09.09.2017
香港超級聯賽 第二週
南區 對 流浪
香港仔運動場
賽果: 2:1 (1:0)
入場人數: 326

雖然 P 黎過香港幾次，但一直都未有機會睇港超。今次佢到步幾日有埠際賽可以先頂一頂條癮，而埠際賽後既第一場波就係南區既主場賽事。事前我知香港仔運動場既主看台要關閉維修，球迷要去對面既無蓋看台睇波，我問左佢好多次係咪真係要去香港仔睇波做燒豬… 佢點都話要去/.\

上次返黎未有機會搭南港島線，呢位熱愛火車既德國毒男表示超興奮可以搭新車，仲要同啲小朋友爭企係車頭睇風景。有地鐵真係方便同快好多，雖然地鐵站無巴士站咁近，不過都只係需要行五分鐘左右，穿過個小公園，經過體育館就到球場。

當日真係又熱又濕又曬，平時幾熱都唔會帶遮出街既我都覺得應該要帶返把去擋下太陽。入到球場見到跑道外既欄杆後有幾個帳篷，我估係用黎比球迷擋下太陽，不過視線有點差。行到去對面個看台我先知原來係銀色金屬類既看台黎（好似街場側邊果啲），就算開遮都無咩作用，因為太陽曬熱左個看台，啲熱會係個看台上蒸返上黎。

坐左二十坐鐘左右開始頂唔順，走左去門口附近既帳篷下面睇波。當時亦都好嬲南區，唔明點解佢地要咁對自己啲球迷！後來先知原來係足總唔比佢地係看台前面搭帳篷，話會阻住球迷既視線喎。而南區其實都明白要球迷咁樣曝曬睇波好辛苦，所以都有叫球迷可以留係屋企睇直播，而入場既球迷亦會有一枝免費飲品。

去到帳篷下即刻舒服返少少，啲雨雲都掃緊過黎間唔中擋一擋個太陽，又有落雨前既陣風降下溫咁。個天越黎越黑，到半場左右就開始落雨，然後大雨到連海洋公園都見唔到。南區係入左波呀，但個個忙住搵個乾既位，入波都唔得閒慶祝。半場休息時幾乎所有球迷都去哂搵有蓋地方避雨，下半場開波時個天清返啲有部份返去銀色看台，不過有好多人都留返係近門口位置睇波。

下半場一開波南區射入第二球，去到六十分鐘左右個天又開始倒水，然後流浪就悄悄追返粒，同第一球一樣無人得閒理。南區死忠班球迷已經豁左出去，濕住身咁留返係看台打下氣。去到尾段兩面都求奇踢，有波就放上去搵人追就算，最後 2：1 完場。

離場時雖然都仲有啲毛雨，但啲雲開始散，香港仔隧道方向仲有彩虹！今場波有三百幾個球迷入場，真係 massive respect。 呢啲果然係真 South粉！