28.05.2017 德國地區聯賽升班附加賽 首回合 SpVgg Unterhaching - SV Elversberg Sportpark Unterhaching 賽果：3:0 (0:0) 入場人數：8,000 （450 名作客球迷）
講左差唔成個月，終於黎到全季最重要既一場賽事，升班附加賽首回合。當年 Elversberg 就係係慕尼黑成功史上第一次升上德丙，今次如大家所願抽中拜仁地區聯賽冠軍球隊，大家都認為係一個好兆頭。
星期六我地朝早五點就出發開車到慕尼黑，十一點未到就已經到達酒店 check in。另一小隊就包左旅遊車八點先出發，最後三點左右先到。另外仲有跟球會既球迷巴士星期日一早先出發即日來回，一共三架大巴！
去完酒店就黎個慕尼黑 crash tour，今次係我第一次去慕尼黑！！好靚好中意呢個城市，有機會一定要再去留多幾日，可以慢慢睇唔同既野同食多啲好野～行左大半日我地返酒店小休一下就出返去市中心會合其他朋友。佢地一早訂左位（差唔多三十人）去間餐廳食飯順便睇埋德國足總盃直播。
星期日訓飽後，我地賽前三個鐘就已經出發去球場，係附近行個圈諗住搵個 Beer garden 坐低飲返幾杯先入場。球場隔離係有個 Beer garden，但起碼有一百人排緊隊買啤酒 -.- 後來我地只好入球場先飲..
Unterhaching 位於慕尼黑市中心以南，搭 S-Bahn 約十五分鐘就可以直接到達慕尼黑市中心 Marienplatz。而佢地既球場位於一個住宅區附近，隔離仲有個大公園，環境都幾靚。當日天氣報告話 28 度，但萬里無雲，頭頂就係一大個太陽照落黎，作客區仲無上蓋，我地完全只係被乾蒸！！！入場無耐，另外幾架球迷巴士都陸續到底球聲，當時仲有超過半個鐘先開波，但大家已經係看台外係咁唱歌造勢！等左好耐，球員終於熱身完畢然後準備入場，球迷都慢慢埋位準備為球隊打氣。
主場球迷拉開一塊大 banner 寫住「Mit vollgas zurück ins ganze Land」，叫球隊出盡全力帶大家重回全國（德丙開始就係全國賽），之後開始放代表球隊顏色既紅藍煙。Unterhaching 同 Elversberg 早幾季曾經係丙組交過手，而 Elv 既領隊亦都相當熟悉 Unterhaching 既踢法，所以作客球迷一直都好有信心。
開波後，作客球迷區既打氣聲不斷，仲要難得地超大聲！好耐無見過咁多球迷一齊打氣。但三十幾度既高溫下，唱幾分鐘歌已經想死。夏天既賽事好多時球證會吹停賽事比球員飲啖水，當日球員唔洗飲水我地都要飲囉，中段好多球迷大叫「快啲吹停場波啦，我要去買啤酒呀！！！」 半個鐘後好多人都開始頂唔順個太陽，走去廁所裝水然後潑落大家身上。上半場雙方都無咩埋門機會，但係主隊明顯踢得好好多，完全禁住 Elv 黎踢。
球證一吹半場，大家即刻離開看台搵個涼啲既位企下。我地都去廁所裝左幾次水解下渴，之後返入看台搵下吹下水。呢個時候突然有人話，啲消防員準備向我地灑水呀！當時我咁岩企係看台既角落頭，其他球迷係咁拍哂手話要水「水！水！水！水！」 之後兩位消防員就打開水喉向就黎熱到著水既作客區灑水降班！！！哈哈哈哈，有人走都走唔切，但其他人就開心球唱哂歌咁。我都想比水淋，但我身上有相機同電話，淋濕左無哂啲相咁點算！！！
下半場開波後大家繼續唱歌，諗住領隊會有計仔拎返多啲控球權同造多啲攻勢，點知乜都無變。Haching 繼續禁住黎攻，完全唔比 Elv 球員有波在腳，加上 Elv 係咁交失波，最後第 59 分鐘就比 Haching 射入第一球。
一球姐，仲有得追既。轉個頭 Haching 右路一斬再頂入，二比零。好，兩球都唔算絕望，仲有時間可以拎個作客入球。換左三個球員入黎後有返少少睇頭，有兩次仲幾乎入波，可惜過唔到龍門十指關… 去到七十幾分鐘主隊射入第三球，作客區即刻靜哂。老實講，真係好失望，點解可以踢得咁差……
星期三仲有次回合，但係要踢入三球又要力保不失，呢個可以話係不可能任務。當然 It ain’t over till it’s over，但見到其他球迷既失望表情，佢地咩都聽唔入耳。
然後又要講下呢個附加賽既制道。講明先，呢樣野唔係因為我地贏左聯賽冠軍而家又升班機會渺茫先投訴，呢樣野係大家多年來都一直向德國足總投訴地區聯賽升班制度既問題。Elversberg 既球迷係季中未知有無機會做冠軍，甚致未知有無機會爭升班時已經聯同其他地區既聯賽一齊整左 banner 叫足總檢討下呢個制度。
其他聯賽既冠軍都有得直接升班：德乙德丙，第五級別聯賽，連第十級別既 Kreisliga 冠軍都係直接升班，唯獨五個地區聯賽既冠軍無得直接升班？贏附加賽果隊踢左一季好波，咁輸波果隊就唔係踢左一季好波？點解呢五隊冠軍努力左一整季成為聯賽最佳球隊，但最後個冠軍可以係無意義，一切努力最後都白費？學其他球迷話齋，要逃離地區聯賽既魔掌絕對唔係一件易事。
可惜而家講咩都無用，我地只係可以希望星期三唔好輸得咁慘….. 升唔到班，向好果方面諗就係可以慳錢囉。一個月有兩個週末要跟球隊全國周圍作客都幾貴下，仲要丙組超多球隊都係東部。。係啦，唯有咁諗啦 🙁
話時話，中場休息時消防員向班球迷灑水可能係一個預兆黎，一盤冷水倒頭淋……….. /_\