德國乙組聯賽 第十六週 VfL Bochum - TSV 1860 München Ruhrstadion 賽果： 1:0 (0:0) 入場人數：15.239
今個星期原本諗住星期日去睇 RW Essen vs Wuppertal，但原來 Elversberg 改左星期日比賽所以我地就要搵星期六有咩波睇，最後就決定去睇 Bochum 對 1860 München。
呢場波其實都有少少火藥味，因為波琴既球迷同拜仁既球迷結左盟，你會見到好多波琴球迷戴住半藍白半紅白既頸巾，係球場入面有時仲會唱拜仁既歌，所以今場波可以話係佢地既打比。
今個月開始由 Trier 有新火車班次直上科隆，時間只係需要兩個半鐘，但我地要趕到開波前到球場既話就一定要搭頭班車。星期六朝早五點半就要起身，七點前出門口要去火車站附近搵地方泊低架車。係火車上面由天黑搭到天光，本身諗住可以睇到日出，可惜大霧到乜都睇唔到，淨係見到結哂霜既草同樹。原本我地要係科隆轉一次車去 Düsseldorf，然後再轉車先去到 Bochum，去到科隆時見到有班可以直達 Bochum 既火車會遲 25 分鐘，我地就去等呢班火車啦。
黎左德國之後我地搬左去一個得千幾個既小鎮住，P 成日驚我會唔慣呢度咁靜又得咁少人，等畢業後可能考慮搬去啲大城市。但我完全無唔慣，反而每次經過啲大城市見到咁多人會有啲驚。係科隆大站上落車同香港搭地鐵無咩分別囉，咪又係個個衝入去搵位坐，真係好多人！！！我地班火車到站後，等左起碼成分鐘啲人先落哂車，好好彩比我地搵到兩個位，坐一個鐘多啲就到 Bochum 啦。
係 Bochum 火車站落車後，跟住啲球迷行就搵到地鐵 (U-Bahn) 搭去球場，搭兩個站就可以到 Ruhrstadion。球場站係無可能會 miss 既，因為一出隧道就成個球場係正你既左面！上年九月去呢個球場時係夜晚，有射燈照住個球場時個球場真係好靚！！我地上星期先決定去睇呢場波，上網買飛時佢地已經停止左郵寄服務，我地要即場買飛，點知即場買飛比預售貴兩歐囉，但都叫慳左 50 cents 既… 郵寄服務要比 4.5euro >_>
我地坐係龍門後面，波琴既主要球迷打氣區係我地對面，作客球迷係我地既右手面。對波琴無咩好感，但我好中意啲球迷唱佢地個名 “Bochum” （讀音類似「波 Hoom」），個 “chum” 音佢地由幾千個球迷用超低音攻出黎果下，唔係隻隻字都做到！！！由於我地坐得比較近作客球迷，所以都唔係好聽到主場球迷啲聲。
1860 原本有兩個主要球迷組織，最大既球迷組織早前話因為佢地年事已高，所以解散組織，將打氣既重任交比另一個年輕組織，點知佢地比人偷左組織既大橫額，被迫解散組織。 1860 既球迷今季只好係無組織帶領下去為自己隊波打氣。今場波佢地都有 capo 同鼓手帶頭，雖然組織解散左，但球迷仍在，佢地把聲仲係度！
上半場我地話個球證吹得好差同唔知自己做緊乜咁，今場我地只係以花生友角度去睇場波都覺得個球證好有問題，到下半場 P 問，其實個球證係咪同 Elversberg 上場係 Hoffenheim 同一個人黎？兩個都光頭又吹得咁差。我即刻上網查，點知！！！！真係同一個人！！咁既質素都可以吹乙組。波琴最尾幾分鐘終於入到一球贏波，有人話事後睇返係手球入波，咁真係要多謝呢個廢球證啦。
完場後我地行返去火車站，迫地鐵既話可能迫半個鐘都未上到車，搭車落返科隆有一個鐘轉車時間，原本諗住去聖誕市集望下，最後都係留返係火車站食野算。咁岩 FC 對 BVB 剛剛完場，我地食完野時已經見到好多球迷係火車站走黎走去 >_>