圖片來源：湖北日報網

自從星期三晚爆出中國 U20 來季會出戰德國西南地區聯賽後，足球各界都有唔同聲音反映表態。係德國足總既強權統治之下，受影響既西南地區既球隊唔敢亂咁出聲，你反對足總落佢面，容乜易以後比小氣既足總下下針對你架！其實有好多屬於其他聯賽既球會係 Waldhof Mannheim 發聲明前已經食住花生咁加把口諷刺德國足總既決定。唔講你真係唔知德國人有時都可以咁幽默！我係 Facebook cap 左啲圖簡單翻譯下等大家都可以一齊笑，最先回應呢單新聞既係來自西部地區聯賽既 Rot-Weiss Essen：

親愛既德國足總：

我地想報名參戰 2018/19 德甲球季，並將以友賽形式進行。為備戰德甲，下季我地會每週三都同中國元老隊對戰。另外我地希望可以舉辦一個有 40 枝球隊既國際聯賽，比世界唔同國家既球隊參與，我地亦十分願意到加勒比海地區作客 （因為係旅遊勝地） 不過錢銀方面仍然需要大家坐埋一齊商討，咁先可以最遲係 2018/19 球季前有足夠資金去運作。

同時我地誠邀 您黎參與我地下週三既升班慶祝活動。

到時見！

 

當 RWE 係 Facebook 發出左呢封公開信後，有好多球會都即刻留言表示有意參與由 RWE 舉辦既國際聯賽！

當中有來自拜仁地區聯賽既 Bayreuth：我地又要參加！不過我地無猶長（錢）同埋無高薪退休球員，只有足球傳統同好啤酒。
RWE: 夠架啦～

 

來自東部某超低級聯賽聯 (Kreisliga B) 既 TSV Graupa 又「去信」足總指佢地都想報名參加高級別聯賽，問 RWE 仲有無位：「我地有足夠係 Kreisliga B 參戰既經驗同埋覺得已經可以踢更高級既賽事！我地雖然無咩錢，但有傳統及新鮮烤腸同冰凍啤酒！」
RWE 回應：新聯賽只會接受以腸仔同啤酒報名！

 

第五級別既柏林網球會除左想報名參加新聯賽，仲話以正常途徑升班越黎越貴同越黎越麻煩！
RWE：體育精神係足球界不嬲都被過份高估架啦

 

拜仁地區聯賽既 SV Heimstetten：親愛既 RWE，眾所周知拜仁地區唔係德國既一部份，所以我地都想參加呢個國際聯賽！唔係想話 Kirchanschöring、Hankhofen-Hailing 或 Rain am Lech （一堆極唔吸引既弱隊或地區），但係對 Goldstrand、 Ibiza 及 Mallorca （德國人最愛既旅遊勝地）會更加吸引囉，最起碼可以去觀光嘛！不過我地好期待可以到你地既主場作客！

RWE：我地會考慮將比賽時間縮短至 20 分鐘，咁我地大家就可以有多啲時間去市內觀光啦～

 

來自 Essen 既第九級別聯賽球隊 TC Freisenbruch （我岩岩 Google 佢地踢邊個聯賽先睇到呢隊波好癲，有 384 位網上領隊去聯手操控球隊既運作，包括票價及球員轉會等等！）：我地想報名取代 RWE 係地區聯賽既位置，我地亦願意定期與中國元老隊踢友誼賽。錢對我地黎講唔重要，只係想係地區聯賽踢波同踢快樂足球！

 

而 RWE 既既死敵 Rot-Weiß Oberhausen 亦都有向呢單新聞係 Facebook 作出回應

以下係將會實施既新措施：

－ 地區聯賽既冠軍無需要再踢升班附加賽定勝負！由即日起將會以幸運曲奇作出抽籤，曲奇入面有最有深度既字條就可以升班！

－ 球場禁止售賣腸仔及啤酒，並會以 37，59 要辣 及 432 （飯或麵）代替。 （呢個要解釋小小，德國既中餐廳同香港既茶餐廳一樣 Menu 上面有成百款菜式，例如豉油炒飯係一款；豉油炒米係第二款；豉油炒面係又一款咁，好多人叫慣左就會由號碼黎叫餸，所以 37, 59 同 432 即係中菜咁解 😀 ）

－ 所有球隊必須改用舞龍為吉祥物

－ 在球賽進行時，所有汽車、電單車及巴士必須開啟引擎污染空氣 （咁中國球員先會覺得自己係屋企）

－ 「波係圓既」、「個波一定要係界線內」、「球賽時間為 90 分鐘」之類既足球用語，由即日起須以「孔子曰…」為句子開頭。

－ 歌手 Helene Fischer 將會在每場賽事既半場休息時段表演 （諷刺足總盃決賽既 Half-time show）

－ 點解足總同聯賽協會唔直接送隊中國球隊去踢德甲？

－ 強烈要求對 U23 球隊時都有萬五歐收 （即 B 隊，好多低組別球隊都反對大球會既B 隊可以參加正規聯賽）

 

好啦，咁多反對聲音之後，點都要黎啲正面回應咁先可以中立啲架嘛！有人開左個名為 China U20 Ultras Südwest 既 Facebook，兩日就已經吸引左超過 3000 個 like！ Page 內有唔少表示支持中國既 post 架！

其中最出名既就係呢個留言：你地既憎恨係我地既驕傲！