港澳埠際賽 第 73 屆
香港 對 澳門
深水埗運動場
賽果： 4:0 (4:0)
入場人數： 1245

P 一直都好想睇港隊既比賽，因為港隊既賽事啲人打氣落力啲同有氣氛啲。雖然佢今次黎香港有個國際賽週，但咁岩港隊兩場都係作客，好在都仲有個埠際賽比佢睇下。

當日天氣好差好焗，我地早個半鐘已經去到荔枝角，搵左個地方抖涼抖到咁上下先出發去球場。無記錯既話深水埗場上季翻新完黎，個看台啲色睇落好新，但都已經有浸塵舖左係面，唔知點解康文署咁中意將看台油到彩虹咁。入場後搵個較高既位置坐低，賽前兩隊波加看台上既球迷一齊站立為澳門既死難者默哀。

開波後，當我地仲研究緊啲球員既時候，港隊就已經開左齋，然後極速就入左三球波，前面有個師奶問佢先生發生咩事，佢先生話三比零啦，師奶好驚訝咁問：「下！！！！！三比零啦？」 心諗點解可以心不在焉到咁 😀 第四球係我篤緊電話同朋友講十分鐘入三球時入埋…. 港隊入左四球之後都仲有幾次埋門，中柱中楣咁，澳門真係無咩攻勢，係要去到下半場先有少少野睇囉，但下半場掛住同朋友聚舊傾計都無留心睇波 -_-

今場波有打氣團助陣，據我所知有唔少成員跟左港隊一隊去新加坡同馬來西亞作客，所以今場波唔係有好多人。超過一年無睇過港隊既賽事，聲勢無咩點變，不過有幾首 beat/歌我之前好似無係香港聽過，例如下半場佢地突然唱阿積士既首本名曲 ole ole ole ola，原本我都好期待聽下呢首歌由香港人唱會係咩感覺，點知唱左一次就完。可能因為今場波只係二隊出賽既關係，加上又熱又焗，打氣團既人都無出盡力；就如香港影星門神湯都話佢自己只係出左 50％ 既力，就知點解大家看台上無咩聲氣啦～～～

最後想問多句，係咪仲未有人講過 oh we love you 同 the boys in red 係唔押韻？