德國西南地區聯賽 第十七週 SV Elversberg - SC Teutonia Watzenborn-Steinberg Waldstadion an der Kaiserlinde 賽果: 6:1 (3:1) 入場人數: 1,274
今個星期六又返黎莎蘭睇波啦～未開波就知道當日又運行。當我地行緊去球場時，有一對夫妻問我地係問去睇波，我地話係，然後佢問我地買左飛未，我地話未買 （我地不嬲都係即場先買），佢地拎左兩張飛出黎話：「送比你地架，如果有人問起就話係機場既飛」，講完佢地就繼續向球場出發。
我地望下張飛，發現張飛係 Block B 區，即係係 VIP 區， VIP 區除左位靚之外，仲有就係可以任食任飲！可惜呢兩張飛我地用唔著。如果 Block C1 未重開既話，我地就可以用，因為 Block C2 同 Block B 係用同一個入口，而 Block C1 除左有另一個入口之外，最大問題係佢地 Block B 唔係互通，所以如果我地用呢兩張免費飛入場既話，我地就唔可以去龍門後面打氣。最後我地放棄左野食，將呢兩張飛轉贈他人（用交換貼切啲），最後我地就去返 C1。
呢度作客球隊來自 Hessen 州，位於法蘭克福以北，即係佢地要坐大概兩個幾鐘車程黎到莎蘭。當日一位作客球迷都無，所以全場都係得主場球迷既打氣聲。
開波幾分鐘主隊就領先，然後好快又入多兩粒，大家個心都安樂好多，因為以 Elv 今季既防守能力黎講，要倒輸返三球真係無咩可能，佢地今季失球數字仲係單位數！客隊係上半場尾段追返一粒，但都改寫唔到佢地要輸波既結局。換邊後，Elv 再係我地前面入多三nup！第五球原本應該係十二碼入既， Kapllani 負責操刀，點知射唔入，果刻大家心諗：咩料呀。十二碼被救出後變成角球，然後有人話，可以佢唔想咁易入波，要呢個機會先射入呢。點知佢真係咁岩企係門前接應用後腳好瀟灑咁踢左個波入網。
主看台果面有一班小朋友帶旗帶鼓入場打氣，佢地間唔中仲學我地呢面既節奏。有一下當全場無咩聲既時候，佢地就開始打鼓，班大家全部就舉起隻手跟佢地既鼓聲拍手，點知佢地打左一節就停左，然後好多人叫佢地繼續。但小朋友唔係好識掌握節奏，一時太快一時又太慢，然後啲大人叫佢地要慢啲就返我地。完場前佢地仲要走埋過黎我地前面一齊打鼓，好得意！！
比賽其間大家都一路留意住另一場波：Homburg vs Saarbrücken，因為 Saarbrücken 週中失分，即使佢地踢少一場，對 Elv 都已經無咁大威脅。下半場 Homburg 一度領先 3:1，到呢面完場時， FCS 追到 3:3。個個都即刻睇住部電話留意隔離場波直至確定和波完場，Elv 係榜首既位置又更加安全！
今場係 Elv 係上半季既最後一場主場賽前，黎緊週中會作客 FC Nöttingen 後就會完成上半季所有賽事。西南地區聯賽今季有 19 隊波，每週都有一隊波休息，Elv 就會係第 19 週無比賽，即係下星期六我地只可以食花生。不過呢，我地已經另有計劃啦！！