24.04.2018
德國西南地區聯賽 第 27 週
SV Elversberg - TSV Steinbach
Waldstadion an der Kaiserlinde
賽果： 1:1 (0:0)
入場人數： 579 （ 4 名作客球迷）
更多相片

星期二中午行完山就要去 Elversberg 睇聯賽補賽對 Steinbach，呢場波因為二月落大雪所以要延期。我地大約賽前半個鐘到達球場，今次佢唔比我拎住場外買既薯條入場，咁我就唯有企係出面食哂先啦。

入場後我自己企左係角落睇波，呢個位可以望住太陽落山好靚，唔捨得走。 開波後，主場球迷唱左大約二十分鐘歌，唱唱下就開始鬧領隊，”Roland Seitz, geh nach Haus” 叫佢快啲返歸！ 由於我企左係角落近 Block C2 既位置，所以聽到 C2 既拍哂手掌仲跟埋一齊唱。平時係人堆入面就唔會知其他地方發生咩事。

上半場超悶咁完場。 下半場又係 SVE 先射入領先，點知後來都係要比客隊借禁區外既罰球射入。 呢個時候大家就開始唱 Nur noch Unentschieden, NUR NOCH UNENTSCHIEDEN，諷刺隊波 2018 年踢左十二場波當中有八場都係和波。 就係咁，又係得一分。

完場後，我地就即刻飛奔去睇電視去睇歐聯準決賽，好好彩開波十幾分鐘後都未有入波。雖然我有跟開利物浦既新聞，但其實都已經有一段時間無睇過隊波，週末我通常都係球場，週中啲波咁岩都無時間，所以我印象中既利物浦仲係好屎波。唔知係咪因為岩岩睇完地區聯賽再睇利物浦，原來真係差咁多班，大家睇到嘩嘩聲，好似睇過人踢波咁._. 到佢地連入五球時，我完全唔知發生緊咩事…. 仲有啲心痛羅馬，覺得佢地好慘，點知最後失返兩粒 ^^ 真係心痛黎都多餘…..