德國足總盃 十六強 慕遜加柏 對 利華古遜 BORUSSIA-PARK 賽果： 0:1 (0:0) 入場人數： 49,016 （約 3500 名作客球迷） 更多相片
終於，我趕得切返德國過聖誕啦，見到歇冬前最後一圈我已經趕唔切，以為今年已經再無波睇，好在聖誕前仲有德國盃！！！！ 我地諗住睇三場其中一場：史浩克、緬恩斯或慕遜加柏，最後我地㨂左去我未去過既 Borussia Park! 唔係唔想睇史浩克，但史浩克既波飛有點貴，所以去佢隔離見識下新球場算了….
呢場波都算係打比，不過兩隊波無咩大仇口所以火藥味唔算濃。 同史浩克一樣，慕遜加柏既球迷看台係北看台，作客球迷區亦都係東南看台角落頭。 我地買飛時唔係得返好多選擇，最後㨂左南看台下層，諗住可以正面望到北看台之餘，亦都可以見到作客球迷區～
星期三朝早我地最早都要兩點先可以起行，GPS 話渣兩個半鐘頭左右大約五點可以到。場波六點半先開波，諗住有個半鐘頭既 buffer 應該夠用啦卦。 我地好準時兩點鐘出發，一直睇住 Google Maps 都唔見話有特別大塞車，點知四點幾開始就突然越黎越多車，條路越黎越塞又越黎越慢，最後塞到六點我地先可以慢慢出到公路，再慢慢塞入去停車場。 賽會係大約六點宣布因場外交通擠塞所以延遲十分鐘開波。六點二十分我地終於泊低左架車，好多人都一齊即刻向球場狂奔！
BORUSSIA-PARK 場外有七個停車場，收費大約 6€， P1-4 最近球場，最遠既就係 P6 同 P7，我地突登㨂呢兩個停車場，因為呢兩個停車場既出口直接通去高速公路，即係上車就可以即刻走黎唔洗再係球場附近同人迫餐懵先走得！ 不過由 P6/P7 行去球場要差唔多二十分鐘！！！！我地仲要係南看台，要入場既話就要圍住球場行大半個圈先可以到…. （西看台係 vip 區，所以唔可以直接通去南看台）
係場外奔跑時聽到場內已經讀緊出場陣容，聽到啲球迷開始唱歌，大家都越黎越心急。好在南看台唔多人排隊入場，都唔得閒望到球場外觀就衝左入場。入到去情不自禁合埋雙眼深呼吸，好好感受場內近五萬人既聲音…. 心中係咁尖叫 我終於返黎啦！！！！！！ 當時球員岩岩入哂場行緊去準備開波。
週中六點半開波呢個時間真係好差，係德國大部份辦公室時間都係朝九晚五，即使係附近準時收工，去到球場都已經差唔多六點啦。最近球迷同足總拗緊週中開波時間，佢地賽前舉起 「Für fangerechte Anstoßzeiten」叫足總企係球迷角度諗下，週中有比賽唔係問題，問題係你都要比上班族夠時間趕去球場架！
到我地搵到自己個位坐低後，發現一個好大既問題，我地前面有個擋波網！！！！ 平時我真係唔介意有個網係前面，但唔知點解呢個網好討厭… 再加上啲霧係咁飄入球場令能見度下降，完全擋住左我望北看台！ 係，波我睇，但球迷我都一樣要睇囉。 坐左十分鐘左右襯啲人企哂起身睇加柏既攻勢，我地鼠左去高啲既地方搵位坐，無網擋住既視線好好多！！！
頭先講過加柏既主要打氣看台係北看台，主要組織叫 Sottocultura， 佢地同其他球隊最唔同既就係佢地好少可會係比賽期間 fing 旗，只會係賽前有幾枝旗。自從四月佢地比球員既清潔工「唔小心」整爛左佢地賽前準備既 choreo 後，球迷同球會一直都鬧不和，雖然班球迷都仲有繼續打氣，但看台前面就收起左好多橫額，得返 Sottocultura 既大名掛係前面。
而我地身處既南看台既球迷同樣激動，郁啲就企起身睇攻勢。 全場係咁跟住啲人又坐又企，有時比對面攻緊無野好企啦，點知到北看台班友叫人為球隊企起身打氣，真係唔知笑定喊好….. 我地前面有對夫婦，個女人睇得好肉緊，見到連老人家都咁激動好正，但有時真係唔知佢激動啲乜。我地身後有戴住利物浦頸巾既球迷，我先醒起利物浦同慕遜加柏係好朋友，慕遜加柏每年都有一班球迷會趁歇冬期去晏菲路睇波。
今年年初我地去過睇利華古遜主場，但當時佢地既球迷組織同球隊鬧緊交所以無人打氣。 今場波先算係我地第一次睇佢地既球迷。 我地入場時佢地無咩特別打氣，就連旗都無枝，我以為佢地組織又唔算大，可能係咁上下。 大約二十分鐘佢地突然好開心咁歡呼，見到一大堆人擁去客區底，開始好多人舉紅黑旗。 原來佢地球迷組織既巴士都因為塞車搞到遲到 （遲二十分鐘算係咁，我地試過半場先到！）。 當鼓手同 Capo 到場後，佢地既聲勢即刻大返好多！！！！
場上面主隊既攻勢明顯多過客隊，但主隊硬係差埋門一腳做唔到浪費哂啲機會。時間過得好快就半場，原先我地打算五點幾去到球隊可以食埋野先入場，最後乜都無食就奔左入場，所以我地趁半場完前一分鐘就已經走左出去買野食。 好難得有德甲既球場係唔洗買預付卡先可以去買野食！！！ 我地買左一份薯條同 Pizza，望住球場外圍慢慢享受久違既 stadium food!
慕遜加柏既球場大得黎十分之簡陋，係一個極之實而不華既足球場。係德甲得少數球會真係全資擁有自己既主場，慕遜加柏就係其中一隊。 Borussia-Park 係由球隊自己投資去起，所以佢地㨂左最平既 proposal 去起自己既球場，絕無任何花神！ 有啲小食亭亦都只係以美食車方式經營，唔洗特登起間屋比佢。
成個球場最靚既反而係佢地既綠色射燈，簡簡登登既設計即刻令到球場有啲特色！ 講起綠色，慕遜加柏既主色係黑白綠，好多球迷都會著上相關顏色既衣物，連全綠色既羽絨都有！！！ 係場內好容易就見到啲全身綠身既綠衣人 😀 場內仲有好多頭戴綠帽既人走黎走去…… 我諗真係得外國人先會敢戴綠帽！ 當晚我都㨂左頂灰綠色既冷帽黎戴扮下球迷 ._.v
食飽左我地就返入去等開波，見到作客球迷舉起一大塊布遮住自己，諗住有野好睇！！！！！點知舉左一陣佢地就收埋左，以為佢地玩野。過多陣佢地真係燒 pyro 啦！！！！好開心一返到德國就有 pyro 歡迎我～～～ 燒左五分鐘放紅煙既煙花佢地就拉返塊大布出黎，意思即係玩完。
下半場慕遜加柏轉攻北看台，所以南看台少左企起身。 七十分鐘被客隊剛換入黎既 Bailey 破網射成 1：0…. 作客球迷當然好開心咁慶祝，仲唱埋加柏球迷平時會唱既慶祝歌黎笑啲主場球迷。落後一球既慕遜加柏開始強攻，球迷越黎激動。有一下個波飛向住利華古遜既後備席，主隊既球員就衝過去想執波拿拿聲 dum 界外球，點知利華古遜個領隊 Herrlich 見個球員向佢衝埋黎時竟然插水訓低！（後來睇重播個球員掂都無掂到佢囉） 後備席後面既 VIP 區觀眾即刻超激動，好多人向佢 dum 啤酒，有一杯勁準咁中左 Herrlich 個頭！呢件事而家係德國變成熱話，足總仲話要調查 Herrlich 插水仲可能會作出處罰。
好可惜主隊送到個波去前面就係無人踢到個波入網， 最後只有出局收場。完場後，有唔少主場球迷（特別係北看台）既球迷都有留低唱歌鼓勵班球員。晉身八強既利華古遜就當然都有留低同球員一齊慶祝啦。 睇左一陣我地都要趕返去拎車返屋企訓覺，但因為客區外既大閘關左，我地被迫要兜勁遠先可以搵返原先條路去 P7 停車場，最後行左大半個鐘先拎得返架車 -_- 拎左車要再係停車場入面慢慢塞出去，上到公路都係一路塞車塞到離開左 Gladbach 先可以真係比油飛返去，最後十二點半先返到去…… 認真，去外國睇波非必要真係唔好渣車，係德國睇波仲可以免費搭當地公共交通工具，真係唔好好似我地咁蠢……
睇完呢場波就真係歇冬 lu, 我地都要收拾心情去準備慶祝聖誕同新年啦！！！ 😀