08/04/2017 德國西南地區聯賽 第三十二週 VfR Wormatia Worms - SV Elversberg Wormatia-Stadion 賽果: 0:0 (0:0) 入場人數: 993 (約 100 名作客球迷)
去完旅行發現原來今季得返幾場波就完結，睇下睇下原來已經第三十二週，即係今季常規賽事得返六場波！返到黎第一場聯賽我地跟 Elversberg 到 Worms 作客，一個係 Mannheim 附近既小城市，車程大約兩個鐘。
係巴士上，我地開左兩包由東京買返黎既手信比佢地食。德國人其實唔興買手信，不過我話去日本唔可以唔買手信！所以買左包草餅諗住比佢地試下日本既特產。點知佢地全部都覺得草餅軟林林既質地好嘔心，放到入口又話好似食緊面粉咁乜味都無。一個二個都唔識貨，之後淨係問我地拎士多啤梨味既朱古力黎食，話個味似 Joghuretta 喎（當地既士多啤梨味小食）。最後開多盒士多啤梨味既Kit Kat，佢地個個又好開心咁食，因為德國得原味同焦糖味，對佢地黎講士多啤梨味係新大陸！！！
到達 Worms 後，大巴只能停係球場外既一條大路，我地要行一條有圍欄包圍既小路先可以到作客區門口。作客區十分之細，最多可以只能企五百人。不過細有細既好處，就係當日大家都企埋一齊，睇落好似多人啲咁！
Worms 既主場係多用途球場，看台同球場之間有幾條跑道，作客區位球龍門後，所以離球場更加遠。主隊既球迷組織聚集係主看台下，都有差唔多八十人係果個小區入面，間唔中都有大聲打氣。
入場時，售票職員每人都會派一本場刊，大部份場刊最後比我地撕爛哂，臨時整左個彩色 choreo 😀 作客球迷賽前準備左一條橫額，事源係上月有一位來自 Saarbrücken 名為 Winnie 既球迷被確診患末期癌症，呢位球迷同 Elversberg 球迷有啲私交，所以當時 Elv 球迷都整左橫額為 Winnie 打氣，可惜佢最不敵病魔因病離世，所以 Elv 球迷當日係球場舉起橫額願 Winnie 安息。
臨近季尾，地區聯賽亦越黎越接近季後賽，五個地區聯賽既冠軍加西南地區既第二名（因為西南地區聯賽有靠多球隊）會進入升班附加賽。當日賽會為附加賽抽籤，結果係西南地區既兩支球隊會對北部或拜仁區既冠軍。而邊隊對邊隊會係季尾待確認邊隊第一名同第二名先會再抽籤，以免有球隊走線。（Elv 當年就係因為最後一場派出青年軍作客而成功走線，係附加賽對因班費問題而唔想升班只會 hea 踢既慕尼黑 1860 二隊）
球場上，Elversberg 佔盡上風，但硬係差點運氣，埋門多次都失敗。開賽前大家都無咩預感會贏波，特別係比賽間期知道競爭對手都失分，你就知道自己隊波一定會跟住一齊失分。好在隊隊波都失分，所以自己失分都無咁失望！完場後，小食亭店主走出黎話清貨大平賣，所有飲品同小食只賣 1,5€ 同免膠杯按金，所有人即刻排隊買多幾杯啤酒先走～
剩返五場波，除左對 Saarbrücken 既打比戰，其他對手都係中下遊球隊，只要生生性性做好自己本份，Elversberg 將可以再出戰升班附加賽。希望唔會有任何差錯…