29.07.2017 德國西南地區聯賽 第一週 SV Elversberg - TSV Eintracht Stadtallendorf Waldstadion an der Kaiserlinde 賽果: 0:0 (0:0) 入場人數: 1.528 (60 名作客球迷)
暑假咁快就過左兩個月，好在七月頭已經開始有波睇，而地區聯賽要到七月尾先開始，中間仲有中國隊黎參戰既插曲，令到呢個暑假既時光過得特別快！
首先係咁意 round up 下呢個暑假 Elversberg 發生左咩事，細共有 14 球員離隊，同時有 11 位球員加盟球隊，多位球員來來去去係地區聯賽係好常見既事；有質素既球員過左一季好容易就比較高級別既球隊簽走。不過都有幾位來自德丙既球員加盟，當然過得黎都已經過左當打時期，但 SVE 既策略正正就係需要幾位有經驗既球員黎帶班後生仔比賽。今季有兩位老將加盟，包括由 Karlsruhe 加盟既 31 歲 Gaetan Krebs；仲有曾經踢過意甲同比利時甲組轉會過黎既 30 歲前鋒 Koffi。
而帶領帶左 SVE 兩季既領隊 Wiesinger 亦都離隊後， SV 成功請到之前帶領過 Kiel 既 Kastern Neitzel 黎領軍！呢位來自 Dresden 既領隊係球員時期從佢家鄉隊 Dynamo Dresden 既青訓出身，係幾隊東德球隊打滾過，最後係 Freiburg 退休，後來成為球隊助教。佢黎到莎蘭第一次接受球會訪問時就已經令人覺得十分討喜－被問到點睇來季走勢，佢話：「嗯，我知呢個聯賽既競爭都唔細，而莎蘭入面仲有另一隊… 叫咩名話？呀， FC Saarbrücken 都好似有啲威脅。」（Saarbrücken 係一隊傳統勁旅，無人會唔識！！） 而早幾日佢都接觸左球迷組織話希望可以同組織成員見面了解下大家。 大家覺得有一位重視自己既領隊係一件好事黎，雖然未確定邊日會見面，有機會我都想可以見下佢，感受下 Dresdner 既霸氣！
我估大家睇新聞都有留意到中國 u21 黎西南地區聯賽踢波，我問左好多次點解咁多個聯賽唔搞，咁岩就係中左我跟開既聯賽？點解 SVE 或者 Mannheim 上年升唔到班？如果升到班佢地就無藉口走過黎啦！因為呢件事我真係好唔開心，19 隊波得 3 隊表明唔會同中國隊對賽；即係 Elversberg 係 16 隊既其中一隊。老實講我真係好嬲，其他球迷當然都反對啦，但佢地主要係不滿德國足總竟然開綠燈，為左錢就可以忘記「地區聯賽」既原則。而我除左不滿德國足總，仲有作為香港人對中國既霸道既憎恨，同埋對德國政府既失望。新聞報紙一邊報導劉曉波逝世既消息，講及中國人權及自由問題，而另一面就係度講德國同中國係足球發展上結盟係度慶祝，幫助中國搞足球夢（當中當然無提到德國會收幾多錢啦），無人問過到底德國係呢件事上除左錢之外仲有咩地方有得著；而呢筆錢德國又會用係咩地方呢？足球夢同大陸送熊貓可以講幾日，但劉曉波逝世登左一日報紙就完；得幾篇報導有提及劉曉波離世引伸到既問題。其他大國因為驚損害佢地同中國之間既經濟利益所以寧願係呢件事唔多講，有呀 Merkel 同 Gabriel 咪公開讉責左中國囉，係呀，中國一定知你讉責左佢啦。幫中國搞人權唔會幫德國搵到錢；搞足球同養只識食同訓熊貓先可以幫德國吸金，我有權既話我都唔會搞人權啦，關我叉事咩！
自從證實 SVE 會同中國隊參賽，我已經同 P 講我今季未必會同佢一齊去睇哂咁多場波。我係香港無得㨂既情況下已經食夠中國屎，黎到德國我有得㨂我唔想再食屎，特別係唔想見到中國點樣用錢去搞我最愛既足球。今日入場前我就講左我會 “Stimmung boycott”，呢兩隻字係球迷界成日都會見到，即係球迷入場後唔打氣去抗議某啲事情。我知一個人杯葛其實無咩意義，而我一個人對球隊都唔重要，不過我一開始同 P 講我唔再同佢一齊去睇 SVE，佢唔開心左成晚，所以我「被逼」入場陪佢，但我會慳返啖氣囉！除非球會之後講明筆錢會用去邊啦（例如全數用係青年軍上、用係球迷上呀，或者捐錢去疆獨機構等等）
Anyway，事隔兩個月我地又仲返 Block C1，波飛會錢無變，都係六歐（特惠價）；球場都無咩點大變，只係看台最後果座小山好似終於開始動工會搞搞佢。食物價錢無變，一入場就已經仆去買返個 Frikadelle 黎食！嗚，球場既味道呀！！！不過野飲加左一毫子囉！用 2,9€ 加到 3€！
今場波既對手係歷史上首次升班地區聯賽既 Eintracht Stadtallendorf，淨係聽個名都知係鄉下球隊，以為佢地唔會有作客球迷，點知佢地總共有六十人走黎莎蘭！！！佢地仲準備左幾枝大旗同一大塊綠白色既橫額「Allendorf Jungs seit 1920」。一開始我地仲笑佢地連旗都唔識 fing，但佢地由開波前就開始唱歌唱到完場幾乎無停過！中間仲有個 Capo 走左上圍欄帶領球迷唱歌… 真心令人大跌眼鏡！可能呢個就係佢地球迷文化成功發展既日子。
場波？今場波係我睇波咁耐最悶既一場波，全部波兩隊加埋總共得十次射門（中唔中目標都計埋）。有一次真係 SV 既必入球，點知竟然彈出一個中堅賓係龍門前擋左個波…… 唉，中後場既組織其實做得唔錯，但最後一腳永遠甩碌。客隊係咁係你有波在腳時就搵 n 個球員圍住你，壓迫到你犯錯就偷波轉攻。場波就係得咁多，無咩好講。
對我地黎講係被悶和失左兩分，但對 Allendorf 黎講一升班就可以係上季有機會升上德丙既球隊身上搶到一分係好大件事！球證一吹證完場，佢地六十條友就係度 YEEEAAAAAHHHHHHHHHH；都未算癲！最癲係班球員之後竟然搵啲球迷同佢地一齊跳 Humba 慶祝！！！！最估唔到既係竟然有千五人入場！過去通常都係得千二千三人左右，今場對無人識既球隊都仲有千五人入場對球隊黎講係一件好事！希望可以慢慢咁升上去～～
下場波係五日後就再係主場對 FC Saarbrücken；呢場原本係第三週既賽事黎，但因為對方係該週要踢德國盃第一圈，所以將場波改主左踢。真心，平常心睇波，當日睇心情先決定幫唔幫手打氣啦。
（唔記得帶相機去睇波，所以只有低質相片）