14.04.2018
德國西南地區聯賽 第 34 週
SV Elversberg - FSV Mainz 05 II
Stadion an der Kaiserlinde
賽果： 0:0 (0:0)
入場人數： 679
更多相片

不知不覺，今季又慢慢地開始進入倒數。 計埋今場波，聯賽就只剩返六場波，四場係主場，兩場係作客。去到呢個階段，聯賽已經無咩好爭，去睇波就變到好似例行公事咁。

今場波既對手仲要只係德甲球隊既二隊， 佢地既球迷一早宣佈左會杯葛黎緊星期一對 SC Freiburg 既德甲賽事，曾經一度諗住可能佢地覺得無聊所以會走黎 Elversberg 睇波，但佢地後來宣佈同 SCF 既球迷組織係舊主場 Bruchwegstadion 搞場友誼場，將星期六既精力發洩係呢場上。即係今場波唔會有任何作客球迷啦……

星期五係 Wiesbaden 變左落湯雞，無諗過星期六既莎蘭天氣會咁好～ 藍天白雲，仲要只係得 17 度，完全係睇波絕佳既天氣，可以淨係著住 T-shirt 就出得門口！ 我地賽前一個鐘到達球場，好多朋友都已經在場，但除左佢地之外，成個 Block C 都無人。 去到開波時間，人係多左，但一睇就知好多人見 SVE 今季成績一般就不了，最後只有唔夠 700 人入場。 對比起過去兩季黎講，呢個當然係一個令人相當失望既數字，但有人同時都講起，當球隊係五年前係主場第一次踢升班附加賽時，看台上只有十個人打氣，由一隊 wfc 既鄉下隊去到而家無野好爭既時候都有幾百人入場，已經係一個好大既進步！

上季有一位球迷係某場賽事激動得濟向場內掉打火機掉中左旁證，後來被罰兩年球場禁制令。 今場波突然有一把熟悉既聲音係後面傳黎，原來佢被罰一年唔准入場，第二年就只係緩刑，所以呢場波係一年來既第一場波！ 未開波佢已經醉左，好開心咁係後面係咁唱歌！

開波後，大家唱左幾首歌就開始靜落黎，然後開始圍來傾下計咁，我地又分享下早一晚睇 Magdeburg 既事。 場波發生咩事？ 我都想問到底睇緊啲乜。 完全無組織，無策略，完全唔覺得任何一方想贏呢場波。 半場未完我地就走左去買野食，球證吹雞完半場後，個個都坐低曬太陽，去到下半場開波都無人有意欲想起返身，就係咁大家坐到去完場前一分鐘。

接近完場時， SVE 有個攻勢向住 Block C 進發，然後 Mainz 有個球員撞跌 SVE 球員，仲要追住我地既球員黎鬧，突然之間個個秒速企哂起身衝落去勁好火咁鬧個球員，個細細粒既女球證想走埋去分開啲球員，但比啲球員一個心口撞飛左，要個旁證幫手先可以調停… 成場波就係得呢一分鐘最有氣氛。