10.09.2017
香港超級聯賽 第二週
元朗 對 理文
元朗大球場
賽果： 1:0 (0:0)
入場人數：1.260

尋日山長水遠去左香港仔，今日就走左入元朗睇波，好在青衣有車可以由青衣城直達元朗大球場後面條街，可以比位德國遊客遊下車河坐巴士上層第一行見識下有牛既地帶:-P 每次同佢坐車去啲遠少少既地方，個感覺都好似小學生好郊遊旅行咁，佢成日話以為香港周圍都係高樓大廈，無諗過有啲地方係只係山同樹。

呢個球場正正就用左佢講既野，一邊係元朗公園座小山，另一邊就係石屎森林。落左巴士之後行幾步就可以入場，要記住普通球迷係唔可以由球場正門入場，一定要向泳池方向沿住球場行，中間有條路仔行到尾先會見到有售票處。今次係我第二次黎元朗，上次入場前有位阿叔送左張免費飛比我同朋友，今次入場時有買一送一優惠，除返開每人只需要比 30 蚊。

元朗大球場有兩個看台，一個係有蓋既主看台，對面就有個無蓋看台。天氣同尋日一樣又熱又焗，唔明點解有人會㨂對面坐…. 我地襯開波前都走左去對面影幾張相。影完相就坐左係元朗球迷打氣區附近，P 話佢可能會做元朗球迷，因為佢好中意元朗既會徽喎！同其他球隊一樣佢地掛起左好多同自己球隊有關既旗，橙黑色既球隊真係好少見，係德國頭五個聯賽我地都只係諗到  Gera 係用橙色。主場球迷有兩個大鼓，雖然佢地無咩歌唱，全場大部份時間都只係 「拍拍拍，元朗！」，但佢地真係好氣好力咁叫足全場。

客隊理文今季先成立，班費同背後既資金都幾強大。好可惜，係香港搞足球真係要有錢先玩得起。我地見到有人著住理文既打氣衫，不過係看台上乜都聽唔到。

上半場兩邊都把握唔到機會入波，悶悶地咁就完左 45 分鐘。雖然球場有上蓋擋左太陽但都仲係好熱好熱，所以半場要快人一步衝去小食亭買燒賣同野飲。 之後同一個朋友相遇，一齊吹住水咁睇埋下半場。主隊一半場開始踢得越黎越順，去到七十幾分鐘終於開紀錄射入全場唯一入球。

完場後我地向住市中心方向離開，朋友拿拿聲趕去旺角睇傑志，無錢睇波既我地就搵間茶餐廳食 P 最愛既西多士，飲佢最愛既凍奶茶～ 再去街市行下雜貨店，買左巨型衣夾諗住帶返去德國睇下岩唔岩用。（後來佢地真係用左黎夾大旗，慳返好多時間，不過唔可以作客時候用！）迷住路咁 9 行去西鐵站，又係睇風景睇到嘩嘩聲既時候…. 好，去完元朗，就得返將軍澳既遠行…..