德國西南地區聯賽 第二十三週 TSG Hoffenheim II - SV Elversberg Dietmar-Hopp-Stadion 賽果: 1:2 (0:0) 入場人數: 330 (作客球迷: 120)
星期日我地跟 Elversberg 到 Hoffeheim 作客。球迷巴士朝早十點半就出發，早到出發時仲遇上球隊隊巴。今場波意外地有好多球迷報名想搭球迷巴士，但因為旅遊巴公路既巴士全部用哂黎接載遊客去聖誕市集，所以可提供到一架巴士比球迷用。出發後個半鐘係 Hockenheim 公路休息站休息左二十分鐘就繼續出發。有留意賽車既話應該都好熟 Hockenheimring 啦！係公路上仲會見到賽道既其中一個看台，等遲啲暖返啲我地要搵機會去睇下 DTM。
今場波作客德甲球隊賀芬咸既二隊 （U23)，比賽場地係一隊以前既基地，而家成為青訓基地並以班主之名命名為 Dietmar-Hopp-Stadion。賀芬咸一隊既主場而家位於隔離大鎮 Sinsheim。
賀芬咸有 Dietmar Hopp 注資前，曾經長時間同 Elversberg 係同一組別比賽（即係地區聯賽），所以好多 Elversberg 球迷都對呢個球場好熟悉。賀二隊今季係聯賽榜暫時排係第五，唔似呢個聯賽入面另外兩隊二隊呢係度 hea 踢。
上季 Elversberg 到 Hoffenheim 時，賀芬咸既主要球迷組織 Young Boyz 都有到場支持佢地既二隊，完場後有一班飲醉左既 Elversberg 球迷去搵佢地搞事，所以 Elv 球迷個個都有心理準備班 YB 有機會今場波黎報復。當然，球迷諗到既，警察都會諗到。當我地到達 Hoffenheim 鎮外時就已經有三架警車仍接架巴士，仲前後包抄幫我地開路，上到山發現球場外另外仲有三架警車。
排完隊買飛諗住入場時，保安話未夠一點唔入得，要企多兩分鐘先可以入場。入場後見到球場另一面仲有多幾架警車，唔講以為係啲咩世仇打比戰。雖然對呢隊波無咩好感，但一定要大讚佢地既球場小食！！！佢地竟然有洋蔥豬扒包！！！！！雖然呢排係聖誕市集已經食左好多豬扒包（平時無得食！），但係球場食又係呢一種風味。加多杯 400ml 熱血酒，食完真係即刻成個人暖返哂。當日雖然萬里無雲，但作客球既看台上蓋完全擋住左個太陽，只有一陣陣既寒風吹入黎。所以一定要企係人群入面搵人擋風。今場波除左有平時既主要球迷組織，仲有一個來自瑞士既球迷組織第一次亮相。真係估唔到 Elv 去到瑞士都有人支持！
我懷疑今場個球證係佢地既老闆派落黎既。好多球對方球員係佢面前犯規佢地無吹，但班友一 hi 親跌低個球證就即刻吹罰。下半場 Elv 入兩粒叫做有個 cushion 位諗住可以放心啲，TSG 追返一粒都無話特別不安，因為佢地唔係踢得特別好。但 Elv 自從失左果球波之後就完全無哂控球權，比對面禁住黎攻。完場後作客球迷即刻大叫 “Schiri, du Arschloch!” (Ref, you asshole!)，好在三分已袋，繼續坐係榜道！
完場後，我地唔可以沿入場條路離場，要係球場另一面離場自己行落山。沿路有便衣警察同我地一齊行，可能佢地驚 YB 會係森林埋伏卦。。。上車後班警察護送到我地上左公路先走，佢地真係好得閒？