15.04.2017 德國東北地區聯賽 第二十八週 FC Viktoria Berlin - SV Babelsberg Stadion Lichtefelde 賽果： 2:1 (1:1 入場人數：493 （作客球迷：約200 人）
四年後，我終於又黎到柏林！我最想睇既賽事要再等多日，所以唯有去睇下地區聯賽先啦。咁岩 Viktoria Berlin 會對來自 Potsdam 既 Babelsberg，可以話係鄰市打比。
賽前原本諗住去奧林匹克公園行個圈，睇下哈化柏林既主場。可惜因為天氣太差，我地走左去啲行街。整個復活節週末得星期六有商店開門，所以要把握下時間做下遊客。計埋呢次已經係我第四次到柏林，係呢度我去過哂大部份同歷史有關既博物館，又到訪過一啲有歷史既地方，但每次都總會發現有新地方我未去過。今次同 P 一齊黎柏林，佢又帶我去一啲我未去過既地方。識佢既時候佢話會去 KaDeWe (德國版既 Harrods）買條裙比我，去到發展無條裙我地買得起 /_\ 所以去遊覽下見識下有錢人世界就算啦～
由市中心搭大約半個鐘火車再轉巴士，就會去到一個高尚住宅區 Lichtefelde。等車時咁岩 Babelsberg 既球迷亦剛從 S-Bahn 車站行過黎，巴士一黎到就塞滿左架車。球迷通常比人既感覺都係粗聲粗氣既醉酒佬，但呢班球迷係巴士入面好安靜，有一位坐輪椅既老人要落車既時候，佢地會捧佢落車等佢安全上行人路。
落車後就見到有一大塊海報有個箭咀指示主場區域要轉右，平時球迷可以直入，但因為呢場算係打比所以要用第二個入口。兜左個大圈，經過媒體區就見到入口啦。入場後，要經過幾個訓練場先到達球場。而入到球場第一眼就見到小食亭既餐牌有好多野食，仲要超平！！！！半場休息時我地叫左份咖哩腸同薯條，再加杯熱朱古力都只係 €5!
小食亭隔離就有 VIP 區同餐廳，再隔離就係主看台。上半場我地去到主看台既對面，可以望到兩隊既球迷。Babelsberg 既球迷係正主看台側邊，人數同主場球迷差唔多。Babelsberg 球迷區其中一支旗寫住 「hayır」，係土耳奇文既 No 咁解。當日正正就係土耳其既修憲公投，班球迷係想借足球黎表示佢地既政治立場。大部份來自前東德既球隊都係比較排外（你亦可以話佢地係右翼），而Babelsberg 既球迷係少見來自前東德既球隊但政見同其他前東德球迷相反。正正因為因為球迷大部份都係支持左派，所以佢地同來自漢堡既出哂名超左派既 St. Pauli 球迷早已結盟。
Babelsberg 同之前提及兩隊既萊比錫球隊一樣都係因為二戰歷史因素而有較複雜既背景。球會係 1903 年成立，當時取名為 Sport-Club Jugendkraft 1903 ，其後因為多名來自鄰近城市 Nowawes 既工人加入球隊，並取代球隊改名為 SV Nowawes，多年後曾經改名為 SV Babelsberg 及 SpVgg Potsdam。二戰過後，東德政府下令解散所有工會及體育會，球隊被逼解散。其後係 1949 年重新立成為 BSG Karl Marx Babelsberg，一年後與別一隊球隊合併再改名為 BSG Motor Babelsberg。到德國統一後，再次改名為 SV Babelsberg 03 一路沿用隊名至今。Babelsberg 曾經出戰過德國盃首輪賽事及德乙，已經算係球隊最佳成績。
相比之下，Viktoria Berlin 既歷史就簡單好多。呢隊波成立於 1889 年，係其中一隊最有歷史既德國球隊。球場外有一大塊海報寫住哈化柏林既別名「老婦人」(Die Alte Dame) 應該係屬於 Viktoria Berlin 先岩，因為 Viktoria 比 Hertha 早三年成立！呢隊波曾經係德國其中一隊勁旅，不過講緊係已經係差唔多一百年前既事！ 😀
入場前我地見到有咁多警察，而為會有好多人入場。點知場內面得幾百人，其中一半係作客球迷，有1/3 係警察，其餘先係主場球迷。我地仲偷聽到企係我地附近既警察 call 台話：「大佬，呢度無我地預計咁多人喎，可唔可以早啲收工呀？」
上半場既比賽節奏都幾快，主隊一路都有好多攻擊，之後靠自由球直接射入開齋。客隊好快就靠一個靚頭鎚追和～ 用左成個中場休息時間排隊買野食之後，因為成手都係野食，所以我地去左主看台度搵個位坐，諗住食完先再行返出去。真係好在我地去左有蓋既主看台坐！下半場開波一陣，個天突然間變黑同起大風，過多兩分鐘仲落超大雨。見住企係出面既球迷即刻狂奔衝上主看台時，真係覺得自己好好彩！可惜坐係主看台時會完場聽唔到客隊球迷打氣既聲..
Viktoria 完場前突然黎一個絕殺，咁就係主場全取三分。完場後有幾位球迷等住同球員慶祝，其他人包括我地好快就離開球場。離開後我地沿路行返去巴士站等巴士，點知架巴士遲到。等到班作客球迷又走黎同我地等同一架巴士，佢地有一路拍手大叫 Babelsberg，仲有警車一路跟住佢地。上巴士後，佢地又塞滿左架巴士，但班人真係好乖好安靜，完全無人拍打車窗大叫打下氣咁。
呢場波既完結代表我地好快就可以睇下一場波，亦都係我地黎柏林既目的 － 柏林聯！！！！！！！