離可能降班區域，但都要睇其他球隊表現如何。

佢地帶左超過 300 人入場打氣，從來未見過佢地會有咁多人黎作客囉！場內外仲有好多警察係度睇場，以妨佢地輸波要降班的話會搞事。 警察既呢手準備完全唔係無道理，班球迷入場後去看台前掛橫額，但全部都掛係欄杆入面。（正常要掛欄杆外面先比人睇到） 全部掛係欄杆內代表佢地一係就驚比人搶野，二係 plan 左會搞事，掛入面容易收旗走佬。 第一個可能就唔會發生啦，我地鄉下仔邊敢搞事先～第二個可能睇落機會太好多啦…

球員入場後佢地就開始唱歌，首先就黎個 Saarland Schweine，叫我地做莎蘭豬！ 我地即刻拍手多謝佢地一開始就先提起我地。 同埋睇到呢度既人唔係好介意比人叫豬…然後佢地就開始高歌為自己隊波打氣，今日對佢地最重要既係： Auswärtssieg，作客贏波。

SVE 過去兩場踢得順暢好多，以為今場對榜尾應該會幾輕鬆啦，但係去到上半場尾段就比對方趁完場前射入一球。下半場開波無耐，佢地射入第二球，然後我地仲有球員食紅牌被趕離場。 輸兩球未夠架，最後輸埋第三同第四球。

成場波，我地無咩點唱歌，反而想 Koblenz 贏波然後踢 Kassel 落去，因為我地唔想再坐四個鐘車去老遠睇波～～～～ 上場波我地有個球員受傷要休息三個月，今場波有人食紅牌，踢一場少一個係想點？聯賽完左但仲有莎蘭盃決賽架！ 球隊後來都收起重要球員廢事再出事，反正贏輸都無咩關係。

對方係球場另一邊射入第三球時，佢地既龍門係我地面前慶祝，仲凌空打關斗！！！我地即刻拍哂手掌～～～到佢地入第四球，我地即刻係咁叫佢 打關斗，打關斗，佢就和應我地既要求再打多次關斗，所以我地都一齊慶祝埋一份～ 完場後再叫佢黎多次，但佢話腰痛走左去！

佢地班球迷就好開心咁慶祝，開心到我地以為佢地贏左冠軍囉。 班球員走左去看台前面，比班球迷叫住咪走，要一齊唱一齊跳。但由於其他榜尾球隊都贏波，所以佢地係聯賽榜上既位置係不變。即係一定要有最少一隊波升班，佢地先可以唔洗降班。

但榜首果兩隊波都係佢地既死敵，即係佢地支持佢地贏波升班…. 所以真係唔明有乜原因可以令佢地咁開心慶祝 15 分鐘，最後仲拉哂旗係度大合照？？？？

佢有佢慶祝，我地就去小食亭拎免費啤酒黎總結今季聯賽。

下季賽事改制，聯賽冠軍將會可以直接升班。今季當用黎回氣，下季我地再一齊殺過！！！