31.05.2017 德國地區聯賽升班附加賽 次回合 SV Elversberg - SpVgg Unterhaching Waldstadion an der Kaiserlinde 賽果： 2:2 （0:1） 入場人數：8552 （ 約 500 名作客球迷）
首回合既三日後，我地返到 Elversberg 主場迎戰 Unterhaching。上場波我地作客慘敗三粒，大家心中唔多唔少都知道升班已經無望，但好多球迷仍然心懷希望，係球隊最後一次操練時去為球員打氣，話比球員知球迷會一直支持佢地。要淨勝四粒姐，之前又唔係無試過～
為左呢一場波，其實早一個月一眾球迷已經係背後準備左好多野，而家我終於可以講出黎啦～～～～
附加賽抽完籤後，球迷組織已經開始討論點樣為球隊造勢。最後大家決定要整一個覆蓋整個 C1 看台既 Choreo，加訂造 6000 枝黑白旗仔比其他主場球迷一齊揮動。不過球迷要籌備 choreo 時，必須先要知會球會，因為正常情況下係唔可以帶過大既橫額或旗幟入場既，而球會都要知道你既 choreo 內容先再決定比唔比你帶入場，因為有時球迷可能會整一啲會令球隊受罰既打氣物品，球會同球迷關係好的話咪會願意被罰，關係唔好的話就會拒絕球迷既申請！
當球迷組織同球會確認左 Choreo 既內容後，大家就開始搵公司訂造旗仔，最後到一間公司可以準時起貨，六千枝旗仔報價差唔多二千五百歐，但唔包送貨！！好在我地有人識貨櫃車車牌，可以自己租車去收貨 （點解呢度無 gogovan~~~) 大拿拿成二千幾歐，一個咁細既球迷組織係負擔唔起既… 最後呢筆錢球會決定由佢地出，我地負責設計大 Banner 就得啦！
得到球會既批准後，球迷組織既成員就開始去球場度位，計下要幾多枝黑旗同白旗，計下要整塊大 Banner 可以覆蓋全個 C1 的話要幾大，度完先發現原來 C1 好 Q 大！！！！ 大唔係問題，問題在我地搵唔到咁大個地方可以比我地攤開黎畫，最後決定只整 C1 1/3 大少既 banner… 多得球會既幫助，我地可以免費用佢地既室內運動場黎準備我地一切所需既物品。
一開始大家仲驚唔夠時間，後來唔洗兩個星期就搞掂！呢兩個星期入面有多位球迷黎幫手，當中有幾條友仲走去通宵畫… 去到最後大部份地方都已經上哂色，再無空白位可以坐或趴係度畫，搞到要好似大陸人腳趾掂地咁 mau 係度畫，中間一直又企又 Mau 好似係練 squat 咁。後來我地對腳係行步路都痛到想大叫！！！！
一切準備好後唔洗擔心唔夠時間後，大家又開始擔心其他野，又驚如果落雨既話會沖甩啲顏色啦（啲油漆好易洗得甩！），又驚大家唔協調拉唔起塊 banner 啦，又驚呢樣果樣。首回合完結後，球會再同各會員代表開會，當中包括球迷代表，指因為首回合開波前班 Haching 球迷開完 choreo 之後放 pyro，警方方面知道 Elversberg 球迷係次回合又係搞 choreo 認為佢地又會放 pyro，所以建議球會禁止球迷搞 choreo。幸好當日有我地既球迷代表在場，佢向球會保證球迷唔會係大 banner 下放 pyro，球會先繼續比我地搞 choreo。（事實其實係我地真係有計劃到首回合輸波就放 pyro 既，不過既然應承左球會唔放就唔放啦，況且球會今次已經幫左我地好多！）
好在，去到五月既最後一日，雖然前一日落暴雨，但比賽日當日天朗氣清！開波時間係夜晚八點半，太陽已經慢慢落緊山，所以一啲都唔熱～～最慘係 C1 望住太陽落山，上半場比個咸蛋黃一直攻擊雙眼，幾乎乜都睇唔到。
我地架車拎左去整，要 P 媽黎車我地返 Elversberg，返到 Elv 時先六點左右仲有兩個半鐘頭先開波，但成個市已經大塞車！！！ Elversberg 好細架咋，個球場仲要咁岩係正公路出入口，有大賽時塞車實會塞到出公路。塞左一陣我地都終於返到去，放低行李後就行去球場。球場附近既餐廳同酒吧全部都滿哂人！！你可以睇到足球（或者其他大型體育項目）點樣可以帶旺當地經濟。正正就係四年前 Elversberg 升班丙組後帶來好多作客球迷黎到呢個小鎮，班球迷黎到每人買杯啤酒同買條腸食都已經令當地既小販賺到笑，後來市政府見隊波原來可以幫手搵錢（一直以來都係蚊型球隊），即刻科水興建比賽日專用既停車場，搞好基建等日後唔好再塞車！
好多時賽前我會去球場外既小食亭買薯條食，當日竟然排左起碼 15 分鐘先到我，餐廳完全做唔停手！買完薯條就入場，當日入場時要搜身，球場周圍既保安都比平時嚴謹左好多。球會向球迷組織發放左幾張工作證，等組織既工作人員當日可以係場內周圍佈置 choreo，而我都被獲分一張～～我唔係幫手佈置，而係幫手影相！其實球會都有哂攝影師準備影靚相，但我好想可以親眼睇到 choreo 打開一刻，所以最後我走左落場去睇順便影下相，始終 copyright 會變係我自己架嘛～～
距離仲有半個鐘左右先開波時，整個球隊都幾乎爆棚，C1 都係重建後第一次咁多人！好多人因為最底會被 Choreo 擋住視線所以最低果幾行無人肯企，最後成個區多人到要大會開咪呼籲大家後埋啲同企落啲，Choreo 會係開波後收起唔會擋住線視。
見到啲球員開始返入更衣室，我就落去球場草地準備影相，球會亦播出 You’ll Never Walk Alone 。當時好多主場球迷都已經拎起旗仔。我走到去 Haching 球迷區前影相，好驚比人掟野，因為我著住球迷組織衫加掛住條頸巾係身 😀
球迷進場啦！ C1 既球迷打開寫住 「Der finale Kampf – alles oder nichts」既大橫額，向最後一戰孤注一擲！同時向上拉開一塊大 Banner，上面有位武士一手持印有球迷組織 Logo 既盾牌，另一手拎住把劍向敵人進擊，Banner 兩邊有 Elversberg 既市徽同球隊既會徽，背後有市內既地標。呢種咁大型既 Choreo 對小球會黎講真係好難得，好難得有人有心去做，好難得有人配合去做，好難得有咁多人一齊去做，一切一切都好難得！而主看台亦都變成黑白兩色，成個球場都好靚好靚！ （我仲發現作客球迷唔知點樣偷到啲白旗-.-）
開波後我就慢慢向返 C1 走，上返看台同大家一齊打氣。上半場既時間過得好快，好多好多人一齊唱歌打氣，我地亦都要唱返啲比較少歌詞既歌等其他人都可以跟住一齊唱。最感動係見到隊波真係個個出盡力去追波造攻勢，同上場比完全係兩個樣，無再比人禁住黎攻！但係好可惜….. 半場前比對方搏到禁區外既罰球然後比頂入…. 即係話 Elv 要射入五球先可以升班。作客區球迷全部瘋狂慶祝….
半場時大家睇住另一場升班賽既賽果，西部地區聯賽冠軍 Meppen 對西南地區聯賽亞軍 Mannheim。呢兩部波首回合無入球，次回合激戰到120 分鐘都係分唔出勝負，最後要去到互射十二碼既最後一球… Mannheim 射失再次升班失敗。即係同上年一樣，Mannheim 同 Elversberg 同樣升班失敗。老實講，我地其實想 Mannheim 升班等唔好呢個聯賽成日都係得果幾隊爭黎爭去！！！
下半場開波後，一齊打氣既球迷明顯減少，但無損忠實球迷要支持球隊既熱情，話比人知球隊未到最後一刻都唔會放棄。攻擊黎講同上半場無咩明顯分別，不過我真係想知點樣可以訓練到好似 Haching 球員咁每次有碰撞就可以搏到球證吹罰囉，呢個完全係一個 Talent 黎架喎！！！！！去到七十幾分鐘客隊再射入一球，大家都醒了，知道唔會再有可能追得返。當時大家只希望球隊可以破蛋，兩分鐘後真係破到蛋！到最後完場前再成功追得粒。
單睇呢場波，Elv 真係表演得好好… 球證吹雞完場後，作客區既球迷即刻衝落球場，大會亦都打開左大閘比球迷慢慢落草地慶祝。而主隊既球迷就繼續唱歌，話比球隊知踢地區聯賽係好痛苦，但球迷仍然會同佢地一齊走過任何時刻。球員後來去到 C1 前向球迷致謝，有球員後來單獨走到球迷前面致謝仲送出波衫。
已經連續三季無西南地區既球隊可以成功經過附加賽升班，下季將會有兩枝德丙球隊降班到呢個聯賽，包括 Mainz 二隊同 FSV Frankfurt。雖然賽前大家都知無咩機會可以反勝，但當最後終於要面對呢個時實時，有唔少球迷難免覺得非常傷心，好多人坐係看台上好無助咁望住球場。場上一直傳來慶祝既聲音，而看台上就一片寂靜。上場波已經講過呢個附加賽既問題… 已經唔想再多講。
今次想講下另一個問題，就係球會發展既問題。Mannheim 係地區聯賽係一枝大球隊，以球迷計係全德國都唔算小，呢兩季佢地投放左好多資源落球隊爭升班，的確係連續兩年成功爭入附加賽，但最後都升敗而回。佢地既計劃一路都係為丙組打算，幾乎無諗住升唔到班會點，最後佢地既投資完全得唔到回報，來季可能會資金短缺。而呢個問題唔只係發生係 Mannheim 生，好多各大大小小既球隊都係季初用銀彈政策買好球員想升班，但佢地既計劃入面好似無失敗呢兩個字咁。 相反，Elv 作為一枝來自小鎮既球隊，球隊其實有錢可以好似賀芬咸咁瘋狂注資，但球隊認為要能夠持續穩定地發展就必須打好根基，做好青年軍，現時更加有兩名年輕球員代表緊國家隊！但一切都要量力而為，好球員係要買，但一個起兩個止，仲會買個有經驗既老將黎教啲新仔點踢波！
賽後球隊宣布唔會同領隊 Michael Wiesinger 續約，可以話一件好事。呢個領隊曾經執教 Ingolstadt 同紐倫堡，覺得自己高人一等，覺得佢肯教 Elv 算係佢地執到… 希望下季可以搵到個好領隊再努力過！帶領 Elv 歷史性升班既唔係啲咩名牌領隊，而係只係一個住係隔離市又同球迷好親近既肥佬。
金錢足球係可以好容易就為球隊帶黎榮耀，除非你真係有無限無錢啦，如果唔係，資金總有短缺既一日。你望下1860 而家搞成點？一開始以為有個中東有錢佬注資可以搞大隊波，到頭來人地一話唔比錢就搞到要散班咁濟…. 金錢足球可怕之處就係呢度。
要逃離地區聯賽的確唔係一件易事，Unterhaching 係附加賽的確踢左兩場好波，祝佢地係丙組可以做到好成績，而家佢地仲要係慕尼黑第二大隊，唔好衰比人睇呀～～