27.01.2018 德國甲組足球聯賽 第 20 週 科隆 對 奧格斯堡 Müngersdorfer Stadion 賽果： 1:1 (1:0) 入場人數： 49,900 （約 1500 名作客球迷） 賽多相片
上星期睇完無聊既賀芬咸之後，就一直都好期待快啲去睇科隆呢場波。今個比賽週末大部份球迷組織都會發起抗議行動，去抗議各個球場不一既打氣物竹品制度。
科隆呢個城市我去過好多次，每次北上睇波無論渣車定搭火車都一定要經過科隆。由於我地條村太偏僻，要去任何大城市都一定要轉車，所以每次去睇波都要預多好多時間。今日都無例外 － 十點鐘搭火車，個半鐘後去到 Koblenz 轉車，再搭一個鐘左右車程先會到科隆火車站。
到站時大約一點，埋站前見到街上有大型遊行示威， 不過呢個示威唔係球迷賽前既造勢遊行，而係居於德國既庫爾德人上街反土耳其政府。落車後係大教堂附近見到唔少中東人拎住唔同既旗仔走黎走去，見到中間有一塊好似唔係好岩色既紅綠白旗，望真啲原來係奧格斯堡既旗混入左人群入面 😀 （佢地唔係係遊行隊伍入面，只係係大街上面搵個 meeting point 比大家集合）
係火車站可以搭地鐵再轉一次車就可以去到球場門口；我地首先搭到去 Neumarkt 再轉特別班次去球場站，google 話車程大約 15 分鐘，但因為佢地既 “U-Bahn” 有部份路段會係地面行走，即係變成香港既叮叮咁同啲車一齊行，架車行下塞下又停下，最後去到球場時只得返一個鐘！！！！ 本來我地約左一位奧格斯堡既球迷賽前係球場飲返杯啤酒，不過因為塞車搞到我地趕唔切 （作客球迷通常都唔可以係場外逗留）
Müngersdorfer 球場前有一大片草地，天氣好既時候會有好多人係度野餐曬太陽。比賽日就會有好多小販係草地中心賣小食、野飲同紀念品咁。我地買左份炸薯餅 (Reibekuchen, 3.5€) 同咖哩腸 (Currywurst, 3€)，食飽肚就搵西區入口入場啦！
離遠見到一大堆人塞左係入口前面，當時只有 20 分鐘就開波，好驚趕唔切入場。 完全唔明佢地係點樣設計個入口囉！！！要排隊，我明。 呢個四四方方既球場只有四個角落係可以比人入場，西同北區入口係同一個角落，大家打哂交叉咁排隊。大家迫下讓下咁攝到去到最前，保安好簡單咁摸下你就可以嘟飛入場。佢地好似話想擴建球場到可容納六萬人，但我建議佢地不如 upgrade 下個入口先。
雖然排隊入場時一片混亂，但唔知點解當日既心情好到想飲返杯科隆啤酒 Kölsch 黎賀下佢。 我成日都話 Kölsch 又啖又難飲，有得㨂一定唔會飲 Kölsch！ （球場入面真係無得㨂～～） 比左 8€ 買兩杯啤酒，我地就要行幾層樓樓梯去看台上層，發現看台頂係一大個平台可以周圍行，最後我地係最高最後果行企係度等開波。
呢個球場大得勁又好細，大係因為佢可以容納近五萬人，細係因為佢好密集好迫好斜，我地企係最高最近看台上蓋好應聲。一如所料兩班球迷都參與今週既抗議行動。 點抗議？ 就係比賽頭 12 分鐘只會用自己把聲黎打氣，唔會有任何橫額同大旗；亦都唔會打鼓同用大聲公。 點解要抗議？ 係德國，每個球場都有唔同既規定，呢個球場話球迷只可以帶 2*2m 既旗入場，果個球場就話只可帶 1.75*0.98m 既旗入場，有時亦會賽前一刻先會話唔比你帶某樣野入場。 呢啲無謂既不一規定限制左球迷既創意同自由，所以多個球迷組織都響應呢次行動。
科隆既球迷看台係南看台 Südkurve，平時一入到場會見到看台前有好多大旗橫額掛哂係度，唔洗問都知邊度先係球迷看台。但今日看台前乜都無，雖然雙方球迷都已經係看台前掛起哂所有橫額，只係全部收起左無打開，但係遠睇個看台真係好空虛。 頭十二分鐘會以為自己去左英國睇波，有廿幾條友係球上面走黎走去，再加旁邊幾班人係度唱歌咁。
FC 或者 Effzeh （其實即係 FC 既讀音）係科隆既簡稱，唔好以為佢地叫 1.FC Köln 就以為佢地係 FCK，因為 Kaiserslautern 先係 FCK！開波無耐南看台就叫人北看台 Nordkurve 既人準備，然後就大叫 COME ON FC！ 然後其他看台就會一齊回應 COME ON FC 來回叫幾次。 聽到佢地叫 Come on FC 就令我諗住德國既足球雜誌 11Freunde 出醜事件，話說早幾個月有科隆對阿仙奴，科隆球迷叫 Come on FC，阿仙奴球迷就作出回應….. 雜誌編輯以為阿仙奴既球迷同科隆一齊打氣回應 Come on FC 大讚阿迷有品，但人地其實係叫緊 Tottenham is shit.
去到第十二分鐘，球迷們就打開佢地看台前既橫額，仲有開始揮動大旗。 主客看台前都有塊橫額寫住今次抗議行動既口號： 「Taten statt Worte – Freigabe aller Fanutensilien – bundesweit – jetzt!」（簡單黎講就係為打氣物品平權！人有人權，大旗都要有大旗權～～） 約兩三分鐘後，佢地就收起塊橫額，如常展示各個球迷組織既大名，加上大聲公同鼓聲，大家都終於歸位啦！ 科隆既球迷開始唱歌，雖然相比起其他德甲既球迷組織佢地唔算多人，但係其他看台有好多球迷間唔中都會加入一齊打氣。
對比返賀芬咸既球迷，呢場波既球迷有活力好多，同樣都係有一家大細去睇波，但仲有好多有氣有活力既年青人，成場波講好多無謂既笑話，串下班球員，唱下歌等等，唔係好似老人聚會咁拎住幾杯啤酒係度話當年。 場內既氣氛會令人完全唔會覺得科隆而家排榜尾，上半季佢地只贏過一場波，但佢地既球迷仍然繼續入場支持，仲講笑話你將個聯賽榜倒轉黎睇我地咪排第一囉！ 歇冬後，佢地成績連續三場不敗，原本以為佢地十二月就會篤定降班，點知比佢地追到同尾四只差七分。
黎自 Bavaria 既奧格斯堡同州內既其他球隊黎比相對黎講算細，當日有近 1500 位球迷跟球隊一齊去 Müngersdorf 作客可以話有啲出乎意料之外！佢地企滿成個作客企位看台，而打氣人數有大約 500 人，但可能因為我地企得太高食哂 Effzeh 球迷既聲音，幾乎完全聽唔到班作客球迷既打氣聲。 即使主場球迷無出聲，我地都只係隱約聽到奧格斯堡既打鼓節奏而估佢地唱緊咩歌。
南看台係呢場波唔知做乜好似好忙咁，下半場佢地係看台前打開另一塊橫額，掉念一位一年前過身既組織成員，話比佢知佢班兄弟無忘記過佢！ 然後看台中間弓有人舉大字報，諷刺自己隊波 25 年來未贏過任何錦標，而對上一個錦標亦只係室內足球賽….. 跟住仲有看台角落有班友舉起白色頸巾，宣傳組織既新打氣用品。仲有一塊大字報係回應返上場主場對慕遜加柏偷旗事旗，話說有三個科隆球迷打扮成話場內保安成功進入草地範圍，行去慕遜加柏球迷區前面偷左某組織既大橫額；今次塊大字報就係笑佢地好慘呀，無左塊布仲要輸波！ （係球迷界，自己塊旗或者橫額比人偷左係好好好好大件事！）
場波？ 班主場球迷睇得超級肉緊，因為每分都對佢地護級之路十分重要！！ 佢地靠禁區外既自由球直射死角入網，對面龍門拍得中都救唔到。 全場慶祝時超大聲，大聲到地板會震！！ 後來客隊追和時準備大聲慶祝唱歌，南看台即刻開始叫大家為科隆企起身唱歌，用幾萬人既聲音完全蓋過左作客球迷把聲！場波去到九十分鐘都只係見到極少部份既人會離開座位，真係同果啲同球迷無感情既球隊相差好遠。
好多英國球迷都會去科隆睇波 （應該係因為搭飛機容易去），賽後聽到有幾個英國人傾計 「呢場波好正呀」 「係囉，點解我地啲氣氛咁差」 「咪係，連啤酒都唔比飲！！！」 哈哈哈！
睇到呢度，係咪覺得我地全日都好開心呢？場波好睇，氣氛又正，但係完場後先係我地惡夢既開始。 我地 plan 行程時睇左賽後六點半由火車站開出，即係有大約一個鐘比我地去火車站，趕得切就可以九點幾返到屋企。
因為賽前既塞車，我地就知賽後都同樣會塞車，所以我地都盡快行去地鐵站搭車去火車站，好好彩迫到上第二班車，然後就龜速向火車站出發。當時仲有超過 45 分鐘比我地去火車站，但搭左十分鐘我地只係停左四個站，去到第五個站架車停左好耐都無出發，點知再過多十分鐘就有職員黎叫全部人落車，話架車壞左。
落車之後望到後面係無盡既地鐵車龍，成條路軌都係地鐵。 我地落車等下一班車都無用，因為之後既車全部都塞滿哂球迷，根本唔會有位比我地塞到上去。 我地同好多人一樣選擇行路，但由我地落車果個站行去火車站要五十分鐘。 即係無論如何我地都唔會趕到原先想搭六點半果班車， ok，我地有睇過另一班車係八點既直通車，但德國火車公司有通告話因為呢班車既路軌上有樹倒榻，所以會取消所有直通車。
電話舊電已經越黎越廢，天氣凍既時候拎部電話出黎隨時會即刻關機，用僅餘既電量開 DB app 出黎睇下下一班車係幾時，搵到下一班去 Koblenz 既火車，上車之後心靜平復返啲，諗起頭先又嬲又無助既心情真係好想喊，但好在當時仲早所以仲有車返到去。 去到 Koblenz 時要等一個鐘先可以轉車，好在呢個算係大站，站內有間麥當勞可以食啲野暖下身。食完就上返月台上車，由 Koblenz 去 Trier 既火車係由盧森堡火車同德國火車合併，去到 Trier 站兩架車就會分開，一架去 Saarbrücken；一架去盧森堡。
平時德國火車會係前面，但呢班車唔知點解盧森堡火車到左站都仲未見德國火車。 去到原定開出時間前既一分鐘，德國火車先埋站！OK…… 咁即係又遲啦。反正已經係最後一程車，佢遲唔遲都算啦。搭左個半鐘車終於去到 Trier，架火車又停左係度。 十分鐘後車長開咪話：「由於反方向既果班火車遲左九十分鐘，所以我地都要遲十五至二十分鐘先可以開出。」 我以為自己聽錯，反方向既車遲到關我地咩事？ 當時我地搭多一個站就可以落車，最後係 Trier 停左超過半個鐘先到我地個站…. 呢啲細站啲火車通常只會停一分鐘，但我地過完隧道拎埋車，架火車都仲停左係度…. 到我地開車時就見到火車上全部人落哂車……….. 即係又壞火車？？？？
回程時我就上網睇下發生咩事，發現原來呢兩條路軌來往既火車全部都遲九十分鐘！！！雖然最後我地十二點幾先返到屋企，但都好慶幸經過咁多鐵路災難，我地仍然可以平平安安咁返到屋企……
下個星期終於到地區聯賽開波，二月都應該唔會去睇德甲乙丙既賽事啦！