29.04.2017 德國西南地區聯賽 第 35 週 SV Elversberg - FK Pirmasens Waldstadion an der Kaiserlinde 賽果：3:1 (2:0) 入場人數： 1,359 （約 60 名作客球迷）
繼上週作客反勝 Saarbrücken 之後，呢場 Elversberg 只要和波就可以確定季後升班附加賽既資格，聽落係好重要，不過計埋今場波今季仲有三場，對手都係中下遊球隊；以 Elv 既實力，只要做好自己本份的話，要入附加賽根本無咩困難。
賽前我地又去到球場外既酒吧吹下水，差唔多時間就一齊出發去球場。我地兩個都中意儲波飛，所以 P 咁多年來都無買過季票，我地每場波都要去售票處買飛。（不過下季我應該會買季票啦，反正佢去睇既波唔會無我份，又可以慳返少少！）點知售票處仲未有人（當時已經 12 點半，即係仲有個半鐘就開波），過左一陣就有個阿嬸捧住一大箱野出現，然後佢先施施然將箱內既野逐樣逐樣拎出黎，包括錢箱，門票，場刊等等。等多十分鐘，佢終於將所有野放置好可以賣飛。
排第一的兩夫婦有門票換領卷，佢地話想換 C1 區既門票。阿嬸又話唔知啲換領卷係點運作，要研究一輪先肯比飛，兩夫婦拎左兩張飛後就走左去 C2 區門口入場（係正售票處旁邊），門口既保安嘟左佢地張飛後，正當呢兩夫婦諗住入場時，阿嬸又喝住佢地話「你地張飛係 C1 架，唔可以係呢度入！！！」。兩夫婦又話「但我地想去呢度」，保安話照入啦無所謂啦～ 但阿嬸叫佢地返去換返 C2 區既門票 -.-
搞掂之後終於到我地，點知佢比左 C2 區我地，好在離開前睇清楚，唔係又要走返轉頭換飛。大家都無表現得不耐煩，身為一個香港人既我當然已經反哂白眼，但同時又好配服佢地既耐性。呢一樣野我仍然在學習中，盡量唔好成日趕頭趕命唔知為乜。當日我地買完飛其實都仲有成個鐘先開波，所以根本唔需要不耐煩….
入場後，我地即刻衝去買野食。小食亭有新野食！有辣味 Frikadelle！我地仲即刻周圍同人講，點知佢地話「下，好耐啦」。我地先發現，原來… 我地差唔多兩個月無係主場睇過波！三月幾乎成個月都唔係德國，返到德國後去 Worms 睇左場作客我地又去左去柏林，返到黎又係作客，去到今個星期先終於係主場！
有一位 Elversberg 既球迷突然走過黎搵我地傾計，話佢地有睇到我地既網頁，知我地去左岩岩去完萊比錫同柏林睇波。呢位球迷以前生活係東德，同我地分享左好多佢後生時係東德睇波既故仔，講到 Chemie 同 Lok 時佢即刻好興奮，又話希望 Union 可以升班！好開心知道有人對我地既 Groundhopping 旅程真係有興趣 😀
作客球隊 Pirmasens 位於 Saarland 東部邊境，呢隊波雖然曾經踢過德乙，但跌到落地區聯賽後已經流失大量球迷，當日只有幾十位作客球迷，仲要無任何球迷組織既大旗，除左比賽期間客隊入波時，其餘時間都十分安靜。
無左作客球迷既打氣聲，球場入面就硬係爭啲咁！同時變相令主場球迷既打氣聲更加清晰！今場波 Elv 球迷開始全力唱新歌，呢首歌既節奏超易入腦，賽後有其他球迷都一路哼～
開波幾分鐘 Elv 就先入一球，五分鐘後上場絕殺 Saarbrücken 既 Perstaller 為球隊射入第二球。
下半場開波無耐客隊射入一粒，之後佢地既攻勢都唔多，去到完場前十分鐘 Elv 射入第三球埋齋完場！同時球場傳來消息指 Saarbrücken 輸波，即係 Elversberg 同 Mannheim 都提早篤定進入升班附加賽！！！！
比賽期間，Elv 球迷間唔中會幫對面個龍打氣，完場後仲一路呼叫對面龍過黎，原來佢曾經效力 Elversberg 五年，雖然佢一直都只係後備龍門，但佢同球迷既關係好親密！完場後佢都走左去搵啲球迷短聚一下（同時一路比保安趕走）
季後賽會係五月二十八號同三十一號進行，現時只知會對北部或拜仁聯賽球隊，要等多幾日先會抽籤。希望會抽到好籤啦！