22.04.2017
德國西南地區聯賽 第三十四週
1. FC Saarbrücken - SV Elversberg
Hermann-Neuberger-Stadion
賽果：1:2 (1:0)
入場人數： 4,607 (作客球迷：400)
呢個星期我地跟住 Elversberg 作客 FC Saarbrücken，賽前聯賽榜上排第二既 Elv 踢多一場以六分領先排第三既 FCS；今季賽程只淨返四個比賽週（最後一週 Elv 無比賽）， Elv 既對手只剩榜尾球隊，如果 Elv 今仗拎到三分而之後只要不敗的話就可以進入升班附加賽！所以今場波除左係所謂既打比之外，仲關係到 Elv 有無機會升班既一場好好好好好重要既賽事！
同樣地，呢場波對 FCS 亦都好重要，如果佢地今場贏波就同 Elv 只相差三分，仲要有踢少一場既優勢（不過 Elv 既得失球差高差唔多20球）。如果佢地之後可以上哂身可以狂大炒人地既話都仲可以話有機會爬 Elv 頭；相反，輸波既話就可以話今季已完結。
聯賽首循環 Elv 以 2:1 擊敗 FCS，仲要係罕有既反勝！今場波賽前我地一早去到 Elv 市內既酒吧同一班球迷相聚下熱下身，同佢地一齊等球迷巴士出發到 Völklingen。今次我地想慳返 20€ 巴士錢所以自己渣車去。
點解作客 FCS 唔係去 Saarbrücken，而係要去 Völklingen 呢？FCS 既主場 Ludwigspark 去年開始進行重建工程，所以租用左鄰市第五級別球隊 SV Röchling Völkingen 既球場為自己既聯賽主場。大約兩年前 FCS 同 Elv 既主場都有進行過擴建或重建工程，兩隊波都有互相租用大家既球場踢過幾場波，等工程可以順利進行。
Ludwigspark 既重建工程係一個超大型項目，幾乎係折左成個球場再重新起過。佢地既看台十分殘舊，每年經過暑假後就會生哂草，每季季初都要搵人去拔草；場地質素亦都十分參差。FCS 確定動工日期後，佢地開始搵其他球隊睇下可以租邊個球場用。Elv 曾經表示願意借出球場比 FCS 用，但 FCS 之後話租金太貴所以拒絕（但其實同幾年前互相租用大家既球場時既租金一樣！）。佢地又唔可以租用死敵Homburg 既球場，淨返既選擇得返同 FCS 有友好關係既法甲球隊 Nancy，但由 Saarbrücken 出發到 Nancy 要差唔多兩個車程，如果真係租用 Nancy 球場既話，球迷入場率一定超低。
最後佢地只能租用 Völkingen 市內既 Hermann-Neuberger-Stadion。近幾個月有報導指 Ludwigspark 既造價一路上升 ，原先有份出錢既 Saarbrücken 市政府話太貴唔會比錢。同時因為市政府有份參與重建項目既關係，因利益問題 FCS 唔可以搵贊助商科水。到現時仍然未搵到解決方法，重建工程做得幾多就做幾多。
因為球場問題，大家都指 FCS 根本無可能升班，因為 Völkingen 只係緊緊合格可以用作地區聯賽既球場，到 FCS 真係有機會升班既話佢地可以去邊度搵球場踢德丙？點都好，呢個係之後既問題啦，首先佢地要有機會升班先有機會為球場問題而煩惱嘛！
我地賽前一個鐘就已經到達球場，食飽之後球迷巴士亦隨即到達！大家掛起橫額同將大旗準備好後就等開波。呢個球場最討厭之處就係雙方球迷區都係同一邊，即係我地完全望唔到主隊既球迷，同時亦完全聽唔到佢地既打氣聲。我要走到去作客區最角落位置先影到 FCS 既球迷區囉！
球場上面，Elv 未開波已經佔下風，有多位球員因不同問題而缺陣。加上 Elv 歇冬後仍然未試過作客贏波，大家可以話已經作好最壞打算。果然，一開始 FCS 就已經禁住黎攻，幾分鐘後仲入埋波，好在只係詐湖！主場球迷當時已經丟哂啤酒咁慶祝。大難不死以為有後福，可惜幾分鐘後就正正式式被主隊攻破大門。
心諗，十分鐘已經捱打捱到咁，隨時有機會被大炒輸波。再過幾分鐘， FCS 再入多球詐糊。完上半場前，Elv 亦雖然送左個波入網，點知又比球證吹越位。作客區既氣氛確實只係一般，Elv 絕對唔善於反勝同作客贏波。半場休息時間快完時，球員開始入場，其中一位球迷突然話：「我地既球員入場先呀！！！」我問點解佢咁激動，原來如果 Elv 球員係半場後先入返球場既話通常都有好運行！
下半場 Elv 轉攻向作客球迷區，六十分鐘 Elv 憑對方既失誤突擊成功追和！！！！球員衝向作客區同球迷一齊慶祝！！！然後球迷們一齊搭哂膊頭跳住唱歌慶祝時，跳到一半 Elv 再入波反超前！！！！！！！一大班球迷開心到衝哂落去圍欄到狂呼慶祝，我都只係掛住企係度尖叫。短短兩分鐘內由落後變領先，好似發緊夢咁，完全唔知發生緊咩事！！
為 Elv 射入第二球既球員 Julius Perstaller 今季只入左兩球波，第一球係首循環對 FCS 射入反超前果球，第二球同樣都係為 Elv 反超前 FCS！！！哈哈，波唔洗入得多，入最重要果幾球就得啦～～客區既氣氛突然變得超好，區內 400 位球迷一齊唱歌助興，仲分左兩邊一齊互嗌 SVE！
射入兩球後仲有差唔多半個鐘先完場，呢廿幾分鐘內既心情十分之複雜！全場波除左呢入波呢兩分鐘，Elv 可以話無踢過好波。最後幾分鐘當然唔少得啲驚險場面，好在全部都有驚無險。補時兩分鐘後，球證終於吹雞完場！！！！！ Elv 下場只要拎多一分就會進入升班附加賽啦！！！！！！！
賽後球員到作客區搵球迷一齊慶祝！球迷叫球員坐低，等 Capo 帶領黎個 Humba 慶祝。點知球場喇叭突然開始播開大聲既音樂嘈住哂，有兩位球員即刻走去拆線令喇叭收聲！慶祝完，球員就埋去欄杆逐一同球迷擊掌致謝。
Elv 成功拎到重要既三分，能夠係多位重心球員缺陣時仍然可以作客反勝實在不容易。果然球隊係下半場先入場係會帶黎好運！希望呢個好運會延續落去，只要餘下三場拎到一分，拎到一分後贏埋附加賽，來年就會升班上丙組！