莎蘭盃十六強 FSV Jägersburg - SV Elversberg Alois-Omlor-Sportpark 賽果： 1:3 (0:1) 入場人數：~ 400 (150 Gäste)
呢個星期六原本 Elversberg 係無比賽既，但因為下週賽期重整，所以將原本星期三舉行既莎蘭盃十六強提前幾日進行。今次主隊 Jägersburg 位於 Homburg 市內，大家賽前一個鐘係 Elversberg 集合，齊人後就大家一齊渣車出發。
隊波最近成績好，加上今場由原本星期三晚改去星期六，所以都有唔少球迷去睇呢場波。而 Elv 既球迷組織更加帶埋鼓同旗去打氣（平時盃賽唔會特別打氣）。下午去到門口大家排隊買飛，佢地竟然收 7€!!!! 我地睇聯賽先比 6€ 咋，啲小球隊就係趁有啲比較大既球隊黎作客時就乘機掠水。第五級別或以下既球隊通常都係非職業球隊，所以佢地都無特別印制既門票，佢地啲飛係一卷卷好似冒險樂團啲飛仔咁。今場波果碌波飛上面印住既價錢係 DM 10。咩係 DM? Deutsche Mark，即係德國用歐元前既貨幣，又即係張飛係 2002 年前既產物。
入場後佢地搵到一個「作客區」，就即刻走上去霸左個位。呢個球場原本只係四面得欄杆圍住個球場隔開觀眾，但因為上季Koblenz 降左班去 Oberliga (第五級別）要到 Jägersburg 作客，季前佢地知道 Koblenz 會有班作客球迷，所以佢地興建左個小作客區比佢地用。
我地趁未開波就買野食醫左肚先，餐牌寫有薯條但當日佢地又話無囉。今場波因為耳痛所以我無同班球迷一齊企，自己企左下面啲欄杆前面。係旺角場只有完場前幾分鐘先有得咁樣企係欄杆前面，等啲人想早走又想睇埋場波一路行下又企下咁睇。但企係欄杆前睇波係另一種感受，睇住啲球員係正你面前飛奔，同時又好驚食波餅，要牛咁眼望實個波。班球員踢得幾輕鬆，對面都無咩威脅係最後破到蛋。氣氛還可以啦，半場後大家都無點特別唱歌。