15.09.2017
香港超級聯賽 第三週
理文 對 東方
將軍澳運動場
賽果： 3:2
入場人數： 693 人

黎到港超既第三週，我地去左將軍澳睇今個比賽週末既第一場波，去左幾次將軍澳都仲係要研究一陣先知點樣行去運動場，今次我就經商場行去天橋就可以直達運動場外果條街 （希望下次仲會記得呢條路！） 買飛時會經過單車場館，可以比 P 見到場外「請勿踏單車」橫額 ^^

我地六點左右出發，諗住可以係將軍澳既商場行一陣街先，最後係商場入面迷路搵唔到條橋，好在趕到係開波前到達。看台望住坑口方向既一個大型屋苑，對外國人黎講又係一個特別既球場夜景。（有大型屋苑係附近亦即係代表呢個場禁鼓 >_>）

因為差啲遲到所以入到場見有位就坐，最後我地坐係理文球迷區後面。而東方球迷就係看台既另一邊，睇落都有唔少人，睇落都係一個小藍海。佢地無咩歌唱，但係佢地有好多唔同既 beat ，每一兩分鐘就轉下beat 咁叫足全場。雖然理文係主場，不過呢隊空降港超既球隊仲未有好多球迷，只係有人拎住 bom bom 捧間唔中帶頭叫理文。好多時候我地都淨係聽到東方果面既打氣聲。

東方上季同傑志要去到聯賽最後一日先分得出冠軍，雖然最後衛冕失敗，但都叫做聯賽第二呀，無諗過去到第三週都得零分。開波十七分鐘左右，理文突然黎個遠射仲要入埋；半場前再入多球領先二比零。原本以為呢場波都差唔多，下半場一開始理文都無再話急住要攻。東方追返一球之後好快又被理文射入多一球，但主隊又好快輸左球十二碼。最後理文既球迷開心慶祝今季首勝！

今場波有何柏霖同我地一齊睇波，佢岩岩去完德國睇左幾場德甲，我地就一路睇住本地波，一路分享德國既睇波心得。完場後我地就行返去搭地鐵，趕住返屋企執行李，因為第二日一早我地要做小明上廣州！