09.05.2018
盧森堡盃 準決賽
Racing FC Union Luxembourg - FC Differdange 03
Stade Achille Hammerel
賽果：1:0 (0:0)
入場人數： 761 (約 400 名作客球迷）
更多相片

最近天氣超好，唔睇多幾場波真係對唔住自己。大約三星期前已經諗住去呢個球場，最後太懶所以無去。一星期後原來又 plan 左星期日去，點知賽程調動將場波調左去星期六，同我地科隆比利時之旅撞期，又去唔成。種種原因之下，最後變成週中去睇呢場盃賽。

可以話好好彩係去睇呢場盃賽，唔係去睇聯賽。有位好熟悉盧森堡足球既朋友話我地知， Racing 無咩球迷，唔洗諗住有咩氣氛。而過去主場賽事，通常都係得百零二百人入場。但今場盃賽有超過七百人入場不突只，仲有唔少球迷入場打氣！！！

主隊既球迷有 90％ 都係球隊既青年軍，球隊應該召集哂所有同隊波相關既人入場助陣。每個小朋友手上都有枝氣笛，成場波佢地係咁 呠呠 哂超嘈，如果佢地唔係小朋友既話我一定走去踢佢地。你話如果係有節奏地呠都算，但小朋友係瘋狂咁呠，係又呠唔係又呠！！！！

Racing FC Union Luxembour，見到個名咁長，即係佢地又係由某幾隊球隊合併而成，以為係 Racing FC + Union Luxembourg 咁簡單啦，但原來佢地有好復雜既合併史。 最近期既一次合併係由 Spora、Union Luxembourg 同 CS Alliance 01 合併。

而 Spora 係 1920 年代由 Sporting Club Luxembourg 同 Racing Club Luxembourg 而成；另外兩隊分別都係 1925 年同 2001 年由其他球隊合併而成，名就唔打出黎啦，反正我都唔識讀。

呢幾隊波都贏過唔少聯賽及盃賽冠軍，由呢六隊波加埋合併成為 RFCUL 之然，佢地就贏過 28 次聯賽冠軍，而盃賽就贏過 22 次，超屈機。 佢地近年既成績只係一般，最大既目標就係出戰歐洲賽，現時聯賽排第六，而今場波既對手 Differdange 就高佢地一位，佢地都要靠贏盃賽黎爭歐霸外圍賽席位。

Stade Achille Hammerel 為於盧森堡市中心，即係我地要預早啲時間塞車塞入城。每次去盧森堡都覺得好似係香港，對比起佢附近既國家黎講真係好細，路唔多但車超多，每次經過市中心都一定要塞車。 盧森堡近年人口急增，政府都好急咁將基建升級，好多地方都變成地盤。

係球場附近搵到位泊車後，我地就去售票處比 10€ 買飛入場，先去小食亭買野食醫肚，再係主看台附近搵個靚位睇波。好多人都係著住 Differdange 既衫，全場應該真係得 Racing 既青訓球員係支持主隊。 不過主看台前都有幾位睇落比較似 Ultras 既年輕人。 客隊 Differdange 既 Iron Sons 就一路都無出現，我地估佢地全部都在場，組織橫額都有帶黎但無掛起，可能佢地唔夠人在場？

比賽期間除左睇波，仲可以睇飛機。每隔大約十至十五分鐘就有飛機要降落到盧森堡機場，如果東涌有球場的話情況應該會差唔多。

場上兩邊都無咩攻勢，上半場控球權係客隊度，但永遠去到前面就斷䌫。呢場波大部份人都睇好 Differdange 殺入決賽，因為 Racing 自 05 年最後一次合併後都未入過決賽，但奇蹟偏偏就發生係佢地身上。 下半場中段，Racing 憑住禁區外罰球，射入全場唯一一個入球。全個球場得主看台既一小部份人尖叫慶祝，亦即係代表其他人都係黎支持客隊… 落後一球既 Differdange 終於開始醒神啲，但最後十分鐘先開始發力已經太遲。

完場前兩分鐘，主隊既球隊已經走哂去球場邊準備慶祝。 比賽期間有人係我旁邊掉一個袋入場，有主隊既人接應，我估袋入面裝住 pyro… （入場時有保安檢查，所以佢地應該帶唔到入場） 佢地既球迷等唔切，未完場就放煙花，不過得幾枝，睇佢地慶祝睇左一陣我地都離場，完全無野好睇。