10.03.2018
德國西南地區聯賽 第 28 週
SSV Ulm - SV Elversberg
Donaustadion
賽果： 2:1 (0:0)
入場人數： 912 （約 40 名作客球迷）
更多相片

上年同一個週末 SVE 又係要到 Ulm 作客，不過當時我地係香港所以去唔到，一直好懊惱淨係爭呢個球場就去哂西南地區聯賽所有球場打卡。 今季好好彩呢場作客係出發去香港前一個星期踢！不過今季我又係因為係香港所以爭四個球場._.

作客 Ulm 對我地黎講係繼 Kassel 之後車程最遠既球場。Ulm 係 Bavaria 既邊界，要一直南下經過 Karlsruhe 同 Stuttgart 先到 Ulm。 上星期我地搭火車去 Augsburg 時都有經過呢個站，但搭火車唔會塞車，搭巴士真係想喊。 Google Maps 話搭私家車大約 3 個鐘，但巴士最高速只可以行 100km/h 所以預 4 個鐘左右。

星期六 8 點半出發，中間一大段路要維修所以封左，架巴士要改道經過幾十條村，花左一個鐘先可以上返高速公路，但由 Karlsruhe 到Stuttgart 果條路係永無止境既塞車。 過左 Stuttgart 之後有個地方叫 Geislingen-Steiger，條公路去到呢座山前面首先會由三條線變兩條線，然後再一分為二，一條路經山既右邊，另一條就經山既左邊。呢個位每日每分每秒都塞車。

一點鐘我地仲塞緊車，中間有個休息站我地只係停左五分鐘比大家落車去個廁所又要繼續，最後開波前 20 分鐘終於到 Ulm。 當巴士到達球場門口時，我地見到門口有一大堆人望住我地……… 一大班流氓係度迎接我地。

有兩條友企正係巴士門口睇住我地落車，其他人就企係售票處旁邊。 呢個球場既保安設計極差。第一，作客區入口係路中間，即係所有人都可以經過。 第二，作客球迷買飛要去主場售票處度買（但佢地成班人企左係度囉！）。 我地拎條啲旗就好不安，好驚佢地會搶。 我地只好搵一個人先去買飛，然後拿拿聲拎左啲旗入場先，起碼會安全過球場外。入場後先發現我地跟本唔係係作客區，即係主場既球迷隨時都可以行過黎我地呢度。 可能主隊無諗過我地會有咁多人到場，所以無開放作客區。成場波大家都要打醒十二分精神，要留意有無陌生人走近我地…

係不安既情緒下我地都係要繼續睇波。 終於黎到 Donaustadion，呢個球場可以容納接近二萬人！ SSV Ulm 係 90 年代有一段時間踢過乙組，甚至有一年踢過甲組，後來因為球會成績越黎越差再加上管理不善破過幾次產，亦都流失左好多球迷。佢地既球迷組織亦都越黎越細，呢場波得大約二三十人左右，係一個吉既看台上 fing 三枝旗同打氣。佢地既對面就係班流氓既看台，佢地掛起左啲同球會政治有關大字報，同埋舉起 Freiheit für Oberhausen，為西部地區聯賽球隊 Oberhausen 爭取某啲野。

上半場兩隊波都互有攻守，無話邊隊踢得好啲。我地呢班作客球迷亦都無乜特別打氣，保安問題令到我地無乜心情。 Ulm 呢個城市入面有 全世界最高既教堂 Ulmer Münster，從球場內亦都可以望到呢座教堂。佢地球會既 logo 有呢個城市既地標，睇落就好似我地象形文字既「山」字咁。Ulm 呢個字係球迷角度實在唔容易發音，唱歌時 Ulm Ulm 聲咁叫勁難聽，所以佢地通常都係唱 “ULMER!”（Ulm 人）。 我地好中意拎佢地個名黎講玩，用勁重喉嚨音讀 UUUUULLLLMM 😀 或者玩急口令 In Ulm, um Ulm, und um Ulm herum.

下半場開波不久，主隊靠右路傳中接應頂入。 又係傳中頂入！！！！！！！又係同一個球員犯錯！！！！到底呢個問題幾時先會改？？？？？？ 球場開咪宣傳入波同講一大堆廢話，話都未完，再失多球。 好多人即刻話 頂，我返屋企啦，呢啲廢波我地睇波做乜？對住一隊護級球隊我地都可以踢得咁差。 大家更加無心機打氣，各自各傾下計咁。

Ulm 隻吉祥物係一隻雀，隻雀走到黎我地面前時，突然有幾個人同時唱一首關於雀仔既兒歌 “Alle Vögel sind schon da….”，呢首歌係教小朋友認識佢地係花園常見既雀仔。如果係香港人見到就可能會唱 有隻雀仔跌落水。 主隊既球迷組織好開心咁唱歌慶祝，班流氓就間唔中叫下 Ulmer Ulmer，中間佢地唱 Saarland Schweine，莎蘭豬。 我地好開心咁對住佢地揮手同拍手回應～

79 分鐘，Elversberg 追返粒，大家慶祝完都知唔會追得返。 完場時大家都好嬲，等到啲球員過黎都唔走落去同佢地擊掌。 啲球員都係過黎拍手一秒就週頭走人。 離場時又係不安既時候，今次佢地終於封左條路比我地行去上巴士，巴士隔離亦都有唔少警察睇住我地。

啲流氓又係場外等我地，我地講好哂如果佢地真係黎搶旗的話要點做，不過佢地最後都無搞事，只係巴士經過佢地時送我地幾隻中指。 今次無事發生，最主要都係因為大家出過幾次事之後學識左呢啲場面要點做，最重要就係 show respect。

回程時大家唔知點解好輕鬆好開心咁玩，玩足五個鐘返到 Elversberg 已經九點，一落車大家即刻四散趕住去搵野食。