16.09.2017 中國超級聯賽 第 25 週 廣州富力 對 北京國安 越秀山體育場 賽果： 2:1 (1:0) 入場人數： 10,268 人 （約 300 名作客球迷） 更多相片
有位支持北京國安既朋友每季都會趁國安作客南部球隊時就會上大陸去睇波，上季佢都叫過我地去睇，不過最後因為我唔想係廣州過夜所以最後未能成行。 今次國安作客富力咁岩我地又係香港，而 P 又想睇下越秀山變到有幾金，所以最後我地就上去廣州啦！
唔係朋友講我地都唔知，原來外國人可以係香港申請中國簽證（唔係如政府網站所講既一定要係自己國家申請），申請過程十分順利，四個工作天就可以拎到單次入境簽證，盛惠港幣 200蚊！（係德國申請最平都要 65 歐，郵寄申請要超過 100 歐！！！！） 有簽證後我地就可以買車飛啦。
我地㨂左坐直通巴去深圳灣轉車再上廣州，一黎平，二黎上落地點方便。雖然車程慢一個鐘左右，但我地好中意遊車河睇風景所以坐耐少少都唔怕！ 當日我地出去食完早餐就上車，好快就去到深圳灣過關。 轉車後坐多兩個鐘左右我地就到左廣州天河區！ 我地先去酒店 check in，放低啲野休息一下先再出去。原本我地諗住去做下遊客既…. 但撻左落酒店張床就唔願起身，最後 hea 到最後一刻先出門口向越秀山出發。
支持國安既果位朋友原本係可以幫我地買作客區既飛，但我地想坐可以睇哂主場同作客區既飛，所以最後要自己去門口買飛。上網睇下一張飛大約 80 人仔，睇定個價先驚比人呃嘛！ 係地鐵站一出去到球場門口都有超多阿叔阿嬸係度賣飛，佢一開價就話二百蚊兩張，唔識講價既我就話一百六十（原價），佢勁快咁話好！ 好開心以為自己原價買到飛，拎到飛先知原來呢啲飛係免費飛黎，即係就算賣廿蚊張佢都有賺 >_> 不過買到真飛已經唔敢要求咁多…. 反正原本都係諗住要比呢舊錢，唯有下次學精啲！
場外有條長街，好多人開波前去附近食野，我地睇左幾間都唔敢入，最後去左一定唔會有錯既麥當勞！食飽我地就入場了，經過一個門牌，上面用超核突字體寫住 越秀山體育塲 （係塲唔係場，有無人話我知係我唔識字定咩？我上網搵過又好似唔見有人講） ，check 飛，做安檢，行條長樓梯，人迫人咁迫上去球場，終於親眼見到呢個金色球場。
之前上網睇過相覺得成個球場變金色好老土，但親眼見到個球場時唔知點解覺得好震撼。個球場遠睇似黃色多啲，要行到埋座位先睇到啲位係油左金色。 最搞笑係個球場而家變左金(/黃)加綠色，搞到好似國安主場咁。 個球場睇落好大，睇真啲其實佢地每行都好高，再加上場內只得三面看台， 最後球場容納人數只係得萬八人左右..。
當我地入到場時，國安既球迷已經全部入哂作客區。係中國有作客球迷對德國人黎講其實都好意外，佢地無諗過啲中國人會飛（或以自己方法）超過二千公里去睇場波。 唔係淨係講距離，要諗埋佢地既收入比例，當你搭火車一張來回飛都應該要幾百蚊啦？如果想慳時間搭飛機咪仲貴？
德國球迷好著重球隊既歷史，當 P 返到去睇下富力既歷市之後成個頭都打哂問號。 原來廣州富力係於 1986 年以瀋陽市代表隊之名成立，顧名思義就知呢隊波既主場一開始係位於中國東北，後來有間叫金德既公司入主，再將隊波搬左去長沙。 跟住又有另一間公司買左隊波，又將佢地既主場搬左去深圳成為深圳鳳皇，最後被富力地產收購成為廣州富力。 唔知廣州富力呢個名又會存在幾耐呢？
我地要兜大圈先去到我地劃左既位，但因為我地個位太近作客區唔係好影到相，所以我地再走遠啲去左球員通道附近。 我地諗住企係欄杆前面等下，有保安即刻走過黎叫我地唔好企咁近，後來我地先知原來啲球員會係我地下面行過，包括果啲身價幾千萬既外援。 好彩佢無趕我地走，睇到球員入場後雙方球迷都開始 fing 下旗同打氣，影左幾張相我地就去搵位坐。
一開始雙方球迷打氣都睇落有聲有色，富力球迷區睇落好似好多人，但我地估計大約只有 100 至 150 人打氣，而國安就有大約 50 人左右。 兩班人打氣唱歌好多時都係唱一兩次就靜左落黎。
上次係北京我地唔係好聽得清國安其中一個 Ultras 組織 御林軍 打氣既聲音，今次我地特登坐近啲佢地想聽下佢地打氣。 三月係工體見到佢地既旗海睇落都似係抄歐洲 Ultras 文化，而今次聽埋佢地既歌，同樣地好多都係我地係歐洲聽慣聽熟既節奏。 （無話好定唔好，好多歌都係大家抄黎抄去）當日係廣州，國安球迷睇落既氣勢都好強大，係作客區底掛起左幾十枝大大小小既旗，最前排有一班大約 50 個著住黑衫既球迷一直打氣（當中有唔少係女仔）。 加埋其他作客球迷雖然得大約三百人左右，但對比有主場優勢既富力，國安球迷既聲勢比富力高好多。 （國安仲要無鼓帶入場！）
開左波超過十五分鐘都仲見到好多人入緊場，咁遲先入場好似唔係好緊張場波咁。 今場賽事對兩隊波都好重要，因為佢地要贏波先可以繼續去爭亞洲賽席位。 而呢場波既水準都幾高， 果啲所謂千萬球星就算把啦，我都唔知有佢地落場踢到底幫到隊波幾多。
富力係 29 分鐘射入第一球。唔知係咪因為大台開咪時都會用廣東話 （有時會有普通話，有時只有廣東話），令到我不自覺地希望富力贏，感覺同聲同氣！ 廣州人睇波都會 diu diu 聲好正！ 不過球聲喇叭好 q 大聲，每次佢一開咪我都嚇到跳一跳。 半場休息時果啲廣告聲仲要再大聲啲…. 我地真係以為自己對耳會聾！！！播完廣告就有一堆女人係場中間跳舞，勁多人衝去最前拍片影相囉…………
下半場終於開始，去到 62 分鐘國安球員突然黎一個笠射仲要入左，入波果刻我地都未反應得切，聽到作客球迷慶祝先反應到問發生咩事，因為呢個笠射超靚！國安追和後，佢地既球迷開始落力打氣。不過八分鐘後，富力射入第二球令國安球迷靜落黎。
去到近八十分鐘，好多人開始起身向球場出口行，但佢地又唔係提早走人架喎！所有人都係慢慢行，好似計好哂行十分鐘左右去到正門出口，等到一完場就可以即刻離開。 （好似係旺角場果堆阿伯咁，完場前圍哂係出門附近）
完場後，富力球迷慶祝既同時，被逼留係作客區內既國安球迷就為自己既球員鼓掌表示支持。我地睇多一陣就離開球場。 原來看台最頂有好多個出入口， 行到最頂再望返落個金色球場，都係果句，好震撼！離開球場後我地其實唔知點解走返落山，啲人又散得勁快無得跟人走。 最後我地係公園入面行左超過半個鐘先落到地面見到地鐵站既指示牌。
我地對中國波既認識真係唔多，唔識人亦都唔識用大陸網去搵多啲資料，但中國既球迷文化的確係幾有趣，見到佢地好努力咁學其他國家既文化，令我地賽前都會好期待入場見識下。 但入到場總係不如所料，每樣野都硬係爭咁啲。
三月我地會再去香港，如果到時中超開左 league 時間又許可的話我地會可能再睇多場波 ^^