06.04.2018
德國西南地區聯賽 第 33 週
Stuttgarter Kickers - SV Elversberg
Waldau-Stadion
賽果：1:1 (1:1)
入場人數：  2530 （ 33 名作客球迷）
更多相片

今季有一大半時間都係香港過，雖然中間隔左個歇冬期，但最後好似都唔係睇左好多場西南地區聯賽波。今次由香港返黎得返七場波，當中得返三場係作客波，呢場作客 Stuttgarter Kickers (Stuckies) 係今季最後一場遠程作客啦。 由 Elversberg 搭巴士出發，計埋塞車要差唔多四個鐘先可以到 Stuttgart。

呢場波仲要係星期五夜晚七點開波，即係我地架巴士三點就要出發。 唔係個個都好似我地咁得閒無野做可以星期五一早就得閒，最後叫有 21 個球迷一齊搭巴士去作客，再加幾個球迷自己飛車去。

返左香港果三個星期日日都風和日麗，而同時德國係落緊雪天氣勁差咁，完全唔想返去。到我地星期三晚落機時落超大雨，大風大雨到機場有消防車候命 ._. 星期四一朝早仍然落緊雨，但係去到星期五，啲雲突然唔見哂，氣溫仲上升到 18 度！！ 係呢四個鐘車程入面我地一舊雲都見唔到，全程係架車入面焗曬！仲有 Jetlag 既我地係陽光下好安樂咁訓左個晏覺。

開波前半個鐘我地就到達球場，作客區內有幾個我地唔識既後生仔，後來先知佢地來自慕尼黑，但無細問點解走黎作客區，因為佢地間唔中會幫下手打氣，算係半個朋友啦～ 連埋佢地，作客區入面有 33 個作客球迷！超感動，無諗過星期五晚都有咁多人 T_T

近呢一兩個月，SVE 球會內部發生左好多事。 就係我地出發去香港前，球會炒左季初先黎報到既領隊 Neitzel。雖然今季的確係踢得麻麻，但球迷們其實都仲係好滿意 Neitzel 既表現。 對比起 Neitzel，球迷更加不滿既係體育總監 Roland Seitz，無人知佢黎到球隊差唔多四年到底為隊波貢獻過啲乜。 好啦，佢而家做左代任領隊，隊波咪一樣係咁屎，對啲榜尾球隊唔係輸波就和波。

Stuckies 現時要爭分護級，雖然係榜下遊位置，但我地完全唔覺得自己隊波會係比賽中有啲優勢。果然，開波後要同對面拉鋸，最後都係比對方先開齋領先，去到完半場前 SVE 先追和。

上季黎到 Waldau 球場時，佢地係作客區右邊既看台進行緊維修。今次已經開放返比球迷入場，只係差個上蓋。佢地既球迷組織亦都由對面龍門後既看台搬返去自己原先既區域。雖然因為位置關係，（佢地唔係向住客區方向唱歌，所以我地聽落唔會好大聲）但聽得出佢地既聲勢的確係唔差！ 我地就無咩心機打氣，上半場間唔中唱下歌。我地 hea 到連鼓同旗都無帶，只係帶左幾塊大 Banner。打氣要節奏就拎啤酒杯係欄杆上哼～

去到下半場，有班醉酒佬突然好激動咁話：「喂，做乜個個企到散開哂架，全部同我集中哂係中間，然後一齊唱歌！」 又唔知點解啲人好聽話咁企哂係我地後面，就連果幾個黎自慕尼黑既人都由角落頭走左過黎。由大約 50 分鐘開始，大家就開始唱歌唱到完場，可能係今季氣氛最好既作客波…. 真係好似無打氣得咁落力咁開心。反正今季已經 Nothing to lose，贏波唔會可以爭升班，輸波亦都唔會降班，不如大家好好享受下場波啦～

完場前，主場球員同球迷就越黎越激動，因為佢地要搶分。有幾條友激動到掉啲杯落場，球證睇唔到無事，但佢地唔想要啲杯其實可以比我拎去換返按金返黎囉。完場後，大家好快就上返巴士起程返屋企。 上車後同其他人傾左幾句計，然後就訓到返去….

搭長途車去睇波真心係治時差既好方法，有一次跟朋友去作客又係落機後第二日，然後單程要搭七個鐘。回程時我真係一上車訓到落車，第二日就再無時差問題 ._.

仲有，今季既升班附加賽已經抽左籤，西南地區既球隊會對西部或拜仁聯賽既冠軍，即係會對 1860 Müchen 或者 Uerdingen/Viktoria Köln，抽中 1860 的話已經幾乎等如升班失敗。雖然今年無我地份，但我地都可能會去食下花生，好大機會會再去慕尼黑一趟～～～