13.04.2017
德國東北地區聯賽 第二十八週
1. FC Lok Leipzig - VfB Auerbach
Bruno-Plache-Stadion
賽果：1:3 (0:0)
八場人數：2.228 (15 名作客球迷)
上回提到睇完 Chemie Leipzig 我地就即刻趕去睇 Lok Leipzig ，原本我地既最壞打算就係放棄睇呢場波，因為 Chemie 五點半開波，即係大約七點三完場。渣車去另一個球場條路要經過市中心，即係快極都可能要二十分鐘先去到，我地點都會 miss 最少五分鐘。
離開 Chemie 時咁岩球場對外有建築物火燭，又塞左一陣。跟 GPS 帶路，點知其中一條路封左又要改路行，終於去到球場門口又搵唔到位泊車。兜左去球場另一面搵到位後，又搵唔到球場入口！明明球場射燈就係前面，但入口要去返另一邊先入到場。就當我地諗住回頭時，我地發現有道閘開左係可以入到球場，兩個工作人員都係斜路上面睇緊波，佢地見到我地兩頭望就落黎問我地係咪想睇波，我地話係，佢地就話：「入黎啦，唔洗你買飛啦～」就帶左我地入球場！
入場後發現原來呢個係作客區既入口，即係我地入場後係同班作客球迷一齊企。但今場波既客隊只有 15 位球迷在場。好少聽到 Auerbach 既球迷新聞，所以我地估平時佢地可能都唔係話特別多人，有 15 個球迷可以係星期四晚渣差唔多兩個鐘車去支持球隊已經算係咁！
上回講完 Chemie 既背景，而家就當然要講埋 Lok 啦。Lok 既全名係 1. FC Lokomotive Leipzig，中文會叫火車頭萊比錫，係德國講 Lok 大家都會明。來自東德既球會通常都有比較複雜既歷史背景，好多球隊因為二戰而解散，戰後重新組織過又因為東德政府對足球聯賽有新政策，唔少球隊又逼住要合併或解散。到德國統一後，又因為東西德聯賽要合併衍生左各種關於球隊發展既問題。
要追溯 Lok 既歷史就要去到 1893 年，當時佢地名為VfB Leipzig，到二戰後東德政府係 1966 年既改革下成為 Lok Leipzig 。 （因此好多東德球隊係 2016 年慶祝 50 週年）德國統一後，佢地原本用返舊名 Vfb Leipzig，可惜球會係2004 年破產解散。同年，有球迷重新組織 Lok Leipzig 並由最低組織聯賽踢起。Lok 當時已經獲得球迷熱烈支持，係最低組別聯賽出戰時曾經有超過一萬二千人入場！經過多年努力終於在近年升班上地區聯賽！
係萊比錫，Lok 既支持度其實係高過 Chemie 好多。東德時期，每個東德城市都會有一隊大球會特別獲得地方足總支持，Lok 就係當時有萊比錫足總同市政府支持既球隊；係東柏林既大球會係 Dynamo Berlin；Dresden 係 Dresden SC 等等，而其他球會都不被足總重視，所以啲小球會既球迷同大球會既球迷之間有好重既火藥味。係萊比錫就分哂區，市中心以北係 Chemie 既地盤，以南就係 Lok 既地盤。
好可惜 Lok 既球迷組織最近因不知明原因解散，賽前我地已經知道呢場波唔會有啲咩氣氛。入到場後見到龍門後面有一支寫住 Ultras 既大橫額，但橫額後面得大約 50 人。以堂堂 Lok 黎講，佢地既 ultras 無可能得 50 人。我用部相機 zoom 埋去諗住睇下係咩人，雖然部相機唔夠勁睇唔到樣，但見到佢地用類似非洲鼓既物體黎打拍子真係笑左出聲。
雖然我地遲左半個鐘入場，但場波仲係未有紀錄所以我地都無錯過啲咩。下半場一開波 Auerbach 就射入領先，全場靜哂，得我地旁邊果十五條友係度狂呼慶祝。隔壁區既 Lok 球迷當然即刻暴哂粗咁叫佢地收聲啦。過多幾分鐘 Auerbach 又入波射成二比零！！！今次唔係淨係隔離區既人鬧，係全場一齊鬧。成場波Lok 既球迷都好不滿球證既判，係咁叫佢做黑哨 「Schieber」 。領先緊既 Auerbach 球迷就當笑咁笑返主場球迷乜都賴球證啦。好在作客區同隔離既主場區有兩塊圍欄隔開，雙方已可以互罵。
到六十幾分鐘，Lok 終於追返一球。兩隊波既實力唔係相差好遠，賽前一隊排第十，另一隊排第十一，不過 Auerbach 今場把握到埋門機會，去到近八十分鐘射入第三球埋齋完場。
賽後作客球員到作客堆向球迷致謝，球員都行去圍欄逐一同球迷擊掌！然後我地就離開球場，上車開電台聽歐霸直播，當時史浩克已經落後一球了，返到酒店睇埋場波收拾下就準備第二日出發去柏林！！！
事後有人留言話我地知 Lok 既球迷組織雖然解散左，但好多舊組織成員都仍然有入場睇波，只係唔再企係龍門後面，而係企係主看台。所以主看台上有好多球迷橫額，間唔中仲有人係主看台帶起唱歌打氣（有種英式打氣風格）。