13.01.2018 德國甲組聯賽 第 18 週 法蘭克福 對 弗賴堡 Waldstadion Frankfurt 賽果：1:1 (1:0) 入場人數： 45,300 （約 2000 名作客球迷） 更多相片
德甲重新開季啦！一月同二月永遠都係我地去睇德甲既好時間，好多人都唔想天寒地冬既時候走去球場坐兩個鐘，所以相對黎講冬天係比較容易買到波飛去睇德甲。 再加上呢個時間得德甲開左波，地區聯賽要到二月先開波。
德甲次輪第一週我地㨂左近近地去法蘭克福。呢個球場我係 2012 年已經去過，當時係上半季最後一場主場賽事，仲記得當時超級凍，但球場外有德國火車公司 (Deutsche Bahn) 員工派聖誕老人朱古力，仲塞左好多粒比我，所以我一直都好中意呢個球場 😀 而我地兩個一直都好中意法蘭克福既球迷，更加認為佢地係德國頭五其中一班最有氣勢既球迷！
呢場波雖然三點半先開波，但我地未夠九點鐘就已經要出門口去搭火車啦！ 事前係網上面買左 Rheinland-Pfalz Ticket，有呢張飛就可以一日內係 Rheinland-Pfalz 州內搭所有地區火車線 （仲有其他唔同州份既日票，甚至係全國通用既日票，最平 29€，最多可以 5 個人用），Frankfurt 雖然係屬於 Hessen 州，但因為波飛包埋當地交通，而 Rheinland-Pfalz 同 Hessen 係相連既，所以當架火車仲係 Rheinland-Pfalz 有人查飛時，我地只需交出 Rheinland-Pfalz Ticket；而去到 Hessen 時有人查飛，拎張波飛出黎就過到關～
呢類日票係就係好抵買，但佢只包括地區火車線 (Regional trains)，即係高速火車 (ICE, IC) 係唔包既。我地去法蘭克福就必須要係 Koblenz 轉車，轉車唔係問題，但德國火車十架有九架都會遲到，我地仲要只係得六分鐘轉車，如果追唔到下一班車就可能要等成個鐘！ Surprise, 我地去 Koblenz 班車當然都係遲到啦～ 有幾個人都同我地一齊要衝落車然後跑落隧道再向去 Frankfurt 既火車狂奔… 最後好好彩上到車仲有幾十秒剩 >_>
搭左三個幾鐘火車，終於係到達法蘭克福火車總站！ 一落車已經見到好多球迷走黎走去，我地都即刻去搭 S-Bahn 去球場 (Frankfurt am Main Stadion)。 球場既下一個站就係機場，所以都有好多拎住行李既人搭同一班車！
事前其實我地收到風知道弗賴堡既球迷會搭火車去法蘭克福，我地早啲去到球場站想等佢地，睇下佢地會唔會賽前係火車站造下勢。佢地一落車就有警察開喇叭歡迎佢地黎到法蘭克福，話佢地知警車會帶佢地到作客球迷區入口，請大家乖乖跟住車尾行，唔好諗住搞事。佢地全部都好安靜，就連歌都無人唱，睇落完全係無諗住搞事咁。我地估一來雙方球迷無咩仇口所以唔洗係場外對罵，二來班作客球迷人數唔算多，就算想搞事都未必夠膽係法蘭克福地頭搞事！
班作客球迷安安靜靜跟住警車向森林出發後，我地都跟住主隊球迷慢慢行去球場。 賽前我地預左好多時間，所以係球場外圍散下步先再入場。 法蘭克福既主場正名叫做 Waldstadion (森林球場），當地既球迷亦都只係會以原名稱呼呢個球場，唔會幫啲冠名贊助商宣傳！DB 已經唔再係場外派朱古力，變左係一間當地銀行係度派熊仔糖….. 可惜我唔中意食糖，連拎一包既意欲都無！
雖然已經黎過，但入場後真係不禁又要嘩一聲，果然係世界級既球場，好靚呀！！！！ 我地個位只係平飛，但視線超好，主客球迷都望到，望落球場都好清楚無死角！ 球員入場前大會就開始播下會歌，同啲球迷熱下身，當球員入場時，兩邊既球迷組織就開始 fing 旗唱歌打氣。 終於可以再次親身見到法蘭克福球迷打氣啦！！！佢地係看台前掛起左一塊寫住「Korrupte Bastarde」，大鬧德國足總係貪污既仆街！
佢地有咩特別？ 人多囉… 人多仲要係咁多個都會一齊跳一齊唱喎。 其實一段我最中意既打氣片係法蘭克福作客紐倫堡，當時佢地所有作客球迷一齊跳住唱一首我好中意既打氣歌 （#德國工程) ：
(Credit: SGEOlli1979 – 1. FC Nürnberg – Eintracht Frankfurt – Die Tribüne bebt :-))
每當佢地唱呢首歌時就一定會全個看台一齊跳，當日佢地先唱歌叫大家為法蘭克福起立，當大家企得7788 佢地就開始唱片入面呢首歌，大家就一齊跳，好好睇呀！！！！！！
上半場法蘭克福有好多攻勢，多到我地以為佢地會大炒弗賴堡，點知佢地下下門前失機。 我地後面個熱血阿叔係咁鬧爆隊波，去到 28 分鐘主隊終於入波。慶祝完一輪之後，場波既焦點去左球場頂既四方電視。係德國，佢地有時會係場內顯示其他同級賽事既即時比數，一有入波場內就會有叮叮聲，四方電視就會顯示 「TOOOOORRR」 （入球！！！），然後就睇到 Hannover 0:1 Mainz；球場內大家都 Ehhhh，然後係十分鐘內由 0:1 變成 0:2, 1:2, 2:2， 每次一有 叮叮 聲，大家都問「今次又漢諾威定緬恩斯呀？」
作客球迷今場波既表現係出乎意料地好，佢地由頭到尾唱足入場，佢地落後期間既聲勢完全無減過。作客法蘭克福對弗賴堡黎講已經算係短距離 （大約 250km，2－3 個鐘車程），所以好多球迷都跟埋一齊去作客，而家睇得出佢地大家心情都好好。 好中意佢地有首歌唱到 SC Freiburg 時個 burg 係超低音，女仔既話未必唱到…. 😀
下半場無上半場咁多攻勢，但睇住法蘭克福有咁多機會埋門都拉開唔到比數就知道劇本最後九成九都係要失分，你當我馬後炮都好，最後真係比客隊追和。 追和之後班作客球迷就越唱越大聲，而我地後面既幾位主場球迷同樣鬧得越黎越大聲。天已經幾乎黑哂，入夜後球場內好大風，凍到我地係咁震 （諗住 4 度唔會好凍），完場後我地去完廁所就去買野食，點知場內既小食停只係得返野飲。
咁唯有落返地下搵其他小食亭啦。 賽後我地有大約一個鐘先要搭車走，完全唔洗急。 沿路離開球場時一路望下有咩食，去比較大型既賽事我一定要食薯條 （地區聯賽無薯條！），有啲熱食入口暖下個胃先。 離開球場後去其他小販度買德國炸豬扒 Schnitzel 同埋 Cheese Bretzel～ 食飽後再買多杯熱蘋果酒 (Heiße Apfelwein / Hot Applewine)，蘋果酒係 Hessen 州既特飲黎，所以係其他地方既球場係唔會有得飲！
去到球場站我地睇返時間表，見到可以搭早一班車，咁就可以去到 Mainz 有更多時間轉車。 我地原定諗住搭 18:20 果班，因為早左所以可以搭 18:10 果班。 去到月台上發現連 18:00 果一班都未到！ 如果我地好準時咁到火車站諗住搭我地原先果班車，我地就會 miss 左之後要轉車果兩程車，最後就會遲最少一個鐘先返到屋企。
上車前仲見到弗賴堡到火車站，由於佢地唔係搭球迷專屬火車 (Sonderzug)，所以月台上原本有其他法蘭克福既球迷等緊車，有幾位應該屬於流氓組織既人收到風都即係走過去對面看台想搵交打。 當然班警察知道弗賴堡球迷會搭邊班車後，就即刻走上月台度分開兩班球迷。
最後好順利咁上左原定 18:00 但遲左 20 分鐘既火車，可以係機場站轉車，但下班車同樣遲左 10 分鐘。 搭兩個鐘火車後我地要再係 Saarbrücken 轉車，但係呢個站我地只有 8 分鐘轉車。 一心以為會 miss 左班車，諗住係 Saarbrücken 買個 Kebab 食住等車，點知去到尾二個站架火車突然開快車，由一直都係 +10 mins 最後變左 +5 mins。 我地再一次落車狂奔轉車…. 上到最後果程車終於可以鬆一口氣，唔洗再同 DB 鬥快….
#DeutschePünktlichkeit