06.01.2018 AS Nancy - Olympique Lyon Stade Marcel Picot 賽果： 2:3 (0:1) 入場人數：14,201 (約 300 名作客球迷，作客球迷呀！！！！） 更多相片
新年快樂！ 每逢冬天，好多德國球迷就會去英國或者比利時等無歇冬期既國家睇波，不過無錢無時間既我地就乖乖留係屋企同家人朋友過聖誕新年。 2018 年第一場波我地再到法國 Nancy 睇法國盃對里昂。呢場波重要在當地警察終於放寬對作客球迷既規管，比佢地隨隊入場！！！！！！
上個冬天我地已經去過 Nancy 睇法甲打比對 Nantes （今季佢地降左班去乙組），法國咁多波睇做乜又要去 Nancy？ 最主要係上個月有朋友問我地有無興趣一齊去睇，佢支持既球隊 1. FC Saarbrücken 同 Nancy 係好朋友，成日都會互相去大家既球場睇波，只要佢出句聲就可以幫我地買到飛。 今場波好多 FCS 既球迷都想跟埋一齊去睇，最後有兩架大巴載 130 個德國人去幫手打氣！
我地當然唔會跟 FCS 既球迷一齊搭巴士啦！ 星期六我地三點半左右開車向法國出法。 法國既高速公路係收費既…. 所以我地要行鄉村路經過十幾條村仔渣兩個鐘多啲先可以到達目的地。 中途我地去左法國巨型超市 Cora (家樂福啲 friend) 買法包 （0,59€ 一大碌）、芝士同火腿自制三文治。去到法國點可以唔食 Baguette 呢！！！！ 入到超市仲見到好多小甜品，最後忍唔住買多盒士多啤利撻做甜品。
去到球場附近我地搵位泊低架車就去 Nancy 球迷既聚腳地搵朋友拎飛，離遠已經聽到一大班人唱歌仲放埋 pyro 同響炮！ 我地食完花生先夠膽走埋去搵人，一走入去當然好多奇異眼光，但當大家見到我地識人之後即刻個個變得好友善，就連 Nancy 既大佬都走過黎 Bonjour， 原先諗住拎完飛傾一陣計就去市中心行下，點知最後一傾就傾左成個鐘，無咩時間剩就只好係球場附近行下順便望下作客球迷到達既情況啦。
Nancy + FCS 既球迷係我地離開一陣之後佢地都出發去球場，今次佢地特登行大路唱住歌過去。當時我地已經係球場附近，見到一大班警察突然向同一方向跑過去就知有事發生。 我地即刻跟住班警察走，見到一大班 Nancy 球迷放住紅色既煙花走向球場。 好多車見到前面煙霧瀰漫即刻嚇到調頭走，啲警察都係咁趕啲車走叫佢地唔好塞住條路。
見到班球迷比警察擋住條路唔比佢地向作客區方向行，我地就行去球場既另一邊望下。聽到作客區有人放下響炮同唱歌，見到有兩架巴士已經入左去就知場外應該無野好睇。係比賽日，主場球迷無對手可以鬧同鬥氣發洩，目標好自然就會轉左去警察身上。諗住返去主場入口既時候，又見到警察向同一個方向衝，原來係 Nancy 球迷諗住係草叢突破警察既防線！當時咁岩有一架作客球迷巴士到達，佢地當然想走去攻擊架巴士啦… 對上一次有作客球迷都唔知係幾時啦！原來係法國有規定作客球迷巴士入到城內要關哂車入面既燈，遇上塞車就會有警車去開路，以妨其他球迷會趁機攻擊巴士！法國足總多年來因為保安理由所以一直禁止作客球迷入場，近年係法國既球場既作客區全部都係空空如也。
入場後第一時間去廁所，之後就走上看台最高點等開波。 因為我地張飛係朋友幫我地買既，所以我地會同 Nancy 最大既球迷組織 Saturday FC 同一個看台。 其他人想買呢個看台既飛都必須經 Saturday FC 買飛，因為球會將呢個看台既「擁有權」比左佢地，門票價格任佢地定，比邊個入去呢個看台都係由佢地控制。 係呢個看台入面我地無見過其他 Groundhoppers，真係九成九都係講 bonjour merci oui oui 既法國球迷！ （法國人著衫好睇過德國人好多！上次都已經咁覺得～～～）
法國人入場超有效率，開波前五分鐘成個場都仲係吉既，就連 Saturday FC 果區都唔見有人，旗又無人掛。到球員開始入場時，大家就好快埋位掛旗 fing 旗拍手唱歌。有一塊一定要提既大旗就係 Liberte pour les Ultras，意思係 Freedom for Ultras！ 對面龍門後左邊既作客區有大約三至四百個作客球迷，右邊有另一個 Nancy 既球迷組織。 同樣地佢地都有 Saarbrücken 組織去幫手助陣，開波前佢地舉起 Nancy – Saarbrücken 既紅藍大橫額。 我地呢面就開始有 Capo 好型咁帶唱。
一開波 SFC 就放左兩次紅煙，然後場內保安就超極速走入人群中掉走兩枝 pyro 落看台底！ 真心第一次見法國人做野咁有效率！！搞到影唔到一張好睇既 pyro 相！法國波我真係好少留意，睇過里昂既陣容又唔見有啲我聽過既球員名。 一開波時兩面睇落實力都唔算相差太遠，不過當里昂一拎到波時，就可以好快上去做攻勢，去到 23 分鐘左右里昂就領先一球。 里昂現時係法甲排第四，而 Nancy 就係法乙徘徊係降班位置，大家都話如果今場里昂大炒唔到既話都已經算係爆冷！
上半場完場前 Nancy 向我地呢面造攻勢，入到禁區比里昂球員踢跌左，球證竟然無比十二碼，仲即刻吹完場！ 法國球迷當然媽媽聲，雖然唔知佢地 up 乜，但好肯定佢地個個都係指住個球證黎鬧！下半場里昂造唔到咩機會去拉開比數，反而 Nancy 球員真係球球波都去追。 主場球迷打氣都十分落力，特別係難得有作客球迷在場，係咁叫里昂人食屎～ （里昂同 Nancy 死敵 Metz 係朋友，所以兩隊都唔中意大家！）好中意 Nancy 佢地唱 Oh le le, Oh la la，呢種得意得黎又夠霸氣既歌應該得法語系係人先唱到出黎，如果比德國人唱既話實會變成 Rammstein 版本…
好可惜我地坐係 Saturday FC 既看台，所以作客球迷既打氣聲完全被主場球隊蓋過左。 開波前佢地有同隔離既 Red Sharks 對鬧下，但賽事進行期間只係間唔中聽到佢地唱一兩句。 不過佢地來勢真係唔弱，主要既幾個組織旗幟都有帶出黎，仲有好出名既中指旗。 只可以話，真係要見識佢地打氣聲就唯有搵機會去佢地主場睇。
71 分鐘 Nancy 搏到十二碼，射入埋，整個看台超開心慶祝！我地企最後又近看台頂，大家既慶祝迴音超勁超大聲！ 好耐無可以好好享受呢種聲音～～～～ 主隊食住個勢過左五分鐘再射入多球反超前！！！！ 大家都好開心咁慶祝！係呢個時候我地發現到….. 除左係看台中心既球迷組織之外，其他普通既法國球迷係完全唔會企起身睇波既。 當自己隊波搏得十二碼時，佢地都係坐係度等入波。 去到最後果十分鐘勁緊湊既時候大家都係好安樂咁坐係度… ???? 諗起兩星期前係 Gladbach 啲人係一有攻擊就會即刻好緊張彈起身真係完全兩回事黎…
我望住個鐘，去到 87 分鐘， 諗住 Nancy 捱多一陣就得。 同埋我唔想加時同射十二碼…… 場波夜晚九點先開波，準時完場已經十一點，我地仲要渣兩個鐘車返去呢！ 如果再加埋時既話我驚三點都未返到去！ 然後我最唔想出現既一幕終於發生了…………… 里昂追和。 呢一刻 Nancy 既球迷仍然好大聲咁為自己球隊打氣。 和波咋嘛，仲有機會既！ 果刻我開始覺得是但一隊入波都得，總之唔好加時！
補時四分鐘， 去到 94 分鐘我已經打定輸數諗住要企多半個鐘。 點知 Nancy 係禁區頂踢跌對手比球證判左個罰球。 我地都未講完「今季 Nancy 成都係最尾一刻輸波」，Boom. 個波直飛地下死角入左。 全場靜哂，得返久違既作客歡呼聲。 同一時間球證吹雞宣布完場。咁就完左。
賽後雙方球員都有走去自己既球迷區向球迷致謝，但佢地勁 hea 咁行埋去拍兩下手掌就走返入更衣室。 場內既人好快走哂，得返被迫留係場內既作客球迷，同埋一班唔願走既 Saturday FC 球迷。 雙方開始互相對唱 battle ，唱到差唔多大家都慢慢收拾細軟離開。
我地就係黑夜之中經過十幾條鄉慢慢碌返去德國。