05.09.2017
亞洲盃外國賽 第三圈
澳門 對 印度
澳門運動場
賽果：2:0 (0:0)
入場人數： 600 (50)
更多相片

雖然澳門同香港只有一個鐘船程之隔，但一直都唔想為左場波就比幾百蚊自己一個過大海睇啲無咩氣氛既波。今次終於有伴同我一齊去澳門，去賭場買大細開圍骰贏左錢笑住走，入場睇波仲要唔洗錢，可以話我地係淨賺返咁香港～～～

原定行程係想係澳門過夜玩下個水上樂園，但當地比天鴿打到散哂，好多地方都爛哂咁，最後決定即日來回就算。去到澳門亦都覺得我地既決定係無錯：一落船行出街就見到行人路上有幾架爛車疊埋一齊，仲有好多爛樹擋路，感覺好差。我帶住 P 去遊客區睇下舊樓（反而無事），去大三巴前面條街係咁試食食到差唔多就過去氹仔睇下啲新啲既酒店。

係賭場玩左陣就出發去球場，以為自己趕唔切所以坐的士去。去到場外我地先影幾張相，然後就跟「澳門隊球迷」既指示牌入場。門口有兩個保安檢查我地既背包同袋，然後有兩個後生仔就比左張飛我地話入得。張飛上面寫住「免費」，免費入場呢個真係意料之外，以為點都要比十蚊廿蚊。

入到場內，望到對面個看台覺得幾靚，球場後面仲有銀河酒店做背景。然後望下兩邊，嘩………. 看台上得一個人，仲要係外國人黎。我地知澳門波無咩人睇，上次有朋友去澳門睇聯賽得二十人入場，但我地無諗過代表隊可以無人睇到咁。望下望錶，仲有十分鐘先開波，心諗，可能澳門人中意超準時入場呢….. 個球場其實幾靚，不過廁所無手洗手。打完風後球場上蓋有啲爛左，某幾行仲有勁大氹積水，有道大閘仲爛埋。

我地行去龍門後諗住影多幾張唔同角度既相，個外個人都跟住我地一齊行。我地估佢都係 Groundhopper。影完相我再望下錶，應該差唔多開波。係呢個時候，我就發現有啲唔妥…. 點啲開波前啲教練仲拎啲飛碟出黎放既？ 我問 P 覺唔覺得奇怪，我問佢係咪六點半開波，佢話「我今朝再睇多次，係六點半開波。」 我叫佢拎張飛出黎睇，張飛寫住七！點！半！ 我即刻怒啤住佢，佢都即刻話「我真係今朝睇左係六點半架…… 仲寫低左……」

早左一個鐘入場唔係問題。問題在，我地以為唔夠時間所以野都未食就奔左入球場先！！ 回左神之後就開心返少少，仲有一個鐘開波即係我地可以出返去食野。 澳門運動場係觀也街附近，我地出返去沿住球場外行十分鐘內就到左觀也街。最後我地只係去左間茶餐廳食返個飽，飲杯檸樂降下溫，夠鐘先再慢慢行返球場。門口個保安已經認得我地，連袋都唔睇就叫我地入去先唔洗跟人排隊。

第二次入場，場內正常返好多！ 起碼終於有人入場，仲有班印度人係另一區尖叫打氣 （唔明點解啲女人咁中意尖叫 woowowowooWOOOOOOOAHHHHHHHHHHH)。 好多年輕人入場，唔似香港咁好多阿叔。聽到有幾條友間唔中係度講香港，後來仲無啦啦唱「澳門隊勁揪」，咩料！

有幾個著住澳門波衫既外國人入場，上半場佢地走左去老遠龍門後到坐，下半場其中一個人走左黎中間係度帶起氣氛。唔記得佢 up 乜，但其中一句係 “Macau, I say Ma, you say Cau. Maaaaa” 然後其他人就和應佢 “CAAAAUUUUUU” 玩左幾次-.- 啲人應該覺得有人帶下氣氛係好事，起碼係場內都啲野玩。主客看台中間有個 vip 看台，落地玻璃仲有超強冷氣。點解會知有超強冷氣？因為塊玻璃起哂霧囉！ 有兩個姐姐要每五分鐘就拎碌棍抹玻璃，唔係啲 vip 會乜都睇唔到。呢個真係要 sosad sosad sosad。

仲有場內既廣播員超級 hea，個喇叭時 work 時唔 work 都算，個廣播員可以因為唔識讀（或者唔想讀）球員名，就叫諗 “player number 11 AAAA… (最後個名讀到一半放棄） is substituted by player number 7″。你作為一個要宣布出場名單同球員調動既人，見啲名難讀唔係應該賽前讀多幾次練下架咩？

澳門係亞洲盃外圍賽被分到 A 組，同印度、Kyrgyzstan、緬甸同組；賽前已經跟左兩場但一分都無。呢場波印度明顯踢得好好多，澳門上半場雖然捱到不失，下半場比印度禁住黎攻後終於係五十幾分鐘失波。印度女人瘋狂尖叫。完場前幾分鐘客隊再入場，印度球迷繼續尖叫同唱歌。

我地 85 分鐘就要離場。睇過咁多場波真係唔係迫不得已都唔會提早離場，但我地買左十點鐘船飛返香港，原本諗住八點半完場仲可以慢慢食埋野先走。點解場波「delay」左一個鐘，唔早走既話驚趕唔到船。就係咁，好突然咁趕頭趕命咁返香港，同時又睇下香港場波既文字直播….