23.09.2017
香港社區盃
傑志 對 東方
旺角大球場
賽果： 2:1 (1:0)
入場人數： 3,486
更多相片

從首爾返香港後唔夠兩日就有波睇！今場波唔係聯賽，而係香港 N 個盃賽中既其中一個。 傑志對東方既戲碼係近期香港最有話題性既賽事，而今場波就係兩支球隊既主場 － 旺角大球場 上演。

入場後撞到朋友佢先話我知原來啲波飛可以上馬會個網登記定唔知點，就可以免費入場… 不同我地當日比左 80 蚊入場…. 當時已經接近開波，兩條邊線旁既看台已經比雙方既球迷佔據左。 我地呢啲入場為左食花生既假球迷就㨂左去我最中意既座位 － 龍門後最後一行。

一開始我地坐係近正門既龍門後，左邊就係傑志球迷既看台，大半個看台既前後都掛上深藍配淺藍色既橫額。傑志可以話係近年既香港聯賽班霸，有好既成績亦都好自然吸引到越黎越多球迷支持。 藍浪打氣團聚集係 28 區底，佢地唱得最多既包括「Kitchee all the way」、「We love you Kitchee, we do」同埋用 「Hey Jude」 哼出既歌。

而係主看台 VIP 區側邊就係東方球迷既看台，佢地無傑志咁多橫額，睇落唔係好多人，不過佢地都有幾塊印有球會會章既大旗。 球員入場時，部份東方球迷舉起印有球員名同號碼既藍色紙牌，有一部份就舉起球會頸巾。同將軍澳果場波一樣，雖然佢地歌唔係特別多，但佢地全場都無間斷咁打氣。中間仲用左好多唔同既打鼓節奏，唔係淨係得 拍拍拍，東方，拍拍拍。

傑志係 32 分鐘先入波領先，開左季差唔多一個月都仲未贏波既東方係場上真係差咁啲。 唔知點解傑志領先後，佢班球迷反而靜左落黎。我地既位置係近傑志多啲，但聽落東方球迷既聲勢反而更大。 原本諗住係因為傑志球迷打氣既方向唔係向住我地既看台 （東方就係向住正門方向打氣），所以有咁既分別，但後來我地換左位好似都係無咩分別。 下半場太陽開始落山，我地轉左去大電視底坐，由山景邊個城市景，旁邊果位德國鄉下人又係咁大讚 amazing。

東方後來追和，兩邊既球迷終於又開始出力打氣，但傑志好快就射入第二球。之後傑志開始著重防守，又 dum 下波鐘咁，東方球迷當然不滿啦，有幾個人仲走左落去周圍鬧。 一如以往，臨近完場時好多人就已經慢慢離開座位向出口方向行，等自己一完場就可以即刻走人。 最後傑志以 2：1 贏得社區盃。我地睇完雙方球員走向各自既球迷之後都慢慢離開球場。

間唔中都有人問我地關於香港波既野，例如去香港既話睇邊場波好；我地都會話如果淨係可以㨂一場既話，係有選擇既情況話一定係㨂去旺角場睇波。如果想睇氣氛波既話就㨂港隊或者有傑志份既賽事，唔計港隊，傑志的確係係香港黎講有最大既 fan scene，加上佢地既球迷近年有唔少機會可以跟球隊去亞洲其他地方作客，應該可以係其他球迷身上學到越來越多野。

呢場波應該會係我地近年既最後一場旺角波，期待下次再有機會入場時可以有驚喜～～