我遇到個人支持既係德國第四級別聯賽球隊 SV Elversberg，佢由 11，12 歲就同朋友一齊開始開始睇佢自己隊鄉下波，當時每場波得百幾二百人，球場又 up dup，其他人中意睇既係德甲波。後來球隊開始慢慢有啲成績，十年來由得百幾人入場到而家有一千人入場，當中佢有叫平時只係電視睇德甲既朋友同學一齊同佢去睇波，有唔少睇左幾場就覺得同朋友一齊入場好睇波打氣好好玩，然後就場場波都去睇，而家一大班仲成為核心打氣成員，同時佢地亦都繼續係電視前支持自己既德甲球隊。而係市內見有唔少車都貼有德甲球隊既貼紙，有 HSV、FC、BVB 等等。Elversberg 要去到大賽例如打比戰對 Saarbrücken、對傳統大隊 Mannheim、或者到升班附加賽先會滿座。好啦，球場有六千幾人，大家唱 Steht auf, für die SVE，叫大家企起身支持 Elversberg，點知主看台企起身既加加埋埋都唔知有無一百人；得一百人聽落好少，但對Elversberg 既球迷黎講，係由幾個人會配合企起身到有一百個人，係一件開心既事，而唔係只會話「咩料呀，得一百條友肯企起身」。四年前，Elversberg 歷史上第一次升班德丙，球迷以為踢高一級自自然然就會有多啲球迷一齊打氣，但事實話比佢地知唔係。原來佢地係要逐個球迷走去傾計，問下佢地有無興趣一齊打氣，要親力親為先可以聚集到更多人一齊去出聲打氣支持自己隊波。
而我係一個睇外國波長大既人，細個第一次入場睇波係睇皇馬，身邊既朋友講既全部都係外國波，我唔記得我幾時認定自己係一個利迷，但我好肯定既就係，唔係因為朋友或者係新聞成日睇到相關既新聞，我未必會支持呢隊波。後來識到一班有留意開香港波既朋友，佢地間唔中會叫埋我一齊去大球場睇波，我先跟佢地一齊留意下。而我都好肯定既就係，唔係識到佢地，我未必會睇本地波。其實有有唔少人留意本地波，好多都可以 up 得哂邊隊波有咩球員，但入場睇波？不了，要去拍拖，要去行街，太悶，太熱，總有藉口唔去球場。近年開始到我做叫人一齊入場睇波果個，朋友係外國返黎，我同佢講，不如食個譚仔之後去深水埗睇波，反正見面都係想傾下計 catch up 下。朋友約我某個星期六出街，我同佢講，不如你跟我去旺角場睇波，可以睇住波吹水。雖然佢地依然係對本地波無咩興趣，但起碼我令到當日既入場人數多左一人 ._.v
我想講既係，Support local football 從來都係一件講就容易，做落先知完全唔係一件易事。其實唔係得香港人先有唔支持本地波既問題。事實放左係眼前，大部份球迷就係中意睇高質足球，中意睇球星，你走去同佢地講「咁落力為利物浦打氣，又唔見你為香港咁出力」係唔會即刻令佢地覺得「係喎，我應該將我打氣既熱誠用係香港身上」；如果你咁樣同十年前既我講，我都係會答「我睇利物浦關你咩事呀，睇你既垃圾波啦」。
英超亞洲盃當中可以做到萬人齊唱 YNWA，賽後仲有球迷係球場內通道唱 When the Reds go marching in，又有人冒住比樓上倒水既危險唱住 Fields of Anfield Road 落山。球迷文化呀！香港人原來識聚埋一齊為愛隊打氣，原來識一齊唱歌，原來識自己整支旗黎 fing ，原來識自己準備好多打氣用品。聽講南看台既球迷區仲可以一齊企足九十分鐘！不如向另一個方面諗，香港人其實係知係球場內外點樣可以支持球隊，到底點樣先可以令到呢班人重視本地足球？（我無答案，呢樣野要大家一齊去討論）加上足球其中一大信念係 “One life, one team”，所以細個㨂左支持英超球隊就覺得唔應該支持其他隊；呢啲觀念問題就係要靠咁多位本地波迷一齊去宣傳，唔係一味講悔氣說話就可以令人反省。
外隊訪港可以吸引到咁多球迷出力支持的確好令本地波迷羡慕，但係咪得球迷有問題呢？香港政府同傳媒都唔重視本地足球；而球隊同球迷或者社區又有咩聯繫可以令到球迷覺得佢地屬於某一隊波？傳媒又中意報咩波呢？好多人一開始接觸足球可能都係經報紙睇到外國波既相關新聞先過本地新聞。香港國家隊最容易可以喚起球迷要去撐自己人聚集到香港人支持，可惜一年都唔知有無十場波踢，而大部份都可能只係友誼賽，無得好似聯賽咁每個星期都可以同朋友球迷一齊夾埋打氣。係香港有好多唔同既限制令到球迷文化未能夠好好咁發展，但我覺得香港人唔會咁易就比呢啲限制限死。世界盃外圍賽之後都多左好多人走出黎推廣球迷文化，淨係呢樣都已經係一大進步啦。其實好多人都知要撐自己人，但有人因為怕醜，有人因為唔想自己一個去睇波，種種原因令自己卻步；有心既本地波球迷，大家可以行多一步去接觸身邊既球迷。
但係，要宣傳 Support local football 唔係著住港隊港超波衫走去踩場唱自己球隊打氣既歌，其他人就會覺得你好特別做既野好有意義。你可以 “no one likes us, we don’t care”，如果你係想吸引更多人同你一齊做你中意做既事的話，首先就係唔好將自己睇得太高。
到而家人地問我支持邊隊波，我都係答利物浦。香港隊？支持佢地係理所當然的。撐自己人真係好好好好重要，香港人都唔支持香港人，咁仲有邊個會撐自己人？