20.01.2018 德國甲組足球聯賽 第 19 週 賀芬咸 對 利華古遜 Rhein-Neckar-Arena 賽果： 1:4 (0:1) 入場人數： 28,017 （約800 作客球迷） 更多相片
冬天德甲之旅第二場波黎到賀芬咸…… yuck. 我地趁仲住係德國西南部，拿拿聲去哂呢個地區附近既球場先，遲啲搬去其他城市應該更加唔會想突登走去呢條村度睇波。月頭上網買飛時見到已經無咩位剩，最後買左前後兩行同 number 既飛 （反正入到場我地都係會走去第二度，所以買飛時坐邊都無所謂啦）。
賀芬咸 TSG 1899 Hoffenheim 呢隊波來自海德堡以南一個叫做 Hoffenheim 既城市，多年來都係係低組別打滾，後來有個曾經踢過下賀芬咸青年軍既人發左達，係十幾年前就開始注資去呢隊波，係佢既銀彈政策下，賀芬咸好快就升左上德甲；呢個人就係德國軟件公司 SAP 既老闆 Dietmar Hopp。
Hopp 為賀芬咸去起一個德國足總認可既球場，等隊波可以踢高組別賽事。由於 Hoffenheim 市唔夠地，所以賀芬咸既主場 Rhein-Neckar-Arena 要建於隔離市 Sinsheim，就係正高速公路 A6 側邊。 第一次見到呢個球場就係之前跟德丙球隊 Osnabrück 搭巴士南下作客，係 A6 既公路休息站停車時見到呢個球場。 有好多球迷巴士都會停係呢個休息站，然後好多球迷就會走去位於 Dietmar-Hopp-街既球場噴尿劃地盤、噴下 graffiti 呀，貼下貼紙等等….
賀芬咸二隊現時同 Elversberg 踢緊同一個聯賽，佢地用緊既球場就係賀芬咸變土豪前既up dup 球場，現名為 Dietmar-Hopp-Stadion。 嗯，再過多少少就係 SAP 既總部，果條村叫 Walldorf。 條村都有隊係地區聯賽踢緊既球隊叫 Astoria Walldorf，而佢地既主場叫 Dietmar-Hopp-Sportpark。 其實就係差在呢幾條村未有 Dietmar-Hopp-Coins 等啲村民可以日夜崇拜呢個救世主。
星期六我地十二點就出發，揸左大約個半鐘頭車就已經到左 A6 出口 Sinsheim。 我地怕落雪會塞車所以預早左好多時間出門口，A6 出口一出就已經對住個球場，轉多個彎就係我地想去既 P9 停車場 （收費 5€）。 泊車後，我地係車內留到兩點半先出去。 向球場方向經過條隧道，一出就已經係我地可以入場既西北入口。
雖然唔中意呢隊波，但話哂都第一次黎呢個球場，行個圈望下都好。 行到去 VIP 門口我地想行遠少少影個球場外景，行左去另一個停車場。 我地突然發現：「做乜呢度架架車都係 Audi?」，我講笑話可以呢度係 Audi 專用停車場。 再望下附近，每架車頭真係有塊牌寫住 “Audi parking only” ，即刻反白眼。 而家係咪歧視其他牌子先！（後來發現佢地有個官方 Audi Fan Club，迷團解開～）
影完相我地就入場，入口有好多塊牌係頭頂寫住 “Eingang Frauen”，即係女士入口，等女士們入場時唔洗左望右望搵女保安搜身。 入場後我地搵到自己個位後就即刻望下其他靚位，最後㨂左 VIP 區隔離，可以企足全場又唔會擋到人。
我地位於北看台，正正對住賀芬咸既球迷看台 － 南看台，而西看台成個都係 VIP block，上網買飛係唔會有得㨂 VIP 區既，高層全部都係包箱，低層就係普通座位，應該係比自己 SAP 同贊助商坐。作客球迷區就位於東北看台。 我地大約開波前半個鐘入到場，當時利華古遜既球迷都已經係哂度；佢地不嬲都係除左係 NRW 州附近會有多啲球迷跟去作客，其他地方通常都係得幾百人左右。 今次已經係我地第三次見到佢地，但只係第一次可以清清楚楚聽佢地打氣：第一次去睇佢地主場，但佢地嬲緊隊波杯葛唔打氣；第二次就係上個月作客慕遜加柏，但主隊太有氣勢，所以我地唔係成日聽到佢地唱歌；今次黎到人丁單薄既賀芬咸，佢地係時候可以威下啦！
賀芬咸雖然人少，但唔知點解佢地有好多個組織。 比較多人識既就 Young Boyz，但佢地係球迷界都係無咩地位。 前年開始佢地同 FC Homburg 結左盟，所以係賀芬咸既比賽成日會見到佢地有一細塊綠色既布，Homburg 就連賀芬咸歐聯外圍賽作客利物浦時都有去。Young Boyz 同其他所謂既 Ultras 既聚集地係南看台既上半部 （唔似好多其他球會咁企係最前），因為看台最前係係賀芬咸變土豪前已成立既舊球迷會聚集地，所以班 Ultras 都要讓步。
班 Ultras 既核心成員大約左六七十人，然後加埋附近會一齊拍手打氣既有大約二三百人。開波前佢地舉起一塊黑白橫額，悼念早排過左身既會員朋友。但啲字勁醜好似小學雞寫字咁…. 看台底既球迷會同樣有五六十人，佢地間唔中都會跟上面班友一齊打氣，但每次都會變左做二重唱，好低質囉！！！！ 佢地中間有 坐低細聲唱然後全部人彈起身跳住唱，但唔岩 beat 又做唔到跳起大聲唱果刻既震撼聲。（後來利華古遜表演左一次比佢地睇點先岩，雖然我地見過更加震撼既，但對比之下班作客球迷真係好好多）
賀芬咸既球場頂有好多 Baden Württemberg 州內各個城市既市徽章旗仔掛左係度，因為佢地想成為可以代表整個州既球隊。大佬，呢個夢同中國足球夢有得比喎。 Mannheim 同 Ulm 呢兩隊踢緊地區聯賽既球隊既代表性都已經高過呢隊鄉下波好多。 係場內見到最多就係一家大細， 好多住係附近既小朋友入場睇德甲明星。 場內場外都好少見平時係其他大球隊見到 （我地認為係比較正常）既球迷。
好啦，又笑又鬧咁講左咁多，有樣好野一定要讚，就係呢個球場座位區內係非吸煙區！！！第一次係德國睇波係唔洗食二手煙！！！！ 可能因為場內周圍都係小朋友所以唔想佢地食二手煙~ Family Club 有 Family Club 既好處！
賽前兩隊波相差只係一分，德甲今季暫時除左榜首之外去到第十位既分數都算接近。 真係好可惜咁多年都係拜仁獨大，即使聯賽其他賽事幾精彩，其他球隊幾努力向上爬，最後都只係睇到「德甲拜仁又贏冠軍」。 當日雨不停落下來，完全無停過。 好在所有德甲球隊既都有上蓋，所以我地淨係要捱冷。 場上班球員就要濕住身比賽，但場波又幾好睇。
場內既大電視好 q 煩，勁多無用既資訊，例如射門速度。每次賀芬咸有射門都要 咇咇咇！ Schußgeschwindigkeit: 54 km/h。 完全唔知呢啲數據有乜價值， 仲要係咁令人分心。 然後又有跑動最多既三位球員數據，8km 呀，7km 之類。中間佢地有顯示其他比賽既即時分數，”Mainz 0:1 Stuttgart” 全個球場都慶祝，因為佢地視緬恩斯為死敵 （但緬恩斯只係想問你地係邊位）。 仲有去到 35 分鐘就會 tick tock tick tock 然後顯示 時間尚餘十分鐘，去到 40 分鐘又會話得返 5 分鐘。
上半場完場前兩分鐘，利華古遜終於成功開齋領先 1：0。 佢地既球迷唱完歌慶祝就靜左一陣，呢個時候，我地呢面既看台頂突然有一堆人係度大聲唱歌。 全部利華古遜球迷都向同一個方向望下睇下發生咩事，八掛既我地當然都望下啦，見到有大約十個人係度唱歌，一開始聽唔清楚佢地唱乜 “dfjahkjhf fjhweqfhxbdcc ROSTOCK!!!” 原來係 Hansa Rostock 既球迷黎左睇波…. 係喎，丙組今個週末開始下半季！ 即刻用微弱既訊號上網睇佢 Rostock 係邊度踢…. 原來佢地今日一樣要作客，而佢地既作客地點就係離 Sinsheim 大約 70km 既 Aspach。 咁佢地唔洗睇波咩？ 唔洗… 因為場波當日朝早 10 點先宣布場波因為大雪要延期。
Rostock 位於德國北部，班球迷要跟自己隊波去 Aspach 作客的話就要坐最少七個鐘車。 場波原定下午兩點開波，即係班球迷最遲朝早六點就要出發，點知十點先黎話延期！呢班 Rostock 球迷應該係回程時諗住橫掂都係，不如係附近睇場波先走！ 當佢地係場內暴露左身份後，即刻有警察同埋保安走去佢地附近睇實佢地，等佢地無機會搞事。 下半場佢地成日都趁利華古遜球迷靜落黎果一兩分鐘開始大聲唱歌。 佢地得十幾個人都可以唱得咁大聲！ 又唔知點解利華古遜班友都會望住佢地等佢地唱完先自己再開始唱 😀
下半場利華古遜先再射入多兩球，我地希望佢地可以炒賀芬咸四蛋黎個 0:4～ 同上半場一樣，去到 80 同 85 分鐘都會話比大家知仲有幾多分鐘完場。 呢個完全係 「係時候離場啦」 既提醒囉！ 當佢 tick tock 第一次有五分鐘，已經有好多人慢慢離開。 去到 tick tock 第二次，更加多人起身離開 。 雖然 86 分鐘比 Szalai 破蛋！ （上半場佢係咁比啲阿伯鬧好慘！）但場內已經越黎越吉，最後失埋第四球就連南看台都已經走左超過一半！！！完場後好多人走到看台底舉大字報問球員拎波衫….. 想點??
Event club…… 真係無諗過作為一隊係頂級聯賽打滾既球隊可以咁慘。啲人走得咁快對我地黎講係好事，因為離場後，啲車已經走得 7788。 由球場行返去架車，上車後我地食啲野暖下身，同玩左一陣電話先再離開，用左唔洗半個鐘就上左公路。 回程開始落越大雪，中途見到撒鹽工程車，第一次見德國靚車係公路飛車唔飛車爬頭！！！寧願跟住架工程車後面一大條車龍，大家一齊安安全全咁揸 50kmh 😀
終於去左賀芬咸，希望以後唔洗再黎呢個咁無聊既球場！