07.03.2018
盧森堡甲組聯賽 第14 週
Union Titus Pétange - FC Rodange 91
Stade Municipal
賽果： 1:1 (0:0)
入場人數：480
更多相片

上個月睇中左幾場盧森堡波想去睇，最後又係連續幾場都因為大雪要延期。原本除左凍之外都無話特別唔中意冬天，但呢個冬天真係特別乞人憎囉，到底春天幾天先到呀！我好掛住藍天白雲企係太陽下，大家一身臭汗咁飲住啤酒睇波呀…… /.\

一連兩日既週中波，今晚同樣係夜晚大約六點出發向盧森堡既最西南部出發。Pétange 呢個城市位於法國同比利時既邊界，係球場附近條河上面就係呢三個國家連接既果一點！

上年我地睇過 Union Titus Pétange 作客，呢隊波只係得兩歲幾，係 2015 由當時既 CS Pétange 同 FC Titus Lamadelaine 合併而家為一個 「Union」 聯隊。 而佢地對手係同市既 Rodange，所以呢場波係一場同市打比戰。

盧森堡既打比戰既火藥味只係麻麻，今場其中一隊波仲要只係得兩歲，無人會 take it serious。 我地同一個好熟悉盧森堡足球既朋友講會去睇呢場打比，佢話唔會有咩特別。不過 Pétange 既球迷就唔係咁諗！賽前佢地有一行二三十人企係看台上準備打氣，係看台前掛上 South Lions 既大旗，仲有好多人係唔同位置 fing 旗。開波前仲有一個小小既大字報 Choreo，寫住球隊名，中間有隻手想揸死 Rodange.

我地去左看台對面既 VIP Club House 樓下睇波，因為想睇下 Pétange 既球迷。開波前，佢地播放會歌，首歌既音樂同科隆會歌一樣，不過 FC Kölle 變左 Titus 屁廳 （唔知呢個係法文定盧森堡文既發音呢）。 開波後，有人走黎打招呼，原來咁岩有位認識既緬恩斯球迷都走左黎睇呢場波。 傾傾下計既時候，班球迷就開始跳住打氣，我地四個人即刻笑左出黎… 因為佢地睇同聽落都好似一班小朋友係度打氣咁。

我地無話小朋友唔好呀，盧森堡最後多左唔同球迷組織走返出黎打氣。氣勢當然同其他歐洲大國無得比，但係每隊波都會經歷呢啲小朋友階段先會慢慢變成熟同可以擴大黎搞。 而 South Lions 呢幾十個人令我諗起香港… 人少少，唔係好紮實既聲音再加上唔岩 beat 既鼓聲，夾雜住法文同德文（或者係盧森堡文）全場係度幫球隊打氣。仲有不得不提既就係佢地個大聲公，啲大聲公平時入面有一兩首預設音樂，通常都係警號聲 Bibubibu 咁，有時啲球迷會用啲預計音樂黎做某啲打氣提示，South Lions 佢地間唔中都有開 Bibubibu，然後突然間我聽到 世上只有媽媽好 既燈龍音樂。 我懷疑個大聲公係佢地淘寶淘返黎所以入面會有首咁既歌！

睇睇下波無啦啦落大雨，好在我地企係 club house 前面有個地方可以擋雨，落落下雨仲變地落小冰雹，大約五分鐘後就停左，然後越黎越大風同越黎越凍。

Pétange 係聯賽榜既排名只係高 Rodange 一位，兩隊都爭緊分想拋離降班區。下半場開波大約五分鐘，主隊先射入一球。十分鐘後，客隊既龍門出迎掃低左 Pétange 既入波前鋒，被罰紅牌出場，換上一個超級大肥仔龍門上陣。未見過係頂級聯賽會有肥球員！！！！係盧森堡從來都唔會有打少一個等如玩完既故仔，同埋每球場越近完場就會越多埋身肉搏。去到 90 分鐘 Rodange 憑住唯一機會射入追和.. 完場前一分鐘又因為一下犯規大家衝埋一堆打交，臨完場前客隊食多張紅牌。

完場後，兩隊既球員各自去搵自己既既球迷向佢地致謝，Pétange 既球迷放出藍白煙火慶祝力保一分 ._.