20.09.2017 南韓職業聯賽 K League Classic 第 31 週 水原藍翼 對 濟洲聯 水原世界盃球場 賽果： 2:3 (1:2) 入場人數: 5.036 (約 100 名作客球迷) 更多相片
三月尾我地訂左機票八月返香港幾個星期之後就開始搵下平機票，睇下可唔可以平平地去第二度玩幾日。有一日見到啲廉航開始有 promotion，諗住去泰國或者台北都好！ 用左一晚時間睇酒店睇極都睇唔岩，班機啲時間又差（晚去早返，蝕左兩日！），又撞唔正比賽日。煩左一晚都係訓個覺冷靜下先，如果第二日張機票仲係咁平我地就買啦。第二日，我又手痕再睇下其地地方，等到 P 一返黎我同佢講：唔去泰國同台北啦，我地去首爾吧～ 佢第一句就問： 有無波睇先？
雖然我地自己成日話有無波睇唔緊要，去個旅行輕鬆下都好，但講到最尾去到一個地方無得睇波真係爭咁啲！ 係我睇中左去首爾班機果時，已經同時 check 左我地在韓既時間係會有波睇既～～ 我早兩個暑假同朋友第一次去韓國，當時都睇左一場波… 但只係 K3，仲要睇到一半聽到隔離棒球場氣氛好正所以我地走左佬，所以我一直都唔當自己係韓國睇過波。最後我地就訂左去韓國四日～
出發去韓國前我地上左廣州，一開始仲完全唔記得左一朝早要入機場，仲諗住去深圳按個摩夜晚先返香港！ 星期一我地好早就入機場，下午十二點鐘抵達首爾～ 頭兩日我地都係去行街食野咁。 韓國啲野食好大份，每次都食得好開心～～ 星期三我地去左明洞行，因為明洞有巴士可以直達水原市 （仲要好平～）
連埋塞車我地一個鐘內就到左水原。落車後向後行幾步就已經見到水原既世界盃球場，只要朝住球場方向，經過幾個停車場，行大約二十分鐘就到球場門口。 我地預早左差唔多三個鐘到水原市，加上球場附近無咩特別，人影都唔見多隻。 我地係場外搵到售票處買飛 (14,000W 一張）之後就係球場外圍散下步，順便搵下返首爾既巴士站。
聽講韓國周圍都有 cafe，好多人都中意飲咖啡。 我地係球場隔離搵到間 cafe 就買左杯熱咖啡坐係門口安安靜靜咁望住球場 hea 下，仲可以睇住個太陽係球場後面落山～～ 我地發現原來係正球場旁邊就有個來往首爾既巴士站！！！ 即刻上網 check 下班次， 我地完場後要急急腳咁奔跑去巴士站就可以唔洗等一個鐘先可以離開…. 又或者唔洗等一個鐘既，但要搭巴士去地鐵站再轉唔知咩車先可以返到酒店…
九月係香港既天熱仲係好熱，但係首爾係清涼到爆！ 呢場波係入黑先開波，好在我地準備左風褸擋下風，因為係球場入面坐耐左真係會凍！ 入場前我地買左條頸巾做紀念，條頸巾要差唔多 165 蚊一啲都唔平… 佢地又要無 fan stand 可以比人買球迷自制既用品，點都好啦，反正做遊客就預左要花啲錢。
入場時保安無話好嚴格，好多人都背住個大背包入場，同日本一樣好多人會自己帶野食入場。 無野食帶入場？唔緊要，係場內可以買到即食麵！一入場就見到三大個裝住熱水既大鐵筒，比球迷可以係球場入面整即食麵…. 德國人見到即刻笑到收唔到聲，佢話呢啲係德國無可能出現。 德國人係球場入面一激動就會掉啤酒，你想像下如果個個都有兜杯麵係手………
我地早入場，所以場內仲未算多人，不過已經知道最後既入場人數都唔會多得去邊。 一來球場上層掛哂超巨型廣告，即係上層唔會開放。 二來週中夜晚開波，我估就算啲球迷想黎都可能要 OT 最後黎唔到..
水原世界盃球場，睇個名都知道係為左 2002 年世界盃而起，容納人數近 44,000 人。（好可惜最後得五千人入場） 以我地所知，即使佢地輸出到唔少有質素本地球員去外國高水平既聯賽比賽，但本地聯賽一直都未能好似棒球咁咁受本地人歡迎。 好多韓國既球隊都係由國內既大公司擁有，啲大公司對球隊有好大既話事權，例如呢場波既作客球隊濟洲聯既原名為 油公象 （Yukong Kokkiri），使用東大門體育場為主場，後來改名為 富川 SK 同將主場搬到去富川 （Bucheon），最後再搬去濟洲島成為而家既濟洲聯。 唔係有大公司係背後話事，啲球隊點樣可以搬黎搬去？ 而水原三星藍翼的確係由三星公司成立，球隊成立後就立刻成為 1996 年 K League 既第九支球隊。 呢一類「商品」球隊同德國既廠隊分別在於，利華古遜或禾夫斯堡等當年係用自己既員工成立一隊波，後來同其他球隊組織聯賽慢慢變成現今既聯業球隊。 不過又唔可以咁樣用唔同國家直接去比較既，係韓國，或者香港，甚至係日本等，啲球隊有時無財團既參與既話真係好難靠自己可以吸引到球迷。
因為水原藍翼既主色係以紅藍白為主，所以佢地既外號亦叫三色 （Tricolor）。入到場後望下邊個看台掛住一大塊 TRICOLOR 既橫額就知道果個係佢地既球迷組織 Frente Tricolor 既打氣看台啦！下層看台既上上下下都掛住好多唔同既 Banner，例如 Azul Viento、Avalancha、Muchachos、Blaues Herz-Ultras、Nordkurve 等等，一大堆外文名，唔係西班牙文就係德文，又或者其他我唔識既語言。 得罪講句，洗唔洗崇外到咁 0.o 仲自稱 Barra… （小小資訊：Barra brava 係南美洲用黎形容類似 Ultras 既組織，但係南美洲 Barra 既成員唔只係球迷咁簡單，簡單講句，比流氓更流氓）
佢地既北看台開波前變成一大遍旗海，睇落好有氣勢，只係係相機鏡頭 zoom 埋去先會睇到佢地其實企得好疏。人少唔緊要，最緊要聲夠大！ 的確，佢地人唔算多，但聲勢真係幾強！ 佢地既 Capo 用鐵梯放係通道中間自制 Capo 大台… 淨係呢個創意都已經要加分啦！
老實講，我地知道韓國唔多人入場睇波，對呢場波都無話期待啲咩，但正正因為我地唔會要期待啲咩，開波後真係好驚喜。 北看台一開始真係個個都一齊唱歌，而佢地既鼓聲同歌都偏向南美風。 之後就得返中間 Frente Tricolor 成員唱，但佢地一直唱無停過，間唔中仲可以帶返起其他人一齊繼續唱。
賽前我地都無諗過會有作客球迷，就算真係有咪可能十幾廿個。 最後竟然有 100 人係作客看台出現！ 唔知有幾多人係真係由濟洲飛去水原睇波呢？ 我估應該好多都係係附近城市工作既球迷黎支持自己「家鄉」球隊。 佢地係看台前掛上左兩大塊橫額，一塊叫自己隊波 Shoot for Asia，另外果塊加埋看台上果塊都係寫韓文… 唔識睇所以唔知佢地講乜！佢地人少少但都有人帶鼓入場，無人唱歌但間唔中一齊叫下濟洲打氣。
濟洲係開波十分鐘就已經借對方龍門犯錯射入第一球，五分鐘後再黎個靚波破網，輕鬆領先二比零。佢地係聯賽榜上既排名唔差太遠，兩隊波都要贏波爭分爭亞洲賽既席位！ 半場前水原成功追返一球，球場既射燈即刻係咁閃閃下慶祝入球，我地完全唔知比咩反應好，無啦啦比人閃！
半場休息時我地去左第二個區坐，實在頂唔順原先坐我地前面既幾位係咁尖叫既痴女。 下半場開波時，水原既球迷係北看台舉起「No Respect – Korea Football Mafia」 既橫額向南韓足總抗議。 果然係每個國家都唔會滿意自己既「政府」，可惜我地無咩留意韓國足球既新聞，唔知佢地為咩事抗議。
過多一陣，北看台突然開始唱一首好熟悉但又一時 up 唔出既歌。 望下看台頂既大電視寫住「Despacito」，呀！原來就係早排電台成日播既西班牙文歌… 一開始以為佢地係度唱流行歌，但見到大電視下寫哂韓文既歌詞出黎，睇黎班球迷將 Despacito 改詞成為左藍翼既打氣歌！ 仲要可以係大電視放埋歌詞出黎比其他球迷跟住唱。此舉真係唔知到底首歌係官方改詞所以可以放上大電視，定係球迷同球隊關係好到可以令球隊幫佢地用大電視宣傳自己既打氣歌呢？ （其他打氣歌係唔會出現係大電視，只有 Despacito ）佢地唱左好耐，即使濟洲聯射成 3：1 佢地都繼續唱。
我地有拍到片想同大家分享，不過當時前面仍然有一堆女仔係度尖叫，所以我地打算用其他人 upload 上 YouTube 既短片：
[Credit: ekdmz: 2017.06.25 Suwon vs. Gangwon – Frente Tricolor Tema Nuevo „Despacito“]
係網上面都搵到歌詞既英文版：
“You are the only one that makes our heart proud
We, FRENTE TRICOLOR, are now here
Let’s get into the rhythm with running heart
Bluewings, Suwon, We, You and me
Fight and go towards our dream
I feel free in my blue heart
And we’ll make our love and dreams come true
We’ll walk this road in storm
For our waiting dreams
Full with songs of you and me
We are TRICOLOR with our friends, our songs, our stories
Bluewings, we are here with our love, our songs and our tears”
歌詞入面有提及到球迷組織既名 Frente Tricolor，可能真係佢地自己改完詞再叫球會幫手宣傳！ 無論點都好，佢地竟然可以咁多人一齊唱哂成首歌出黎，仲要不停咁唱唔停口。 香港幾時有人可以改返啲靚詞，寫返啲好聽既打氣歌呀～～～～
K League 原來都有用視像球證，我地都係第一次現場睇波時見證到出動視像球證一刻。 球證突然吹停場波然後走去場邊睇電視，佢睇啲乜完全無人知，而場內既電視亦都唔會播佢睇緊乜，完全係打哂問號…. 去到 83 分鐘，三色入波追成 2：3 ，射燈一路閃，球迷就一路慶祝，仲有起碼七分鐘比佢地追多一粒。最後濟洲聯靠球證（我地覺得） 好好彩咁成功取得三分。
客隊球員好開心咁走向南看台同果 100 位作客球迷慶祝，同時主隊球員亦都走去北看台向一直為自己打氣既球迷致謝。 睇多一陣我地就已經要離開球場，由完場到巴士班次開出我地得大約十五分鐘時間，仲要兜大半個圈先會見到巴士站！ 見到巴士站時已經見到我地要搭果架巴士係度等緊，我地即刻保特上身跑去上巴士。 雖然趕頭趕命，但上到車定下來果一刻就覺得我地趕呢班車係無錯既… 我地呢啲懶人除左睇波就淨係想食同訓，所以早啲返到酒店都係一件好事！
後來 P 日日都係度講首 Despacito ，原本佢已經係電台聽到厭，但因為班韓國球迷唱出水原版本令佢又重新中意呢首歌！ 賽前我地真係完全無諗過呢場波會有咁大驚喜，講到係亞洲睇波 K League 一定唔會係首選，但係係一個必睇之選！