13.05.2017 德國西南地區聯賽 第 37 週 SV Elversberg - FC Nöttingen Waldstaion an der Kaiserlinde 賽果：4:0 (2:0) 入場人數： 1,672 （ 5 名作客球迷）
我地贏冠軍啦，歷史上第一次成為地區聯賽既冠軍！！！！！！！！
西南地區全季有 38 週，不過因為有 19 隊，所以每週都有一隊無賽事。 Elversberg 就係最後一週先無比賽，今日就係最後一場聯賽賽事啦！話說上週聯賽榜帶頭既 Waldhof Mannheim 爆冷輸比榜尾既 Nöttingen，令 Elv 成功以一分反超前。今週休息既 Mannheim 無比賽，所以 Elv 係最後一場只要贏波就可以贏聯賽冠軍。
賽前大家去到 Fan Shop 外既酒吧亭度集合吹下水，傾下兩星期後去慕尼黑既事，又傾下附加賽主場要準備既野，傾下傾下仲有一個鐘就開波，一行十幾人就一齊落球場準備一切。
當日天氣報告話兩點至四點有機會會落雨，我地準備左風褸諗住用黎擋下雨。去到球場掛好哂啲旗同橫額後，我地就去買野食，突然間就落超大雨！好在我地咁岩係小食亭入面，成功避過呢場只落左兩分鐘既暴雨。落完呢場雨之後…. 就只有超猛太陽！曬到我地半塊臉變左紅色-.-
包尾既 Nöttingen 早幾個星期已經篤定降班，呢場波佢地只帶左三名後備球員黎作客，即係佢地根本已經無心出賽 （但又唔知佢地點解可以無啦啦贏 Mannheim）。呢隊波本身已經無咩球迷，記得上年年尾去作客時，佢地都係得啲上左年紀既人入場睇波，無人係場內打氣。今日作客更加唔會有球迷啦！作客球迷區直情無開，有幾個人坐近作客區睇波，我地估佢地應該係作客球迷。
Elv 球迷對呢場波無咩特別要求，大家都知唔輸波就可以做冠軍，但冠軍定亞軍對升班都唔會有影響。不過，球會預先同左我地講如果贏冠軍的話，賽後所有飲品小食全部免費，直到大家飲飽食醉先會踢走我地！淨係呢個原因都已經足夠我地全力支持球隊贏波啦～～～～～
開波十分鐘 Elv 就已經領先，之後主隊都無急住進攻，但客隊都唔係話造到好多攻勢，無聲無色之下，Dobros 突然就為 Elv 射入第二球，就係咁半場就以 2:0 領先。下半場開波無耐，對面龍開龍門球時撻 q 跣腳，大家即刻大笑。我地大叫「而家終於點解你地包尾啦～～～～」呢句野都未講完，對面回傳比龍門，Elv 既 Perstaller 即刻跟住個波衝埋去，到龍門諗住大腳清波時…. 個波省左落 Perstaller 度反射入網。哈哈！！！！！我成日都好期待呢個情況，估唔到比我係現場見證到，仲要入埋波！！！
去到尾段，傷左幾個星期既 Kapllani 終於復出後備入替，啲球迷唔會點解好開心咁為佢唱歌，唱到佢真係一復出就有波入！最後大炒四粒完成封王！球迷下半場唱左好多歌，有一首即興改詞既有「Wir holen die Meisterschaft, und den Saarlandpokal, und nächstes Jahr, dritte Liga!」我地會贏聯賽冠軍，贏埋莎蘭盃（下星期先踢），然後下年我地就升班丙組！
完場後，有球迷想爬閘衝去球場，不過呢度閘要爬真係唔容易。而且球隊月尾仲要踢附加賽，唔可以比球迷整爛草地住 (!) 。頒完獎後，球隊最後開左閘比球迷落去草地，球迷亦都好守規距咁而留係廣告版後！隊長走到廣告版上同球迷黎一個 Humba 慶祝，之後所有球員去到球迷逐一擊掌致謝！
之後所有球迷去到 Block C2 既 VIP 區入面開始又食又拎咁慶祝。最好笑係 Nöttingen 既球員都食埋一份，佢地仲問我地邊度有啤酒拎，我地話 VIP 區入面個酒吧，佢地話唔敢著住隊衫入去，最後要我地幫佢去拎！ 哈哈，佢地最後留左差唔多成個鐘先走。其他球迷留到七點先走，真係成條村都聽到佢地係度唱歌！
下星期我地要到Homburg 出戰莎蘭盃決賽，對手係 Saarbrücken。好多人都話出青年軍送個盃比佢地啦，因為莎蘭盃決賽既三日後就係作客 Unterhaching，我地要齊齊整整咁去慕尼黑！
雖然今日創造左歷史，我地既目標仍然無變，我地要升班，我地下季要踢丙組！如果我地升唔到班咁呢個冠軍又有咩意義？
賽後 Elv 係 Facebook 宣佈贏得聯賽冠軍後，有好多西南地區球隊既官方專頁都去到 Elv 度留言恭喜佢地（包括 Mannheim 都有份！）突然覺得好溫暖～～