18.04.2018 德國巴登盃準決賽 Karlsruher SC - SV Waldhof Mannheim Wildparkstadion 賽果：4:0 (1:0) 入場人數： 14264 （約 2900 名作客球迷） 更多相片
呢兩隊波既對決唔係成日都可以睇到，一隊踢丙組爭緊重回乙組，而另一隊就被困地區聯賽，要排除萬難先可以升到班。 KSC 同 SVW 對上一次同樣都係巴登盃 (Badischer Pokal) 相遇，但講緊既已經係五年前既事。 當時係 SVW 既主場上演，賽前賽後都有大大小小既衝突，令到今次賽會係保安方面做到滴水不漏去防止事件重演。
當中既安排包括 球場外既一公里以外會有禁樽同禁酒令，任何人都唔可以帶玻璃樽走近球場，而場內亦都只會賣無酒精啤酒。 作客球迷唔可以係 Karlsruhe 市內遊走，要乘坐警方安排既穿梭巴士來回火車站同球場。
巴登盃既準決賽過往都係四月頭就會上演，正如另一場準決賽賽事 Pforzheim 對 Espanol Karlsruhe 係兩星期完就已經踢左。 但由於 KSC – SVW 場波係高風險賽事，所以賽會要為佢地擇日比賽，可能佢地最後睇中左 Mannheim 既好朋友 Eintracht Frankfurt 係同日要去史浩克作客，即係 Frankfurt 唔會有人去幫 Mannheim 助陣，咁警方既壓力就無咁高。
賽前雙方既球迷組織都各自宣佈比賽日賽前既集體行動，首先係 KSC 號召球迷兩點鐘係城中心既城堡集合，然後一齊遊行到球場。而 SVW 球迷就叫球迷一齊著黑衫同搭下午 2點9 既火車到 Karlsruhe 火車站，可惜佢地到站後就被迫要配合警方既安排，所以賽前無機會搞任何 corteo。 同埋佢地好想入場睇波為自己隊波加油，所以賽前應該都唔會亂搞事搞到自己最後入唔到場。
我地一早出發，大約 1 點半係 Karlsruhe 市中心既大學停車場泊低架車，步行 15 分鐘左右，穿過城堡後面既公園就到達城堡。 當時已經有一大班球迷係城堡前既酒吧聚集。 我想話 德國而家最熱可以去到 27 度囉，仲要萬里無雲，啲樹又未開花，總之一離開室內就要係太陽底下曝曬！！！我地係草地上面坐左一陣想等佢地出發，但等等下開始唔想為左佢地曝曬，所以走左去火車站買枝啤酒等 SVW 球迷算，又諗諗下又覺得佢地實比警察睇到實，一定無咩好睇，不如早啲入球場算…..
咁就係市中心遊走左個幾鐘，後來得知我地都無 miss 左任何野。 今次同上次一樣，我地買左 Block E4 企位區，又平 （11€）又可以同時望到主客兩邊既球迷。 近作客區入口外面條路有數唔完既警車封路擋路，同時係入口既最少二十米外有鐵馬分隔開作客區，等主場球迷無辦法接近作客球迷。入場前既保安亦都超級嚴謹，搜身比人摸 pat pat 呢啲係基本，仲要打開手袋入面每一格比保安人員睇，過關後佢會綁一條帶係手袋上比其他工作人員識別呢個唔係偷運入黎既袋 ._.
入到球場，見到 KSC 準備左一個大型 Choreo，而客隊既球迷組織就仲未入場。 㨂左個靚位之後，我地就買左 KSC 球場內必食既豬扒包～～ 雖然無記憶中咁好食，但仍然無減我對 Schweinisteak-Club 既支持！！開波前 15 分鐘，球場開咪宣布話因為大部份球迷仍然未能夠入場，所以開波時間會延遲十分鐘，即係 5 點 40 分鐘會開波。 好在我地唔洗完場後趕火車，佢地中意幾時開波都得！！！
去到 5 點 20 分，作客區開始有一大堆黑衣人湧入場，真係好似熔岩咁一大 pat 黑色物體走到看台最前既位置。 第一時間就係佢地既 Capo 爬上欄杆，叫大家舉起手。全個作客區既人就舉起雙手一齊去叫佢地既口號，話比佢地既對手知 我地黎踩場啦！
由於 SVW 都係踢西南地區聯賽，所以平時佢地打氣既方式都已經見慣見熟，亦都知道佢地既 fan base 的確係好強大，但佢地今日既氣勢真係同平時差好遠，幾乎好似上星期睇 Magdeburg 咁，全個看台既人都一齊拍手一齊叫！！！果然係 Waldhof Mannheim ！
開波前， KSC 播出佢地既會歌，佢地既球迷就慢慢打開 choreo，首先就係上層既藍白巨型「頸巾」，到球員入場時，佢地就打開埋看台前既巨型橫額，寫住「 Köstliche, köstliche, wunderbare Angst..」，旁邊有一個著住黃色雨衣既小朋友背影，呢件雨衣背上印有 SVW 會章，然後有幾條友托住 (!) 一架紙船，由右邊飄到去左邊。 原來呢個 choreo 係以一套叫 It 既鬼片做題材，中文應該係叫 小丑回魂 （我唔睇戲，所以唔多熟，有錯亦請指正）。 戲入面有一個專係向小朋友落手既恐怖小丑，而最為人熟悉既一幕就係 有一個著住黃色雨衣既小朋友玩紙船時，架紙船突然之間被大雨沖走左，當個小朋友追住架船想執返佢既時候，突然有個拎住氣球既小丑出現將佢拐走… 從此，大家就活在恐慌之中，而大家既恐慌對小丑黎講係十分之美味可口…
好啦，講返個 Choreo，當架紙船飄到去左邊後，看台中間亦都拉起埋主角出黎，就係 KSC 恐怖小丑。就如 It 既內容一樣，恐怖小丑手上拎住氣球…. 話比佢地既死敵知，佢地會為 SVW 帶來恐懼，而 SVW 既恐懼就係佢地既糧食。看台隨即出現藍煙，然後佢地就折開 Choreo，球迷們同時亦都放開手上既往藍白氣球。 呢個可以話係我親眼見過最好睇既 Choreo，佢既設計、故事同埋上演方式真係完全無得彈！！！！真係好似睇下畫劇咁，真係看台如舞台！
同埋 SVW 球迷都好落力打氣，加上雙方太耐無見過大家，成場波都有超過一半既歌都係度鬧對方。唔係 Scheiß KSC 就係 Scheiß Mannheim。 好可惜主客看台都係同一邊，佢地根本就睇唔到對方！係作客區前面有超多防暴警察，好似話因應呢場波，場外場內有超過一千名警察，仲有兩部直升機係頭頂睇住佢地。
講返場波先，雖然我都無好認真睇，不過賽前有好多人有唔同睇法。 首先就係兩隊波會派一隊定二隊出戰，KSC 現時係丙組有機會爭升班，而丙組既頭四名會自動獲得來季德國盃首圈參賽資格，即係佢地唔需要靠贏巴登盃去搶德國盃個位，好大可能會派二隊出戰，留力聯賽搶分升班。 SVW 係地區聯賽同樣爭取緊進入升班附加賽，對佢地黎講升班重要過盃賽好多，可能會留力而唔去同 KSC 搏盡。
結果係，兩隊都派出一隊上陣，總之打比戰就唔可以輸！ KSC 上半場首先開齋，打開佢地大炒死敵既序幕。 SVW 球迷無帶佢地球迷組織既大橫額，但係就為呢場波特登整左條新既黑白橫額，大大隻字寫住 Waldhof Mannheim，下面就有一行字寫住要殺死所有敵人。比賽期間佢地舉起左幾塊大字報，走去鬧 KSC 球迷唔敢「應戰」 。 睇黎 SVW 球迷賽前想約對方打一場交，但對方因為「時間太夜」所以拒絕，所以 SVW 就寫左好多塊大字報鬧佢地龜縮無膽，睇得出佢地真係好嬲！！！
半場休息時，見到作客區有動作想搞事，我地即刻拎起相機準備。等到球證吹雞開波，佢地拉走塊藍黑大布，一大班人就開始放白色既煙，中間夾集好多響炮 嘭嘭聲！ KSC 即刻開咪「提示」返班球迷 嚴禁在場內放煙花 之類既野… 但你有你講，佢有佢放。 講到最後佢想話 「多謝合作」”Danke….” 既時候… 黎多幾下響炮，”….für nichts.” (Thanks for nothing!) ，即係 嘥9氣。
下半場主隊連入三球，只可以講 SVW 唔夠班，成場波完全無威脅，比人禁住黎攻，輸波只可以怪自己。完場後主場球迷當然好開心咁同球員慶祝啦，但作客球迷亦都無因為自己隊波踢得差所以唔再打氣。 作客區內既所有人等到球員走過去，拍手吶喊鼓勵完球員先慢慢離開。 當雙方球員都離開左球場後，被迫逗留場內既作客球迷就開始轉去主隊球迷度撩交打。
班 SVW 球迷首先就起火燒佢地偷返黎既 KSC 球衣好頸巾，然後全部人對住佢地既右邊唱歌。 對花生友黎講，好可惜佢地前面有超多防暴警察，同埋兩個看台中間都有好多保安。即使佢地真係想打交都唔會打得成….
睇左大約十五分鐘我地都離開，經過幾十架警車之後就返到自己架車向屋企出發。