德國乙組足球聯賽 第 29 週 1. FC Union Berlin - 1. FC Kaiserslautern Stadion An der Alten Försterei 賽果：3:1 (1:0) 入場人數： 21,379 （約 2000 名作客球迷）
等左四年，我終於可以入場睇 Union Berlin 啦！！！！！！
話說四年前到柏林旅行時，當時我完全無留意德甲以外既球隊，係車站見到有一班人著住印有 Union 會章既衫，心諗，唔通有波睇？見到佢地上 S-Bahn，無野做既我就即刻跟埋佢地上車。車上我又見到有人戴住 Fortuna Düsseldorf 既頸巾，當然我就估係呢兩隊波既比賽。
落車後我跟住班人一路行，行到去一個樹林既入口，當時我又諗，咩地方黎架。。係樹既中間隱約又見到球場既射燈，係樹林行左兩分鐘，開始聽到由球場傳出黎既球迷歡呼聲。好快就到達球場門口，果然真係有波睇！！！！！！點知……….. 售票處貼住張紙：Ausverkauft。波飛已經售罄 -.-
好失望離開既時候，場內開始播歌，我當時以為果首係啲唔知咩 top hits，後來 google 先知原來果首咁 metal 既歌係 Union 既會歌！係場外聽到時差啲想 fing 頭。回程時一路覺得好dum 春，雖然無睇開德乙，但去到球場要走返轉頭真係好慘架。
呢幾年都無機會再去柏林，黎到德國後又住係德國既西南部，要去柏林一係就要渣起碼七個鐘車，一係就比天價搭火車（分分鐘買到機票返香港），交通極唔方便。今季一路都有留意住德乙，季初去過 Duisburg 睇 Union 作客已經好開心，間唔中佢地星期五比賽既話都會睇直播。近幾個月學識左佢地其中一首打氣歌仲日日係度唱。係電視聽佢地打氣已經覺得好正～～～～今年年初 Union 更加一度上過榜首！雖然為佢地開心，但心知道佢地升班上德甲既話一定會比而家更加難買飛。
我地出發去香港時睇過復活節有無咩地方可以去睇波，但當時賽期一路未定，所以乜都 plan 唔到。當我地係香港既時候，上網見到 Union 對 FCK 呢場波仲有飛賣，而且仲要係復活節既週末比賽。二話不說，我地拿拿聲買左飛先，之後先再計劃點樣去柏林啦！
最後我地選擇左渣車，先去萊比錫三日，再去柏林三日半。等左好耐，終於等到比賽日，當日個心情有啲似第一次去現場睇波既感覺，對所有野都好期待。搭火車去到最近球場既車站後，雖然我唔記得當時條路點行，但當日我又再一次跟住班球迷行路。去到當年樹林既入口，即刻回憶返哂黎，我即刻話：「係呢度行去球場啦！！」
好快我地終於到達我當日要打回頭既地點，我同 P 講：「當日我就係要由呢度離開啦 T_T」，果刻仲係未敢相信自己真係就黎可以入場！賽前幾日係多蒙特市有炸彈案，所以當日既保安都變得嚴謹左。我地排隊入場排左差唔多十分鐘！
我地張飛係第四區，即係龍門後面，係正作客球迷隔離，我地買飛時已經得返第四區，所以完全無得㨂。好在我地成功混入左去第三區（主看台對面），即刻搵個位企！Union 既主場四個看台入面有三個看台都係全企位，只有主看台上既幾十歐門票先係座位，其餘都係二十歐唔洗！就係因為幾乎全場都係企位，大家迫住一齊睇同一齊打氣果種氣氛先咁正！！！！賽前因為啲小事搞到比預計遲左入場，當我地入場時成個球場已經滿哂咁濟。
岩岩講完全企位氣氛好正，但全企位對矮人（我）黎講完全係無著數囉！！啲德國人個個都米八咁高，企邊都比人擋住視線。最大問題係，我入場係想睇波，但我更加想睇球迷。我向前望仲可以 gut 高望到下塊草地，但我完全望唔到班 ultras 企既果一區… 周圍走左一輪，最後終於比我地搵到某條通道口既第二行仲有少少空位，咁就比我地搵到個靚位攝入去～～～～因為通道口係我既右邊，即係唔會有人擋到我望向右邊龍門後面既球迷，同時我又可以清楚望到球場！
企定之後當然即刻拎相機出黎影相，然後佢地就開始播首會令人 fing 頭既會歌 Eisern Union 啦！！！！一開始播時附近（加全場）既球迷跟住 HUAHHH 真係好震撼 😀 唔講咁多，去片：
好快班球員就出場。Union 既球迷準備左超巨型 Choreo！先拉起一大塊印左 Union 波衫既 Banner，下面寫住 「Union in rot – Das Stadion schallt」，然後佢地收起件波衫 banner，看台上既球迷全部一齊 fing 紅白旗仔。我地以為 fing 完旗仔就完，點知佢地仲吊起一塊印有一名拳擊手既大樣，換上另一塊寫住「Ziel anvisiert – Die Faust geballt」既橫額。 意思係「穿上紅衣為柏林聯係球場出盡力打氣，鎖定目標緊握拳頭出擊！」呢度既目標當然係升班啦！
Union Berlin 既前身 FC Olympia 06 Oberschöneweide 成立於 1906 年柏林市內既 Oberschöneweide 區 ，四年後改名為 SC Union 06 Oberschöneweide，球衣主色為藍色。之後一直都係國內其中一隊足球勁旅。球隊成立初期，因為 Oberschöneweide 區係一個工業地區，當地既工人都穿上藍色既工人服返工，所以球隊當時既別稱為 「Schlosserjungs」（金屬工人），其後衍生成 Union Berlin 現時仍然使用既別名 「Eisern Union」（鋼鐵聯）。
SC Union 06 Oberschöneweide 係一支勞動階級既球隊，球迷全部都係藍領！戰後，因為 Union 既所在地位於東柏林，所以受盟軍政府既政策影響，球隊必須解散再重組。重組後，球隊風光不再，亦受到冷戰初期影響，即使 Union 獲得全國賽既參賽資格，最後被前蘇聯政府禁止出戰賽事。當時有多名教練及球員出走到西德並組成 Sport-Club Union 06 Berlin 出戰全國賽，令整個柏林有兩支名為 Union 既足球隊。
直至 1961 年柏林圍牆興建後，位於東柏林既 Union 經過多次改名後，最終係 1966 年以 1. FC Union Berlin 正式重新成立。呢隊勞動階級既球隊隨即同擁有秘密警察 (Stasi) 贊助既 Dynamo Berlin 產生敵對關係。因為錢唔夠人多，背景又唔夠人強，所以當時既 Union 根本無啖好食。
去到 1990 年德國統一後，球隊雖然一路都有啲成績，但資金短缺問題一直困擾球隊既發展。90 年代即使 Union 贏得升班到德乙既資格，但仍然被足總因球隊資金問題而被禁止升班。直到 2000 年終於成功升班上乙組，可惜三年後連續兩年降班到第四級別聯賽。直至2008 年德國足總成立德丙，Union 成為其中一隊最先參賽德丙既球隊，同年成為冠軍升班上德乙直至現今！
而球隊因為無乜錢，所以球場設備亦都十分殘舊。去到 1966 年升班上東德頂級聯賽後，球隊曾經擴建球場令容納人數升至二萬二千人。德國統一後，除左資金問題，球場設備不足亦成為 Union 被禁止升班既原因。去到 2008 年，球隊終於決定翻新球場。球迷知道球隊無錢，所以索性自己落手落力去重建球場。超過 2000 名球迷總共花左超過 14 萬個鐘去為自己既「家」翻新，而且不問回報。呢隊波係真真正正以球迷為本既球隊！
唔小心講左咁多背景資料添… 講返當日球迷收起 Choreo 後，我地就開始睇波啦。一心以為自己搵到靚位視線無阻，點知前面既爺爺突然抬起佢個孫比佢騎膊馬睇波…… 即係米八再加個一米高既小朋友成座山咁企係我前面，都算，我可以企出少少都仲睇到。點知前面又有個老豆抬起佢個仔睇波，有幾個兩米高既小朋友出現係我眼前！！！！！我…. 就當然唔會投訴啦，只可以怪自己得米六唔夠人高。有工作人員行過黎叫我唔好企出通道，我指向啲小朋友比佢睇話我乜都睇唔到，佢先比我企出少少，真係好感激佢！！
我唔可以話係 Union 既球迷，但我真係好中意呢隊波既球迷，因為班球迷我想隊波有好成績可以報答班球迷，所以呢場波我地都有一齊出聲出力打氣！係我地前面有條友著住德國波衫入場，心諗咩料？見到佢背面印住 Kroos 我先醒起國腳 Toni Kroos 既細佬效力 Union! 起碼叫做有個球員係我識既～～
作客球迷來勢都唔弱，佢地到柏林作客要凌晨出發搭十幾個鐘巴士，當日都仲企滿左成個作客區！球迷係看台前掛起左超大橫額寫住：「1. FC Kaiserslautern – Unzerstörbar」（凱莎羅頓－堅不可催）。隊波今季踢得好差，一直徘徊聯賽榜下游，再唔爭氣啲既話隨時會降班！當日佢地雖然有差唔多二千人，但無乜幾可聽到佢地把聲，因為 Union 球迷全場都會一齊打氣，完全蓋過哂作客球迷把聲！
主隊係上半場十三分鐘就領先，我地跟埋慶祝到半場休息！半場時我地無周圍走去買野食，因為怕離開左會無左個位。好在場內好多啤酒人走黎走去～呢度買啤酒會跟個靚膠杯，上面印有球會logo同球員個樣等等，按金只需 1€! 即係你唔想拎個杯走，完場時去小食亭還杯就可以拎返 1€，想拎走當手信又得～下場波又可以再拎過入場！
下半場開波後十五分鐘客隊追返一粒以為有啲希望，Union 雖然越踢越順，但一直搵唔到機會射門，好在完場前連入兩粒成功贏得三分！升班仍然有希望！完場前佢地終於唱出其中一首我好中意既歌: FC Union, Unsere Liebe, Unsere Mannschaft, Unser Stolz, Unser Verein, Union Berlin… Union Berlin。（FC Union，我的愛、我的球員、我的驕傲、我的球隊，Union Berlin) 呢一句係龍門後既看台頂都有印出黎。平時係電視睇直播佢地可以唱呢首歌唱足十幾二十分鐘都唔停，當日佢地係球隊入第二球先開始唱，一直到完場後幾分鐘！主隊球迷到看台三面致謝後，球迷都未肯散去，一路為球員鼓掌！
而作客球迷亦都留到最後，完場後一大班球員走到看台最前騎上欄杆希望可以鼓勵班球員唔好太失落。等所有球迷拍完手，我地都慢慢離開。見到佢地既 Grill House 有豬扒包，仲要只係 3€!!!!!!!! 之前去過既球場要5€ 囉… 食飽就去左 Fan shop 買頸巾，買完就開心地離開～
大家如果有機會去柏林的話一定要去睇 Union Berlin，仲要記得提早入場，唔係霸唔到靚仔除時草皮都見唔到！
額外加多張今季 Union 某一個週中作客多蒙特出戰德國盃賽事既相片，星期三佢地有一萬二千人由德國東去德國西！！！！！！！！！
