21.04.2018
德國西南地區聯賽 第 35 週
FSV Frankfurt - SV Elversberg
Stadion am Bornheimer Hang
賽果： 1:1 (0:0)
入場人數： 1286 人 （35 名作客球迷）
更多相片

由於 SVE 今季成績麻麻，去到季尾好多人已經無人理，今場波既球迷巴士要去到比賽前一日先知夠唔夠人成團，最後有 16 個人一齊搭巴士… 當中大部份都係我地呢班後生仔 （好彩）

10 點半由 Elversberg 出發，大約 12 點半就到左 FSV Frankfurt 球場附近既停車場，落車後要行最少五分鐘先到達球場。剛入到 Frankfurt 時遇上大約 5 分鐘塞車，司機突然話「唔得啦，我要去廁所」，然後就衝左去廁所 😀 又真係係佢去完廁所出黎時啲車先開始郁返！！ 落車時，有大約十位警察迎接我地，佢地話會帶我地行去球場。 我地就跟住佢地行，諗住行去作客區既入口啦，行到一半佢地話行錯路，帶我地回頭行第二條路，但呢條路係去主場入口！！

佢地帶到我地去主場入口門口就話：「係呢度啦！」 我地問：「下，呢度主場入口黎架喎」 佢地話 我地帶左你黎球場啦，係呢度無錯架啦。 咁我地自己繼續圍住個球場行去另一邊，發現原來 FSV 為左慳錢所以無開到作客區 （開作客區就要請多啲保安去）。 是但啦，照入場，點知場內保安話呢個入口無飛賣，要我地去返正門既售票處買飛。

我地即刻又要不安多一次，我地二十個人都唔夠，拎住兩塊旗係人地門口度走黎走去，即刻令我地諗起上次作客 Ulm 既情景。 我地話：「我地而家得二十個人就可以咁樣走黎走去姐，如果下次人地有三架巴士黎咁佢地會點安排？」 旁邊既警察都笑住話 「我都想知」。

好啦，去到正門買飛，一張正價飛要 12€，學生 10€，大家條氣越黎越唔順。我地諗住等齊大家買哂飛先再一齊行返去「作客區」，呢個時候有位朋友打電話黎叫我地等埋佢先入去，佢自己渣車黎唔想自己一個經過人地門口，同埋佢話見到一大班 FSV 既球迷黎緊。 咁我地就企係人地門口係度等，門口有兩個 FSV 球迷組織既人睇住我地，其中一個就走埋黎問係咪想約戰打交。 我地話 唔係，我地而家係迷途小羔羊，作客區無開，所以我地先黎左正門。 講左兩句佢就行開左。

講左大約兩分鐘，佢又走過黎問 咁買完飛做乜仲唔走。 我地話 等緊一個朋友，佢話 OK. 再過多兩分鐘，頭先朋友係電話入面講既果班 FSV 球迷就黎到球場，問我地企係度做乜，「死返去作客區啦，呢度係你可以去既地方黎架咩？」 我地話：「得啦，等埋個朋友咪走囉」 班警察已經企左係我地兩班人既中間想隔開我地。 門口果兩個 FSV 球迷一開始見我地人多過佢，佢問左一兩句就行開左，而家見到佢地人多過我地就衝埋黎鬧我地。

其實我地唔想鬧交亦都唔想打交，一來我地知自己人少，二來我地真係好迷惘！！ 係大家手指指既時候，我地兩個就先立左兩塊旗鼠左入場先，呢個時候大旗先係最重要！ 大家入場後都仲係好不安，因為我地既「作客區」 無分隔… 其實警察都已經戒入左，我地又唔係好似啲大組織咁有一班人放打交而生存…. 想黎睇場波咋 ._.

入場後，班球員咁岩走出黎熱身，有幾個阿叔就衝到最前大聲話：「你地今日同我醒醒定定踢返場好波呀，我比左 12€入場架！！！！！！」 我就二話不說去買野食先，一路食一路睇住班主場球迷入場。

兩年前 FSV 仲踢緊乙組既時候我黎講呢個球場睇佢地對紐倫堡，當時成個作客區都係紅色，再加一班史浩克既球迷去幫手助陣。 原本以為今場可以企下個作客區，點知佢地又唔開！ 即使當時係乙組， FSV 都唔係有好多球迷入場，同埋佢地既球迷組織四分五裂，東一堆，西一堆咁。 隊波越踢越差搞到連續兩年都降班，佢地既球迷組織都開始企埋一齊打氣。

佢地係來自 Frankfurt 既球隊，但 Eintracht Frankfurt 既球迷唔比佢地自稱 “Frankfurt”，因為 Eintracht 先係呢個地市既話事人，所以 FSV 球迷打氣唱歌時只能以地區名 “Bornheim” 黎叫自己，如果唔係 Eintracht 就會日夜搵佢地搞事。 係，足球有時就係咁搞笑，有哂地盤有人話事～ 我地都成日中地雷 ._.

FSV 有三個主要球迷組織，但每個組織可能得十個人咁，佢地一齊企係正門入口看台既角落。開波前佢地係欄杆上掛起自己既組織橫額，係看台通道兩邊由低至高咁掛起兩大條藍黑色既大布，咁樣可以令個看台睇落細啲，同埋容易啲令大家聚埋一堆，然後比人睇落佢地人多啲同有氣勢啲。雖然佢地人少，但佢地都會唱足 90 分鐘！！

我地就原本因為場外既事無咩心情打氣，但唔知點解啲阿叔勁有動力，係咁叫我地快啲帶起唱歌。 咁我地就係開波後唱左一陣歌，我地人更少，但勝在有個上蓋有回音聽落大聲好多～～ 球隊早排宣佈左原本只係代任領隊既體育總監會正式接管球隊成為主領隊，呢個決定令好多球迷不滿，因為由佢接任開始，隊波就無贏過波，真係唔知同之前有咩分別！！！！ 所以大家越黎越無心機睇波，甚至係寧願輸波，咁先可以有機會踢走個領隊 >_>

呢場波只可以話係廢鬥廢，兩邊係咁交失波，好地地都可以將個波傳左比對方，把握力又低，某幾個球員又獨食。SVE 最後只失一球波全靠龍門，唔係佢既話一早比人大炒左啦。大家既希望放哂係五月尾既莎蘭盃決賽。

完場後，警察准架巴士駛入球場外條小路，等我地一出去就可以上車，唔洗再經過正門。 架車離開球場時，班主場球迷企係出口送我地走～多謝哂。 回程時係公路休息站遇上其他球隊既球迷，好在只係普通球迷唔係我地無啦啦又要惹事上身 -_- 返到去，即刻開火燒野食，好好咁享受埋個好天氣！！