06.05.2017 德國西南地區聯賽 第 36 週 SC Teutonia Watzenborn-Steinberg - SV Elversberg Stadion Wetzlar 賽果：2:4 (0:1) 入場人數：386 (約 80 名作客球迷)
突然就黎到最後一個聯賽作客日，朝早九點半巴士就出發，要坐四個幾鐘經過法蘭克福一路向北先到達目的地。係巴士上，大家最熱烈討論既係早一日季後賽既抽籤結果。
Elversberg 被抽中既對手係來自拜仁地區聯賽既冠軍 Unterhaching，會先係 5 月 28 日作客慕尼黑，31日先返到莎蘭主場出戰。大家係度傾住邊間酒店好呀，訂幾多人巴士一齊去。有人已經 send 左 email 去幾間酒店問團體價錢～ 抽完籤當日我地自己都有睇過下酒店，當晚我地去到 Elversberg 時，同 P 既父母講我地月尾要去慕尼黑兩日，佢爸爸望住我地笑左一笑，然後比左張紙我地睇，原來佢地係抽籤之後即刻係慕尼黑訂左兩間房，諗住同我地一齊去作客（順便去慕尼黑過週末，佢地超中意慕尼黑！）嗚，真係好感動！！！
所以係巴士上其他球迷討論酒店同巴士時，我地可以安心咁睇風景～我地架巴士係法國巴士，車頂係玻璃黎架，勁高級！！！！不同個巴士司機都係法國人，無人可以同佢溝通到。。。
我地半路係公路既休息站停車休息，去完廁所出返黎見到球隊巴士咁岩又係同一個休息站停車，見到啲球員大家即刻開始唱歌（無人走埋去，佢地唔係球星呢～～），球員們就向我地拍下手咁。休息過後再坐兩個鐘車終於到達目的地 Wetzlar。
呢個地方都幾靚，有山又有河，司機載我地到球場外既停車場後，有人話去錯地方，叫司機搵個近球場啲既位置泊車，兜左一大個圈後都係去返原先停車既地方。落車後，大家要行天橋過河，再行一大段路先去到球場。
賽前主隊已經講明唔會開作客區比作客球迷，所以我地要去主場球迷入口入場。邊度入場對我地黎講都無咩所謂，最大問題係票價！！！！！！！！一如以往，去到售票處我地話要買企位，點知條友問：你唔係作客球迷咩？我地話係，佢話「作客球迷區係坐位喎，企位係比主場球迷」即係佢迫我地要比 12€ 買坐位，唔比我地買企位(8€)！！！
問題係，德國足總有規定作客門票同主場門票必須以同一價錢出售。即係主場球迷可以用 2€ 買飛時，作客球迷理應可以同樣買到2€ 既門票。但當日，主場球迷可以以 8€ 買飛時，點解我地一定要比12€ 買飛？你唔想請保安所以唔開作客區，然後得返座位區係你既問題囉。因為呢單野我地兩個都嬲左成日，除左錢既問題，仲有原則問題 🙁
入場後影左幾張相，買完圾野食就去我地既座位。有人係廁所包左一大包廁紙出黎話反正比左咁多錢，乜都要拎盡～～～然後大家就係看台上周圍飛紙巾。
主隊既背景無咩想講，佢地個水蛇春咁長既名係因為佢地係幾隊波合併一齊連個名都夾埋一齊就算，連自己球場都無，要租用隔離市既球場先可以踢地區聯賽。不過佢地九成九要降班，所以我地就算升唔到班，下季都唔洗再比人掠水啦。
大家都以一個好輕鬆既心情去睇呢場波，反正已經篤定踢附加賽，今場波同下場波贏同輸都無咩分別，最多咪贏到冠軍囉，但贏到冠軍又唔係直接升班，獎金可能只係多幾百歐咁，最緊要球員唔係有咩傷，要齊齊整整咁出戰月尾既兩場附加賽就得！
上半場 Elversberg 先入一球，球迷都好開心咁一路打氣。半場時，大家開始變懶，個個坐低哂話「我比左錢買座位架，做咩要我企呀～～」。下半場開波後大家都仲係四散曬太陽，起碼十分鐘後先齊人企返哂起身繼續打氣。Elversberg 入完第二球之後，主隊突然間靠兩個角球連入兩球，我地都唔知發生咩事？？我地附近有一班著住主隊波衫既小朋友唔知做乜中途轉會係咁幫 Elversberg 打氣，仲要 Elv 入波時佢地真係有慶祝架！！！
好在 Elv 最後仲可以輕輕鬆鬆入多兩球，成功拎到三分～話哂都榜首對榜尾，唔係最尾先輸波嘛！完場後，球員行過黎同我地致謝，我地之後亦慢慢收拾離開。
聽人講男廁有我地唔認識既球迷係度破壞廁所，不過呢個廁所係比佢地屈做作客區既主場廁所，真係有咩事要賠既話主隊都唔可以搵我地投訴囉～～
同一個比賽週，榜首 Mannheim 對住包尾既 Nöttingen 爆冷輸波，所以暫時 Elv 成功以兩分反超前排第一！下場波如果 Elv 和波就可以以冠軍完成賽事。（岩岩先好似話冠唔冠軍都無咩所謂，不過有得贏第一當然好過第二啦 😀 ) 而下場既對手… 正正就係 Nöttingen..