13.04.2018 德國丙組聯賽 第 34 週 SV Wehen Wiesbaden - 1.FC Magdeburg Brita-Arena 賽果： 1:2 (0:0) 入場人數： 6720（2500 名作客球迷） 更多相片
兩年前去多哈睇完香港作客之後去左德國過復活節，大約十日既行程睇左七場波，其中一場係去到 Magdeburg 主場。去睇呢場波之前，我已經係 YouTube 睇過好多同佢地有關既打氣片，一直都超期待去現場見佢班球迷，果然聞名不如見面，佢地場內既二萬幾個球迷都會一齊打氣，真係好震撼。自此，我就變成 Magdeburg 球迷既迷。佢地隊波有咩球員我完全唔知，但我好想隊波可以有好表現去回報呢班咁支持佢地既球迷！
Magdeburg 位於德國東部，我地要再去睇佢地主場唔係易事… 而丙組大部份既球隊同我地隔幾十座山，想去睇佢地作客同樣唔容易，所以過去兩年我都無再睇過任何丙組賽事（加上 SVE 上季升班失敗，唔係好想睇丙組諗起啲傷心事）。 今季佢地踢得好好，長期處於聯賽上遊，去到季尾贏完一場又一場，而家企穩係直接升班區，好大好大機會可以升上德乙。
今場波係星期五晚開波，迎接 FCM 既係 SV Wehen Wiesbaden… 一隊無咩好講既球隊。 2007 年之前佢地一直都只係叫 SV Wehen Taunnusstein，同 Wiesbaden 完全無關。去到 07 年佢地歷史性升班上當時既乙組，不過佢地個鄉村球場 Stadion am Halberg 唔符合德乙要求，最後選擇左同 Wiesbaden 合併，，就係咁成立左 SV Wehen Wiesbaden。
由確定升班後，佢地搵到公司用四個月係 Wiesbaden 既火車站附近起左個過到足總果關就算既鐵皮 Brita-Arena 用黎踢乙組，現時佢地一直搵緊方法去將球場升級，因為 DFL 對球場既規格越黎越高，包括容納人數、保安同攝影機擺放位置等等，所以市政府同時亦都搵緊塊地起一個正式既新球場，準備將來若果能夠再次升上乙組時可以即時有球場用。SVW 都有一班年輕球迷組成既球迷組織，可惜佢地唔係呢場波既主角。係，佢地而家排係第三位有份爭升班，但更多人關注既係 FCM 搶唔搶到三分拋離第三位，然後可以直接升班！！
我地兩點出發，預大約兩個鐘車程去到 Wiesbaden。火車站旁邊有個大型露天停車場，比 €4 就可以泊足一日，諗住四點到達可以係市中心行一陣先再去球場。 點知四點幾去到 Wiesbaden 時落緊起大雨…. 我地泊車後係車內食下零食，玩陣電話，去商場入面兜左個圈就提早行去球場。 由火車站行去球場十分鐘都唔洗，一條直路就到。
球場外仲係一塊爛地，落雨搞到塊地變成泥氹。我地坐係作客分隔區旁邊既第一行，睇波睇球迷都一流，但係間唔中一兩陣風吹埋黎就會有雨粉吹埋黎。 後來我旁邊黎左一對情侶，一坐低佢地就想開遮擋雨，心諗 乜料呀睇香港波咩而家，係我想開口叫佢收遮既時候，佢後面既霸氣阿叔快我一秒鬧佢咪阻住佢睇波！
未開波前，賽會已經公布左售出門票已經破左紀錄。SVW 主場平均入場人數大約二千幾人，但呢場波淨係作客波飛都已經賣左二千五百張。 平時佢地既作客區只會劃一小區，今場佢地成個龍門後面，再加埋西看台最近作客區既一小部份都畫左比 FCM…. 我地好早入左場就一路睇兩邊球迷係度佈置佢地既看台。 主場球迷好早就搞掂好哂，球迷組織既人已經入部企哂係看台等開波。
作客球迷亦都陸續入場，好多人都帶住自己既小橫額拎去看台前掛起。 佢地會由最側邊開始掛起，因為班球迷知道 看台正中間既靚位係要留返比班「大佬」，呢個係對球迷組織既一個尊重。 不過，FCM 同好多其他球隊唔同既係，佢地無一個特定球迷組織，佢地去到邊都只有 BLOCK U 一塊大橫額，亦都唔似其他球迷組織咁會係看台上揮動大旗。 Block U 就係佢地主場所屬既看台區域，所有 Block U 內既球迷都係一體，以球隊同埋城市為中心，球隊係邊，Block U 就係邊。
呢塊藍白 Block U 橫額，我地等左好耐都等唔到。去到開波前五分鐘，球員要準備出場時都仲未出現。我地就越黎越擔心佢地係咪塞車要遲大到，定係佢地有計劃地遲到，等佢地可以借混亂偷運啲野入球場呢？ 開波後，Block U 依然無出現。 主場球迷就開始揮旗起鼓打氣，都好，起碼有啲時間可以關注下佢地。
雖然 Block U 既大佬未到，其他在場既 FCM 球迷就自己開始舉起頸巾唱自己球隊既會歌，然後一齊叫 MAGDEBURG，然後叫 Auswärtssieg （作客贏波）！佢地要好似英國人打氣咁，靠某幾個人係人群中帶頭唱歌，然後慢慢傳開去一齊大聲唱。無 Capo 帶頭既問題就係會有二重奏既出現，不過佢地都已經好好好好大聲！十分鐘後，班作客球迷突然起哄歡呼，然後大叫 「Hurra Hurra, die Trommel die ist da」（個鼓終於到場啦！！！！） 班遲到既 Ultras 綁好個鼓後就即刻起鼓。所有作客球迷即刻舉起雙手，跟住節奏拍手，然後大叫 FUSSBALLCLUB MAGDEBURG! 呢一個節奏係每場波開波同完場時，佢地必定會做既動作。
呢個時候，我就要深呼吸一大啖氣，然後話 就係呢種起雞皮既感覺啦… 係佢地開始打氣後真係大部份時間都唔記得左睇波，一路望住作客區睇佢地打氣。 呢一份團結力量唔係可以係好多隊波可以搵到。好多人都認同佢地係德國現時最有質素、最賣力既球迷。
（之前應該講過，但唔怕講多次）如果你有睇開足球短片既話，應該睇過有條片係有班友係龍門後面拎住箭咀走黎走去，等自己既球員可以瞄準啲。 呢班球迷正正就係 Magdeburg 球迷。 六年前既佢地，Block U 只有幾十個球迷，而家佢地既看台場場爆滿，班球迷去到天涯海角都要跟埋去。 剛過去既冬天，FCM 想去英國集訓一星期，點知有成千個球迷都話要跟埋去，嚇到英國警方要求 FCM 取消集訓，最後只可以同保頓踢一場友誼賽，而最後依然有近二千位球迷去到英國幫自己球隊係呢場友誼賽打氣。
上半場我真係無法專心睇波，眼睛好難離開我等左兩年先再見到既 Block U…. 半場休息時，球場內有啲場內活動比球迷參與，其中一個就係落場打 FIFA。 佢地用場內大電視去直播佢地場 FIFA… 佢地既 announcer 係一個女人，把聲勁高音咁轟入耳朵入面 ._. 好掛住果啲講野勁重口音既阿伯……
下半場我地專心睇波多啲，兩隊波都要搶分爭直接升班位置，FCM 落力左好多去推個波上前搵機會。 54 分鐘 FCM 終於成功係自己班球迷面前開齋入波！！！！！班作客球迷好開心咁慶祝，然後佢地開始唱我最中意既 Vorwärts Magdeburger Jungs…. 呢首歌幾乎每隊波既球迷都會唱，但 FCM 既版本一定無得輸。 佢地通常會將看台分開兩半，然後大家輪流唱一次，中間會加插唔同動作，例如拍手，fing 頸巾等等。 有時佢地心情再靚啲就係主場會三個看台一齊輪流唱。 佢地仲有好多打氣歌都係要親身睇先感受到有幾震撼….
70 分鐘佢地拉開到 2:0，我都忍唔住高呼慶祝，同時見到作客看台有好多啤酒杯飛左上天。一分鐘後比 SVW 追返一粒，然後佢地既龍門又黎個靚救。球場女人開咪大叫守門員個名，然後開始唱歌叫人為 SVW 企起身打氣，個個都問佢到底想點…
好在作客球迷越唱越大聲， 佢地同一首歌可以唱最少五分鐘，而最後十五分鐘佢地都係唱緊同一歌去叫自己隊波頂住。 唔知球證係咪都比佢地既歌聲感動左，尾段係咁偏幫客隊，我後面有幾個主場球迷都係咁鬧爆球證。
完場後，FCM 球員一枝箭咁割草式飛去作客看台同球迷慶祝，同大家唱左一陣歌之後就黎個 FUSSBALLCLUB MAGDEBURG 吶喊 ，由球員帶頭舉起雙臂，然後球迷起鼓帶節奏。
然後球員就慢慢走入更衣室，但大部份球迷係場內繼續唱歌。 仲係咁唱 「我想見我隊波」 想呼喚班球員出黎。 我地逗留左大約半個鐘都離開了。 係場外仍然聽到佢地係度唱歌… 去到火車站食少少野就行返去停車場諗住返屋企。我地架車附近有超多黑衣人…….. 估唔到咁好彩 Block U 班大佬泊左係我地架車隔離。 起碼有百幾二百人，有超多架九人車。
我地要穿過佢地行去自己架車，佢地當然即刻碌大對眼望實我地想做乜啦。 由完場後到我地返到自己架車已經花左總共一個鐘時間，估唔到佢地仲未起程返去。亦都估唔到佢地會泊左係我地附近。佢地啲車泊左係我地後面塞住左走唔到，等左十五分鐘唔想再等，落車問佢地可唔可以駛走架車比我地走。其實唔洗問都知佢地實話唔得，如果有人叫我地一大班借過我地都唔會借囉。 佢地話 「下 無位移架車喎，我移開左既話要兜個大圈先返到入黎」。 咁我地只可以話 哦…… 咁唔緊要啦….. 然後龜縮上返車。
上返車鬧爆佢地阻住地球轉時，有條友無啦啦拉開我地車門話：「不過其實你都仲夠位出到去既，我地可以幫你睇位，最尾有條路可以去出口。」 我地就好似大佬咁有一大班人幫我地睇位度位，同時見到好多人望住我地個車牌…… 睇開波既人一睇就會知車牌號碼係同足球有關，所以我地諗住扮遊客條橋係唔會work…. 果然有人敲窗口想同我地傾幾句，問我地邊度黎，最後問我地到底支持邊隊，幾大都話 FCM… （拿，我無講大話架，今場波真係支持 FCM) 但其實我更加想答既係 我突登黎睇你地架 😛
傾左一陣，停車場外突然有好多警車黎到，佢地即刻一秒散水 -.- 搞咁多野最後原來等多五分鐘我地就輕鬆離開。 啲人上網睇 youtube 就以為一定要永遠火爆暴力視所有人係敵人先係 ultras ，其實更多既係會互相尊重，呢啲係上網唔會見到架。
Magdeburg 踢埋呢場連埋補賽總共仲有五場，而佢地已經拋離第三位 8 分！ 今個週中補賽如果贏到既話就會有 11 分…. 如果佢地保持水準踢埋餘下幾場波的話，升班德乙應該唔會有問題啦！！！