28.04.2018 德國丙組聯賽 第 36 週 SC Fortuna Köln - FC Hansa Rostock Südstadion 賽果：0:0 入場人數： 3598 人（約 1212 名作客球迷） 更多相片
上次好似講過話唔想再去科隆，點知講講下又走左去科隆睇波！ 早兩個星期我地已經睇中左呢個週末 SVE 星期五晚比賽後，星期六日可以去邊都得，見到去完科隆可以去比利時睇季後賽，咁岩又有朋友想一齊去睇。
科隆有三大球會，一係而家仲係德甲既 1.FC Köln，二係德丙既 Fortuna Köln，第三隊就係踢緊西部地區聯賽既 Viktoria Köln。Fortuna Köln 既 Südstadion 顧名思義就係為位科隆市既南部，由 Köln Süd 火車站行大約十分鐘就可以到達。不過我地當日係渣車去，係球場附近有個免費停車場可以泊車。
去到正門先去售票處買飛，企位看台 14€，座位要 25€，不過買企位就唔會見到主場球迷，因為佢地係企係同一個看台，但唔會想比 25€ 去睇德丙囉。好在我地今場波最主要係想黎睇 Hansa Rostock，所以睇唔到 Fortuna 都無所謂啦 ._.
我地行去最近作客區既地方搵位睇波，途中會經過主場球迷組織既區域。無錯，主隊既打氣區為於看台正中，望住球場中線既一小區域。成場波幾乎聽唔到佢地既打氣聲… 唔係話佢地人少聲細，而係佢地既聲音方向淨係向住球場同埋座位看台，企旁邊遠少少就會聽唔到。加上我又矮，比啲高大德國人擋住哂，連睇都睇唔到，我有好努力想影幾張主場球迷既相，但真係影唔到…..
Hansa Rostock 為於德國既北部，由地球會會章架船就可以得知佢地既城市係一個港口。 球迷要搭最少七個鐘車先可以黎到科隆，路途遙遠但仍然有成千人黎到德國西部為自己隊波打氣！我地入場時就已經見到大部份既作客球迷都差唔多入哂場，欄杆上亦都已經掛滿哂大大小小既橫額，當中仲有一塊超迷你既東德旗。來自東德既球隊同球迷真係好與別不同… 佢地果程團結程度真係另一個 Level!
大部份來自東德既球隊（同埋球迷）對比其他地方既球隊黎講都比較激進，但激進得黎又有唔同既性格。例如 Magdeburg 球迷好自大成日自稱世界第一；St Pauli 就政治取態好明顯等等。仲有係德國既大部份球隊都有同其他球隊結盟，例如 Dynamo Dresden 同 FSV Zwickau 就有超緊密既關係。 不過 Rostock 就一個朋友都無，因為佢地當所有球隊都係佢地最大既敵人。
開波後，作客球迷就開始唱下歌，淨係唱下 Schalala Hansa Rostock 都已經唱左最少十分鐘。然後佢地就開始叫 Scheiße Scheiße St Pauli….. 唱唱下就變左 Scheiße HSV，然後就到 FC Köln、Magdeburg、Polizei、DFB… 我地看台內既人都係咁笑。
佢地唱完之後就舉起兩塊大字報，第一塊係 Relegation Abschaffen，呢句野好舊啦，要求取消升降班附加賽嘛。咦，但佢地今季升降班都唔關佢地事啦，係聯賽榜中遊好安全呀。睇埋第二句，大家即刻大笑左出黎：Verlierer müssen absteigen，輸家就要降班！ 哈哈哈哈，佢地既仇人聖保利係德乙既下游掙扎緊護級，有段時間仲跌左落尾三既降班附加賽區域。 Rostock 「要求」取消升降班附加賽，咁聖保利先可以直接降班同佢地係德丙會面！ 最後佢地再舉起多一塊橫額，Scheiss Sankt Pauli，然後又開始唱下歌。
賽事去到 30 分鐘，場上同看台上都好地地，作客球迷唱得越黎越興起，我以為佢地好快就會唱我好中意既一首歌 （以我所知得 Rostock 同 Union Berlin 球迷會唱）。突然間，一大班既作客球迷離開看台，向住球場出口走去。由於主場區同作客區中間掛起左一大塊布用黎阻擋主客球迷既線視以防大家眼超超然後起衝突，所以我地都唔係好睇到咩事。 但打聽到係 Rostock 有一班被罰球場禁令既球迷係球場外，但有一大班警察走左過黎趕佢地走，後來變成小型衝突，場內既球迷一收到風就即刻想衝出去幫拖。 後來我地見到有幾個人跑返入黎，掩住雙眼衝去廁所。唔洗問班仆街警察又對球迷噴胡椒啦！！！！！！
上半場無聲無色咁完左，大家都好想知到底作客區發生咩事。 下半場，我地旁邊黎左一班著住粉紅色衫既荷蘭人，佢地係咁係度叫 “Föörtüna Kööhln”，唔知佢地 up 乜但好好笑。 作客區既球迷走返入看台，但佢地收起所有掛係看台前既 banner… 唔再打氣。 唔係得班企係正中間既球迷組織收旗喎，係所有既 banner 都收起哂，有人甚至離場連波都唔睇！（通常點都會有幾條友會話你要收 banner 靜坐唔關佢事架嘛，但 Rostock 無人咁做）
我地就好唔開心咁睇返波………… 我地黎係想睇 Rostock 球迷，點知佢地唱左 30 分鐘就收皮……… 不過呢，佢地班友始終流住要打氣唱歌既血。雖然佢地一大班人走左去角落頭度坐，但唔知佢地係咪太悶，無啦啦發起人浪。一開始淨係得作客區係度玩人浪，最後傳下傳下傳到成個球場都一齊玩，中間隔開一大個吉既看台都可以成功玩左兩個圈！！！！ 班作客球迷心就開始恥笑主場球迷唱：每個科隆人都係仆街仔～～～～
佢地原先應該仲有大字報，但因為佢地唔想再打氣所以就將塊大字報圈埋一舊綁係看台前。班友悶得濟就將佢點火，看台前就突然出現一個火球，跌落地後越燒越勁。作客區前明明有幾個滅火筒，但啲保安勁不知所措咁，最後由一個阿叔保安走到看台前滅火，一大陣白煙帽出 （但佢咁樣向住個看台噴其實勁危險囉）， Rostock 球迷就好開心咁慶祝。 過左幾秒，團火死灰復燃！！！！就連主場看台呢面既人都一齊大叫 FEUER!!!!!!!!! 火燭呀！！！！！哈哈哈哈。 作客球迷開始唱歌召喚頭先果位滅火英雄過黎滅火。 滅火筒既德文係 der Feuerlöscher，佢地就叫個人做 Feuerlöschermann，係咁唱歌歌頌佢。
團火直正被救熄後，佢地又搵野黎燒等佢地可以再次呼喚滅火英雄。今次連電視台都飛奔過去看台前等住影呢位保安既英姿。 下半場同樣係無聲無色咁完左，完場後，作客球迷一齊係咁唱 Feuerlöschermann 想佢走到看台前接受球迷既致謝。
呢個時候，Hansa Rostock 既球員一如以往賽後走到自己既球迷前鼓掌多謝佢地山長水遠黎睇波，但佢地比個阿叔搶哂風頭，比自己既球迷完完全全咁無視左。佢地以為自己既球迷為自己鼓掌，但其實佢地拍緊手叫滅火英雄過去….. 😀 😀
離場後，場外有好多警車響哂警號飛去作客區，連直升機都出動埋… 不過今次我地無去食花生，拿拿聲上車出發去比利時睇下一場波！