德國西南地區聯賽 第十八週 FC Nöttingen - SV Elversberg Panoramastadion 賽果： 0:2 (0:1) 入場人數： 602 (35 Gäste)
Elversberg 係聯賽最後一週作客到 Nöttingen，呢個小鎮細到出左公路之後過左幾個小城市都未見到鎮名出現係路牌上。
球會原本話今場波唔會有球迷巴士，但有球迷投訴球會季前明明承諾過會為每場作客賽事租球迷巴士，最後球會改口話如果搵到二十人報名既話就會租車。班球迷即刻周圍搵人去報名，雖然最後只得十八人，但球會都係租左架小巴帶球迷到 Nöttingen。不過我地唔係由 Elversberg 出發，所以一早已經諗住自己渣車朝早出發到 Karlsruhe 一日遊，然後再到 Nöttingen。上次到 Karlsruhe 都無時間好好睇過個城市，所以今次決定要去做遊客。今次終於去到市中心同王宮，真係好中意一個有一個大花園／廣場既地方，可以坐係太陽下面睇住其他人做其他事。
去到德國南部 Baden-Wüttemberg 州，同上次去 Stuttgart 一樣，有得㨂緊係要食 Schwäbische Spätzle!!! 出發前搵到學生最中意去既酒吧去食晏，因為學生去得既地方一定係抵食又好食！原本睇中左份午餐，不過我地遲左一步，坐低果陣已經賣哂。不過我份 Spätzle 大碟到飽足成晚，最後去到球場野都唔洗食。
岩岩個週末轉左冬令時間後，而家每日六點未夠個天就已經黑哂，即刻成個人覺得好懶。我地五點幾離開 Karlsruhe，渣車半個鐘唔洗就到 Nöttingen。場外有四架警車加好多保安等候班作客球迷，因為佢地上次係呢個球場放過 pyro，所以今場波啲保安即刻嚴格左。入球場做安檢時好多時都係守下身，望下你個袋就過得關。今次我知佢地會守得嚴啲，所以我淨係係衫袋袋左電話同相機，個保安要我連相機袋都要打開比佢睇，所有衫袋同帽佢都要伸手入去檢查。
呢個位於山上面球場係100% 全企位，只係有幾張櫈仔係場邊比啲老人家坐下。個球場細得黎又唔可以話 up dup，但一個咁既小鎮仔有隊波上到第四級別聯賽都算係咁。佢地作客區既小食部原本貼住張紙話要熱飲就要行到球場另一面既小食部買，不過半場時我聞到熱紅酒 (Glühwein) 既氣味！！！！！即刻買左我今季第一杯既 Glühwein～～ 心情即刻大好！！
今場波既作客球迷有大約 35 位，球迷巴士下午 4 點就要出發，所以成功號召到 18 人都算唔錯啦。同埋估唔到氣氛都幾好，人係少，但因為主場球迷無任何球迷組織，可以話完全無聲氣，所以作客球迷只要有幾個人一齊大聲唱歌就因為可以做到好大聲。有一位女球迷唔知點解今場特別活躍，係咁高呼佢最中意既球員個名，仲問我有無最中意既球員，叫我一齊叫。但我一來話無，二來我已經過左做痴女既年紀，無左果種會想為一個球員而尖叫既果種激動啦。
最後 Elv 上下半場各入一球，球迷當然開心啦。大家開始唱北愛爾蘭球迷唱既 Will Gigg’s on fire, your defence is terrified 既 tune，改做成果位女球迷最愛既 10 號仔球員個名 Maxi’s on fire, your defence is terrified，唱足幾分鐘，唱到完場後啲警察都係度哼呢首歌！
場波完結後 Elversberg 會領先踢少一場既 Saarbrücken 五分，正式成為 Herbstmeister （秋季冠軍）。雖然過埋下週末首輪賽事就會完結，但唔代表歇冬期開始。歇冬會係十二月中先開始，即係下星期所有球隊完成所有首輪賽事後，隨即就會開始次輪賽事，去到第二十四週先會正式完成上半季。成為 Herbstmeister 其實係無咩意義既，要最後可以係頭兩名完成整個賽季先有意義。。。